Job 33

1Nem yan nunya ey dengel mu e Job hu pinhed ku daman e-helen ni hi-gam. 2Nandaddannak ni menghel ni wadad nemnem ku. 3Hi-gak ey makulug ni emin hu nakka e-hela. 4Ya Ispirituh Apu Dios e Kabaelan tun emin hu namyuh ni hi-gak niya hi-gatu nengidwat ni biyag ku. 5Idaddan mu e Job hu ihhumang mu et manhummangan ita. 6Nan-ingngeh itad hinangngab Apu Dios. Ey pitek hu nekapyaan tan dewwa. 7Et humman hu, entan takut mun hi-gak. Beken ni hi-gak etan eta-gey saad tu ma-lat daka pekebkeb. 8Heninnuy dingngel kun inhel mu e Job. 9Kammuy ‘Endi bahul ku. Endi nak impahding ni lawah, 10nem nealay kan Apu Dios ey nambahullak e heni-ak buhul tu. 11Heni hina-adan tun bangkiling hu helik niya heni tuka hellipat-i keglidak.’ 12Nem e-helek ni hi-gam e Job e neihalla ka. Tep eta-ta-gey hi Apu Dios nem ya tuu. 13Kele nealay kammuy eleg hummangan Apu Dios hu lilih ni hakey ni tuu? 14Anin ni um-eheehel hi Apu Dios ni tuu et eleg da han-awat hu tuka e-e-hela. 15Yan hileng ni kakeuggipin tuu ey kaum-ehel hi Apu Dios di i-innep da. 16Humman hu tuka pengippeamtain anggetakkut ni meippahding ni hi-gada. 17Tuka ihhanniman ma-lat isiked ni tuun manliwwat niya ma-lat isiked dan mampahhiya 18ma-lat eleg ida lumaw di bebley ni netey. 19Ya kapenuggun Apu Dios ni tuu ey tuka iddawsin nemahhig ni degeh. 20Hedin kamandedgeh hu tuu man kameendi neminhed tun mengngan. Anin ida etan ni pinpinhed tun kennen et kamengippeuttan hi-gatu. 21Et lektattuy nekappigut et mambalin ni genit et mablatan. 22Ya henin nunman ni tuu ey ngannganih ni umlaw di bebley idan netey. 23Nem hedin um-ali anghel ni mengi-ehneng ni hi-gatu, et penemnem tun Apu Dios e kayyaggud humman ni tuu, 24et wadan kan et anhan Apu Dios ey ‘Ibukyat mu etan tuu. Eleg umlaw di bebley idan netey tep adyah bayad tu et meihwang di bahul tu.’ 25Et mambangngad mewan elet tu et umu-ungnga. 26Ey hedin mandasal humman ni tuu, ey hummangen Apu Dios hu dasal tu. Ey man-am-amleng hi Apu Dios ni mengebbulut ni hi-gatu ma-lat mambangngad hu kayyaggud ni daka pandagyumi. 27Kantullin tutu-uy ‘Nanliwattak tep beken ni kayyaggud impahding ku, nem liniwwan Apu Dios hu liwat ku. 28Eleg da-ak palaw di bebley ni nangketey et adyahhak e nakka man-am-amleng e nanengtun mategu-ak.’ 29E-eggel ni hanneya hu kapehding Apu Dios ni tuu 30ma-lat meihwang et eleg matey e humman et lebbeng tun kastigu tu tep ya liwat tu, ma-lat man-am-amleng pay nid biyag tu. 31Yan nunya e Job ey mahapul ni mandedngel kan hi-gak. 32Nem hedin wada pinhed mun e-helen, imay ehel mu et dengelek. Nandaddannak ni mengebbulut hedin neiptek e-helem. 33Nem hedin endi e-helem, ey dengel muwak. I-ineng ka tep, et ituttudduk ni hi-gam hu pehding ni menemneman.”

will be added

X\