Jeremiah 5

1Kan Apu Dios ey “Hi-gayun tutu-ud Jerusalem, lakkayuy et yu paka-ang-angen di emin eyad bebley yu hedin wada ew ngu hakey ni ang-angen yun limpiyuh ey meandeng hu tuka pehding. Et hedin wada hemmaken yu anin hakey man eggak law bahbaha hu Jerusalem. 2Wadadda na-mu kamenghel ni kanday daka issapatah di ngadan ku e hi Apu Dios e wadan ingganah, nem ya kakulugan tu ey itek da!” 3Kangkuy “ Apu Dios, inamtak e muka hemmahemmaka hu makulug ni kamengu-unnud ni hi-gam nem endi. Kinastigum ida ma-lat iyayyaggud da elaw da, nem eleg da issiked ni manliwwat. Ey eleg ida mantuttuyyun liwat da.” 4Kangkud nemnem kuy “Newetwet ida dedan eya tutu-u ey endi nemnem da niya eleg da inamta hu pinhed Ap-Apu e Dios dan pehding da. 5Et ya ninemnem ku ey nak mekihhummangan idan ap-apu da, et nanna-ud ni inamta da hu elaw Apu Dios niya inamta da pinhed tun pehding da.” Nem emin ida ey daka ngenghaya hi Apu Dios . 6Et humman hu, yadda animal di muyung, henin layon, yadda ahhud eleg mebebleyi, yadda leopard ey petteyen dadda hu kamengippatnan meukkat di bebley et pamba-nuten dadda. Mukun meippahding humman ni hi-gada ey tep nemahhig liwat da niya ngehay dan Apu Dios. 7Kan Apu Dios ey “Kele nak liwwanen hu liwat ida eyan tutu-uk? Inwalleng da-ak et daydayawen da beken ni makulug ni dios. Anin ni winedak emin hu mahapul da henin kennen ma-lat eleg ida maupa nem nanengtun lawah elaw da. Daka i-ulig hu beken da ahwa ey ida kamanhahha-ad di kad-an idan bibi-in daka pebeyyad annel da. 8Daka itettekel hu ahwan sinakdul da e henidda nakaphel ni butekal ni kebayyu e ida kamenemmahemmak ni labah ni kebayyu. 9Kaw beken ni lebbeng tun kastiguen kudda gapuh ni henin nunyan elaw idan nunyan bimmebley? Kaw eggak ibbaleh hu impahding da? 10Nanna-ud ni kastiguen kudda, et humman hu peelik ali buhul dan memahbah ni hi-gada. Pampetteyen idallin buhul dadda tep beken kudda tuu. Nem e-helan kuddalli ma-lat eleg dadda pateyen ni emin et wadadda metdaan. 11Inwalleng tuwak idan iIsrael et yadda iJudah. Hi-gak e hi Apu Dios hu nanghel nunya.” 12Kan idan nunyan tutu-un Apu Dios ey itek hu inhel idan prophet meippanggep ni kebahbahan da. Kanday “Endi an meippahding ni hi-gatsun lawah. Endi kaya an um-alin ligat winu bisil winu gubat.” 13Kanda mewan ey “Maitek ni peteg ida humman ni prophet tep eleg kaya malpun Apu Dios hu daka e-hela. Et humman hu, meippahding alin hi-gada hu daka ebbiebbigan meippahding.” 14Et humman hu, kan Apu Dios e Kabaelan tun emin ey “Gapu tep hanniman hu inhel idan tutu-u, pambalin kuddan heni apuy hu e-helen kun e-helen mun hi-gada et henidda keyew ni megihheb.” 15Niya kan Apu Dios ey “Hi-gayun helag Israel, peellik hu naka-let ni tutu-un melpud neidawwin bebley ni mengubbat ni hi-gayu. Humman idan tutu-u ey nebayag ngu dedan ni newada bebley da ey eleg yu amta ehel da. 16Naka-let hu sindalu da ey nelaing idan umpana. Ihik idan umpatey e endi hemek da. 17Hi-gadalli mengngan ni ineni yu anin idan edum ni kennen ni intalu yu. Bahbahen dalli intanem yun kaumlameh e henin grapes niya fig. Ey pampetteyen dalli u-ungnga yu niyadda animal yu. Pambahbahen daddalli nekalluhud ni bebley yun yuka pandinneli.” 18Kan Apu Dios ey “Nem yan nunman ali ey eggak i-abulut ni mebahbah emin hu tutu-uk. 19Hedin mahmahan dalli kele nak impahding ida humman ey kammun hi-gaday ‘Mukun impahding Apu Dios ida humman tep inwalleng yu et dayawen yu edum ni dios eyad bebley yu. Et humman hu, mambalin kayullin bega-en idan tutu-ud edum ni bebley.’ ” 20Kan mewan Apu Dios ey “Ehel muddan helag Jacob di Judah e kammuy: 21Kan Apu Dios ey ‘Pandengel kayu, hi-gayun endi nemnem tu. Wada mateyu, nem eleg kayu pakeang-ang, wada tangila yu, nem eleg kayu pekadngel. 22Hi-gak hi Apu Dios, kele eleg yuwak deyyawa? Niya kele eleg kayu umtakut ni hi-gak? Hi-gak hu nengiha-ad ni palnah di gilig ni baybay et humman memappeg ni danum et eleg luma-pih anin ni metennuttu-ug. Ey anin ni na-let niya kamambungngug hu dalluyun et eleg meiddeplug humman ni pappeg ni inha-ad ku. 23Nem mekelhin peteg hu ulu yu ey makanghay kayu. Inwalleng yuwak et ya edum ni dios hu yuka daydayawa. 24Eleg yun hekey nemneman menaydayaw ni hi-gak anin ni impaelik hu udan ni tsimpuh ni yuka peneppuli ma-lat yumaggud inggaud yun katootoon. 25Nem gapuh ni liwat yu ey eggak law peellidda huyyan panyaggudan yu. 26Kamei-dum di tutu-uk hu lawah idan tutu-u. Ida kamambebbettak, heni etan ni tuun kamanlingngen. Nem beken ni sisit hu daka bebtaka tep ya edum dan tutu-u. 27Napnu baballey dan sinekew da e henin pukkungngan ni malingen ni sisit e napnun liningen tu. Humman gaputun et-eteng kabaelan da niya kedangyan idan peteg. 28Mangkatebadda ey ida kamepeppehel. Eleg dan hekey hehmekadda nepu-hig ey eleg da iddawat kelebbengan da. Ey beken ni limpiyuh daka pehding idan anggehemmek ni tutu-u. 29Nem hi-gak e Dios hu mengastigun hi-gada et ibleh ku daka pehpehding. 30Lawah ni peteg ey kamengippetnga hu neipenahding eyad bebley. 31Itek ni emin hu kaebbigaddan prophet et ya kapehding ni padin man-ap-apu ey meippuun di pinhed dan pehding. Ey pinpinhed ida daman tutu-uk humman ni daka pehding. Nem hipalli pehding yu hedin medeteng hu kepappegan ni emin?’ ”

will be added

X\