Job 38

1Entanniy hinumang Apu Dios hi Job di pewek. 2Kantun hi-gatuy “Kele muka kehhinga kalinaing ku e legelegem hu muka e-hela? 3Imay, inah ka et humangem hu mahmahak ni hi-gam. 4Kaw wada ka eman ni nanletuan kun kebebbebley eyad puyek? Ehel ka hedin nekangngamta ka. 5Hipa kan nemnem et hanneya kaminahkang ni puyek? Ku nanna-ud na-mun inamtam? 6Hipa nangnged ni yinudungan ni puyek? Ey hipa nengiha-ad idan tukud tu 7e yan nunman ey ida kaman-a-appeh hu bittuwen niya ida kaman-am-amleng hu aanghel? 8Hipa hu nengiha-ad ni kelteg ni danum idad baybay eman ni nekapyaan tu? Hi-gak, endi edum. 9Hinephepan kun makahdel ni kulput hu baybay et man-enget diman. 10Inha-ad ku hu pappeg ni baybay et ihammad ku lekbi tu et ialladduk. 11Et ehelek ni dalluyun e eleg tu li-bahi humman ni kelteg ni inha-ad ku. 12Job, kaw wada-ew ngu pinhakkey ni nanmandalan mun hileng et mewa-wa niya kaw wada nanmandalan mun aggew et tumimil? 13Kaw minandal mu kawwalwal et maihinap di kebebbebley et mepappeg ida lawah ni kameippahding di engeenget? 14Hedin kamenimmil aggew ni kakkabbuhhan ey kameka-ang-ang hu kapkapyaddan kedunduntug niyadda nangkedeklan. 15Ey hedin nekawwa-wa, ey eleg law mabalin ni pehding ni tutu-u hu lawah ni implanuh da. 16Kaw kinabaelan mun limmaw di dallem ni baybay et mu inang-ang hu kapan-utbulin danum? 17Ey kaw inang-ang mu hu eheb ni inha-ad kud kahehgepid bebley ni netey? 18Kaw inamtam hedin hipa kalinakkeb ni puyek? Humang muwak hedin inamtam. 19Kaw inamtam hedin attu kakelpuin kawwalwal niya engeenget? 20Kaw inamtam hu kadellanan umlaw diman? Ey kaw amtam hedin inna-nun umlaw diman? 21Nem kabaelam na-mu, tep lintu daka et han maweda emin eya wada niya hineniktamam emin hu hipan neipenahding. 22Kaw limmaw kad nengiemungan kun dallallun 23indaddan ku ma-lat mausal hedin wada gubat niya hedin wada guluh? 24Attu kakelpuin aggew niya attu kakeiwwehhisin dibdib ni nalpud kasimmilin aggew? 25Hipa kamengippeellin na-let ni udan niya hipa nengiha-ad ni dalan ni kedyam? 26Hipa kamengippeellin udan idad eleg mebebleyi e mamegan puyek ma-lat tummel helek? 28Kaw wada a-ammed ni udan niya delnu? 29Hipa a-ammed ni dallallun 30kamengippekelhin danum idad wangwang niyaddad lebeng e heni kelhin batu? 31Kaw hi-gam hu kamengekkenneng ni kakeglididdan bittuwen e Pleiades niya Orion? 32Kaw wada kabaelan mun ippahding ma-lat meang-ang ida bittuwen di hipaddan tsimpuh, niya kaw dammutun ippangulu mudda etan bittuwen e nengadanan ni bear niyadda impah tu? 33Kaw muka ewwasi impahding ku et kau-unnudaddan bittuwen hu pinhed kun lawwan dad kabunyan? Ey kaw heni kan hi-gak et hi-gam hu ngenamung ni mengippeduttuk idan kameippahding di puyek? 34Kaw kabaelan mun tetkukan ida kulput ma-lat umudan et ma-bel ka? 35Ey kaw dammutun mandalem hu kedyam ma-lat maukat niya kaw kaum-alin hi-gam et kantuy ‘Impahding ku hu inhel mun pehding ku?’ 36Hipa nengidwat ni kalinaing niya nemnem ni tuu? 37Hipa hu kabaelan tun memillang ni kulput niya mengissigging ni hi-gada ma-lat maiduyag hu danum etan idad mamegan puyek? 39Kaw kabaelam ni ihhamakan ida layon niyadda impah dan kennen da 40hedin nantaluddad leyang winu hedin ida kamanhehhegged ni kennen da? 41Hipa kamemekkan idan impah ni gawwang hedin neupadda et ida kamambeggan hi-gak ni kennen da?

will be added

X\