Job 41

1Heni mewan etan ni animal e Lebayatan. Kaw handepap mu humman ni anggetakkut ni animal di baybay ma-lat benwitem winu ma-lat bedbedam hu hunghung tu? 2Ey kaw kabaelan mun mantetbeng ni eleng tu et guyudem winu tetwikem hu pangal tun pahul 3et mampehemmehemmek law ni hi-gam? 4Kaw dammutun tetbalen tun mambalin ni bega-em ni ingganah? 5Kaw dammutun eyyumen mu henin sisit et idwat mun u-ungngam et a-ayyamen tu? 6Kaw dammutun iggatang muddan kaumgatang et gedgeden da et igtang da? 7Kaw meippa-net di ulu tu winu belat tu pahul hedin dehnagen. 8Patnaim ni lipputan et eleg mulli law ipidpidwa. Ey eleg mullin hekey liwwana humman ni neipahding. 9Eleg mabalin ni medpap tep anin ni ebuh penang-angan ni tuu et metu-lin takut tu. 10Et hedin hanniman e endi tuun dammutun an meniksikdun nunman ni Lebayatan, hipa makkaw dammutun mekihhanggan hi-gak? 11Hipa kuma humman ni mengippatnan mangngenghay ni hi-gak ey eleg mekastigu? Hi-gak nanletun emin. 12Pinhed kun peamta e ya etan Lebayatan ey naka-let niya et-eteng ni peteg. 13Ey endi tuun dammutun an memi-ki winu menwik ni belat tu. 14Ey endi mewan tuun dammutun an menekkang ni bungut tu tep anggetakkut ni peteg hu ngipen tu. 15Yadda nan-edaedah ni lukhip tu hu happiyaw tu. 16Mandudummit idan peteg et anin ni dibdib et eleg tu hanlehep. 18Hedin bimma-kih man heni apuy hu matetu e kamandadalang e heni ang-ang ni aggew ni kamangkewa-wa. 19Kameukkat hu heni apuy niya ngalab di bungut tu 20niya kameukkat hu ahuk di eleng tun heni ahuk ni kamangkegihheb ni emattan helek. 21Kapetbel ni yayyah tu ngalab niya kameukkat hu tebel ni apuy di bungut tu. 22Et-eteng hu buklew tu niya anggetakkut hu ang-ang tu. 23Ey mekelhin emin hu annel tu e heni gumek. 24Kamei-ellig di makakkelhin batu hu puhu tu e eleg ni hekey umtakut. 25Hedin imminah ey anin idan na-let ni peteg et ida kaumtakut ey endi mabalin ni pehding da hedin bimma-dung. 26Eleg mabalin ni melipputan humman ni anggetakkut ni animal tep anin ni ispadah winu pahul et eleg tu hanliput belat tu. 27Anin ni gumek niya gembang hu igginyang ni hi-gatu et endi silbitu, tep henidda dagemi winu nedunut ni keyew ni hi-gatu. 28Eleg tu pay pekinna pana ey hedin binelabay da man heni dagemin ebuh etan neiteng-il ni hi-gatu. 29Eleg tu mewan pekinna pa-tu tep heni dagemin hi-gatu niya anggengi-ngi tu pahul ni meigginyang ni hi-gatu. 30Hedin ya lukhip ni egeh tu ey makakkelhi niya matedem et heni nealedu hu puyek di tuka keddapi. 31Hedin mewan mangkaykay di dallem ni baybay ey tuka kiwwaa danum et heni kamanlellewwag 32e heni mablah ni upag. 33Endi takut tu niya endi edum ni animal eyad puyek ni henin hi-gatu. 34Hi-gatu ap-apun emin ni animal di muyung. Endi bilang ni edum ni animal di tuka penang-ang tep nemahhig tuka pampahhiya.”

will be added

X\