Job 9

1Immehel mewan hi Job ey kantuy 2“Em, inamtak e makulug ida huttan ni inhel mu. Nem kaw dammutun wada tuun endi liwat tud hinangngab Apu Dios? 3Anin ni kantu et iddiklamuh ni hakey ni tuu hi Apu Dios, kaw kabaelan tun hummangen hu hakey ew ngud hanlibun pinhed Apu Dios ni mahmahan ni hi-gatu? 4Eleg, tep nekallaing niya et-eteng hu kabaelan Apu Dios. Endi hakey ni tuun dammutun mekihhanggan hi-gatu. 5Endi maptek ni ginlid tu duntug niya bahbahen tun bunget tu. 6Tuka peelli yegyeg niya tuka iggiwwed ida batun yinudungan ni puyek. 7Kabaelan tun eleg peukkat hu aggew niya bittuwen. 8Endi nemaddang ni hi-gatun nengibiklag ni kabunyan niya endi nemaddang ni hi-gatun nengigsin etan ni anggetakkut ni mategud baybay. 9Lintu tun emin hu bittuwen e ya Dipper, ya Orion, niya Pleades, anin ida etan ni bittuwen ni wadad appit ni south ni kabunyan. 10Humman idan emin ni impahding tu ey ita kametnga, niya eleg mebillang hu miracle ni tuka pehding. 11Eggak han-ang-ang hi Apu Dios, anin ni meihnup winu melebbah. 12Hedin impalaw tu katey ni mengellan hakey ni tuu, ey endi dammutun an menikked ni hi-gatu. Endi mewan hu hakey ni tuun kantun hi-gatuy ‘Hipa muka pan-ippahding?’ 13Nemahhig hu bunget Apu Dios. Tudda kapetteya buhul tu e henin Rahab, niyadda etan keka-ka-letan ni nekihhanggan hi-gatu. 14Et humman hu, hipa-ak kuman an mekihhanggan hi-gatu? 15Ya dammutun ebuh ni pehding ku ey mampehemmehemmekkak nan Apu Dios e huwet ku, anin ni kantu et endi nambahulan kun hi-gatu. 16Anin ni kantu et i-abulut tun um-ehellak ey amtak damengu e eleg tu dedngela e-helen ku. 17Tep indawtan tuwak ni dakel ni ligat ku ey endi bahul ku. 18Nantutu-nud hu impaeli tun ligat ku e endin hekey battan tu. 19Et-eteng hu kabaelan tu. Endi mei-ingngeh ni hi-gatu. Ey endi me-hel ni bahul tu tep meandeng hu tuka pehding. 20Hedin kangkuy endi bahul ku niya kangkuy nakka paka-u-unnuda hi Apu Dios ey nanna-ud ni kantuy neihla-ak. 21Makulug ni endi bahul ku nem eggak law ikkaguh hu biyag ku tep impeinglay ku. Endi damengu silbitu biyag tep anin ni kantu et nambahul etan tuu winu eleg ey petteyen ida damengun Apu Dios. 23Kamekangngi-ngi hi Apu Dios hedin endi maptek ey netey hu tuun endi bahul tu. 24Ya kangku ey indawat Apu Dios hu kebebbebley eyad puyek idan lawah ni tuu. Tuka kullapadda huwet et beken ni meandeng hu daka pehding. Kaw hipa edum ni kamengippahding nunya hedin beken ni hi-gatu? 25Ya aggew ni pambiyagan ku ey napnun ligat niya anggagannun kamenglaw nem ya etan tuun na-let ni umbesik. 26Em, ya aggew ku eyad puyek ey henin bapor ni anggagannuy kamenglaw niya henin kapenggagannuin tulduh ni mengkeb ni kennen tu. 27Hin-addum ni nakka patnain issiked ni manlillih ey nakka ippilit ni peamleng hu annel ku, 28anin ni nanengtun nakka manhelheltap. Nem inamtak metlaing e nanengtun ya kapannemnem nan Apu Dios ey wada bahul ku. 29Et humman hu, anin ni hipa pehding ku ma-lat peang-ang ku e endi bahul ku et endi damengu silbitu. 30Anin dedan ni kangku et ullahak hu bahul ku e tebbunek ma-lat maka-ulahan, 31ey i-ibbeng da-ak damengun Apu Dios di tuplak et malugittak et anin na-mun balwasik et ibbaing tuwak. 32Nem hi Apu Dios ey beken ni tuu et nak idiklamuh di korteh ma-lat ipenuh midman hu nanhallaan mi. 33Anin dedan, et hipa kuma dammutun mengippennuh ni kasuh mi? 34Hipa dammutun mengkal ni kabaelan Apu Dios ma-lat eggak law tumekut ni hi-gatu 35niya ma-lat tumuleddak ni um-ehel ni hi-gatu? Nem anin ni kantu et eleggak mabalin ni um-ehel ni hi-gatu, tep endi damengu tuled ku.

will be added

X\