Job 37

1Nakka umkebkeb ni mannemnem ni nunman! 2Dengel yu ehel Apu Dios ni heni kidul. 3Tuka peukkat hu kedyam di kabunyan ni impalaw tud emin eyad puyek. 4Ey kameittu-nud hu ehel tun heni kidul e kamengipetnga. 5Em, kamengippetnga ehel tu niya eleg han-awat ni tuu hu kainetteng ni kabaelan tu. 6Tuka mandala hu dallallu niya udan ma-lat ma-gah idad puyek. 7Yadda tuu ey daka issiked ngunu da tep yan nunman pengippeamtaan tun hi-gadan kabaelan tu. 8Yadda dama animal di muyung ey ida kamantellud mabetu niyaddad edum ni daka pantellui. 9Hi Apu Dios hu kamengippeellin pewek niya nemahhig ni ketel. 10Ey hedin yimmayyah man kamambalin ni dallallu hu danum idad wangwang niyaddad kulukul. 11Tuka ha-adin danum ida kulput niya tuka unnudin kedyam. 12Ey tuka mandaladda kulput ni mambinbinangngad et ida kaumlaw di tuka pengippellawin hi-gada eyad puyek. 13Hin-addum ni peelli tu udan et panenum tun puyek e humman tuka pengippeang-angin neminhed tu, nem hin-addum ni tuka peelli et pengastigu tun tutu-u. 14Et humman hu, i-ineng ka kedi e Job niya pandengel ka. Nemnemnem mudda hu kaketngain impenahding Apu Dios. 15Kaw inamtam hedin hipa inna-nun Apu Dios ni mammandal ni kedyam ma-lat maukat di kulput? 16Ey kaw han-awat mu hedin hipa inna-nun kulput ni kamanhahha-ad di kabunyan? Humman keang-angan tun hi Apu Dios ey nakallaing niya nakannemneman. 17Kamanhelheltap ida tuu tep nemahhig atung ni kai-alin dibdib ni kamelpud south. 18Kaw dammutun baddangam hi Apu Dios ni mengibbiklag ni kabunyan ma-lat ya ang-ang tu ey heni gembang? 19Ya muka pannemnem ni annel mu ey nekangngamta ka. Hedin makulug ni nekangngamta ka, tuttuddui dakemin ihhumang min Apu Dios tep ay eleg mi inamta ihhumang mi. 20Kaw wada tuun dammutun menuttudun Apu Dios? Ey kaw eleg tu ngu ikkaguh hu biyag tu et tu ipahding humman. 21Kamedeyyaw ni peteg hi Apu Dios. Kaumhili dayaw tu e endi pengi-ingngehan. Henin aggew e eleg mabalin ni itettekel ni tuu hedin intayab ni dibdib hu kulput et mepukyahan, tep kaumhili. Nem nema-man kaumhili hu dayaw Apu Dios. 23Ey eleg tayu han-awat hu kabaelan Apu Dios ni mengippahding ni emin. Nem anin ni hanniman et kayyaggud niya meandeng hu tuka pehding e eleg daitsu panligligat. 24Et humman hu, kadeyyawa niya katekkusin emin ni tuu niya kadeyyawaddan makulug ni nenemneman ni tuu.”

will be added

X\