Job 15

1Entanni ey kan Eliphas nan Job ey “Kaw henin nuntan hu kapenappihappit ni nenemneman ni tuu? Hiyya law, entan tu tagan ehel. Endi damengu silbi tun emin eya muka e-e-hela. 4Kaw endi lispituh mu ey kaw eleg ka umtakut nan Apu Dios? 5Kamaka-amta hu kalinewah mud muka pan-e-ehhel, nema-ma tep muka henniin hapit mu hu muka pehpehding. 6Anin ni eggak e-hela e nambahul ka, et hi-gam ngu nengipeamta eyad muka pan-e-ehhel. 7Kaw kammu nem hi-gam nemangulun tuun neiungnga? Ey kaw newada ka eman ni nanletuan Apu Dios idan duntug? 8Kaw wada kan nekideddengel ni planuh Apu Dios? Kaw hinakkeyam hu laing? 9Niya kaw hipa ni-man hu inamtam ni eleg mi amta? 10Ya nan-adalan min laing mi ey yadda nangkea-amman nangkeubanan e na-na-tengan ida nem hi amam. 11Kaw beken ni kabbabbal hu kapan-e-ehhel nan Apu Dios? Hipa pay muka heppula? 12Kele eleg mu pakannemnema ni bimmunget ka? 13Inwalleng mu hi Apu Dios et deh e lawah eya muka pan-e-helan hi-gatu tep bimmunget ka. 14Kaw mabalin ni wada hakey ni tuun kayyaggud di hinanggan Apu Dios? 15Anin idan anghel et eleg makaddinnel hi Apu Dios ni hi-gada tep beken idan kayyaggud ni peteg. 16Et nema-ma ngu hu tuu e nakalliwatan, e ihik ni mengippahding ni lawah. 17Dengel mu kedi e Job eya e-helek ni inamtak. 18Makulug ida huyyan intuttuddun nangkelaing niya nangkenemneman ni hi-gak. Dingngel dadda dama huyyan aammed da 19e hi-gada hu neidwatan ni bebley eman ni endi ni hu edum ni tutu-un nambebley diman. 20Yadda lawah ni tuun daka panliligat hu edum dan tuu ey manhelheltap idalli ingganah ni kepappegan ni neitu-wan da. 21Nemahhig hu takutakut dallin ingganah. Anin ni wada ni linggep et ida kaumtakut ni um-alin menggep ni hi-gada. 22Ida kaumtakut ni um-ehep hedin engeenget tep entanniy pintey dadda. 23Ida kamandaladalan ni an menemmak ni kennen da, nem endi daka hemmaka. Ey ida kaumtatakut tep inamta da e anggagannu law ey mettey ida. 24Nemahhig takut dan nunman ni meippahding ni hi-gada e henin takut da etan ni patul ni um-alin mengubbat ni hi-gada. 25Henin nunman hu kameippahding di tuun daka taltalanggaa niya daka ngengngehaya hi Apu Dios e Kabaelan tun emin. 26Ihik idan mekihhanggan hi-gatu e henidda sindalun mekiggubbat e nehammad hu happiyaw da. 27Huyyaddan lawah ni tuu ey kekeddangyan ida niya mangkatebadda. 28Nem mangkebahbah ali bebley da et mampambebley idallid nehi-yan ni bebley niya manha-ad idad kamangkebahbah ni baballey. 29Meendilli kinedangyan da. Eleg meihhinnap hu kinedangyan dad dakel ni bebley. 30Eleg mabalin ni da ibbebsikan hu engeenget ni panha-adan da. Heniddalli etan ni keyew ni megihheb tep heng-aban idallin Apu Dios et mebahbah ida. 31Eleg dalli law iddinel hu kinedangyan dan endi silbi tun edum ni aggew, tep endi gun-uden da. 32Anggegannulli ey mepappeg biyag da et meendin emin hu nandinelan da. 33Heniddalli hu lameh ni grapes ni nepugah ey eleg maluum, niya heniddalli habung ni olibah ni nangkaplag. 34Yadda tuun lawah nemnem da ey eleg ida mehlag. Ey mangkegihheb ali baballey dan napnun sinekew da niya piniliw da. 35Hi-gada hu kamamplennuh niya kamengippahding ni lawah niya maheul ida.”

will be added

X\