Jeremiah 33

1Yan eman ni nanengtun wada-ak di kallabbuttan di dallin ni baley ni guwalya ey immehel mewan hi Apu Dios ni hi-gak. 2Hi-gatu e hi Apu Dios hu nanletu eyan puyek niya kabunyan e kantuy 3“Pandasal kan hi-gak et humangen kuddan et ehelen kun hi-gam hu kamengippetnga niya kayyaggud ni peteg ni eleg mu amtan nunman. 4Hi-gak e hi Apu Dios e Dios idan helag Israel ey kangkuy gapuh ni penggepan niya pengubbatan idan iBabilon ni Jerusalem ey mebabbah idalli baballey diman anin ya etan baley ni patul di Judah. 5Hehgepen idallin iBabilon huyyan bebley et mapnun annel ni nangketey ni tutu-u tep nanna-ud ni iwwalleng ku et bahbahen ku gapuh ni nemahhig ni bunget ku tep lawah idan peteg hu bimmebley. 6Nem medettengan ali tsimpuh ni peyaggud ku Jerusalem et pelinggep ku ey pekeddangyan kudda tutu-uk. 7Ibbangngad kudda iJudah niya iIsrael e illelpuk idad bebley ni nambalinan dan balud. Ey peyaggud ku huyyan bebley da et heni mewan lan nunman. 8Kamei-ellig ni ullahan kun emin hu liwat da, ey liwwanen ku hu ngehay dan hi-gak. 9Et um-amlengngak ey meiddeyyawwak di kebebbebley eyad puyek gapuh eyan bebley di Jerusalem. Ey yadda tutu-ud kebebbebley eyad puyek ey metngaddan peteg ni pengngelan da meippanggep idan impahding kun panyaggudan eyan bebley e Jerusalem niya gapuh ni kinedangyan ni indawat kuddan bimmebley.” 10Kan Apu Dios ey “Kan idan tutu-uy nebahbah eya bebley da et heni eleg mebebleyi e endi kamanha-ad ni tutu-u niya animal. Ey neiptek numan humman ni inhel dan endin hekey hu tutu-u niya animal idad bebley di Judah ey yaddad keltad di Jerusalem, nem medettengan ali mewan tsimpuh ni medngel idallid bebley 11hu tekuk ni tutu-u tep ya amleng da. Ey medngel ali mewan hu ngaladdan kaman-an-anlan mangkasal niya a-appeh idan tutu-un mengi-lin i-appit dan hi-gak eyad Tempol gapuh ni pansalamatan da. Kandalliy ‘Pansalamat itsun Apu Dios e Kabaelan tun emin tep kayyaggud ey kamannenneng hu impeminhed tu.’ Em, pekeddangyan kulli mewan eya bebley et heni mewan lan nunman. Hi-gak e Ap-Apu hu nanghel idan nunya.” 12Kan Apu Dios e Kabaelan tun emin ey “Ma-nu tep endi tutu-u niya animal nem meweddalli mewan ida kamampattul ni kalneroh eyad bebley. 13Em, pambillangen idallin kamampattul hu kalneroh daddad duntuduntug ni bebley, yaddad hengeg ni duntug, yadda appit ni south ni Judah di nambebleyan idan helag Benjamin, yaddad bebley ni neihnup di Jerusalem niyaddad edum ni bebley di Judah. Hi-gak e Dios hu nanghel nunya.” 14Kan Apu Dios ey “Medettengan ali tsimpuh ni peamnuk idalli etan hinammad kun inhel idan iIsrael niya iJudah. 15Ey puttuken kulli hakey ni helag David ni mampatul et limpiyuh ey meandeng hu pehding tullin man-ap-apu eyad bebley. 16Yan nunman ali ey meihwang ida iJudah niyadda iJerusalem et melinggep idalli e endi lawah ni meippahding ni hi-gada. Et yalli pangngeddan dan bebley da ey ‘Hi Apu Dios hu mengihwang ni hi-gami.’ 17Hi-gak e hi Apu Dios ey hammaden kun e-helen e ya helag David hu mampatul ni ingganah di Israel. 18Ey wadan ingganah hu padin helag Levi ni mansilbin mengi-appit ni kagihheba, ya pagey et yadda edum ni kamei-appit ni hi-gak.” 19Entanni ey immehel mewan hi Apu Dios ni hi-gak et kantuy 20“Nekitballak ni kawwalwal niya hileng ma-lat mewa-wa ey mehilleng etan ni nagtud ni tsimpuh. Ey nanna-ud ni um-amnu humman. 21Hanniman mewan e nanna-ud ni um-amnu hu nekitbalan kun David e yadda helag tu hu mampatul ni ingganah niya um-amnu hu nekitbalan kuddan helag Levi e hi-gadan ingganah hu mampeddin mansilbin hi-gak. 22Pedakkel kulli helag David e bega-en ku ey pedakkel ku dama helag Levi ni mansilbin hi-gak et endilli pakebilang ni hi-gada tep henilli kadinakkel idan bittuwen di kabunyan ey heniddallin kadinakkel ni palnah di gilig ni baybay.” 23Kan mewan Apu Dios ni hi-gak ey 24“Kaw dingngel mu kae-ehheladdan tutu-un kanday pinilik ida iIsrael et ya iJudah ni tuuk nem inwalleng kudda? Humman gaputun dadda kaheghegnudadda tutu-uk e eleg dadda law ibbilang ni hambebleyan. 25Nem hi-gak e Dios ey kangkuy ‘Eggak iwalleng ida tuuk. Ey eggak belliwi elaw ni kawwalwal niya hileng et ya elaw ni puyek niya kabunyan. 26Hanniman dama e pannenneng ku hu nekitbalan kun hi-gadan helag Jacob. Ey eggak ida iwwalleng hu helag Abraham, hi Isaac et hi Jacob niya eggak kekyaten hu impakulug kun yalli helag David e bega-en ku hu mampatul ni hi-gadan ingganah. Hehmeken kuddalli et ibangngad kuddallid bebley da.’ ”

will be added

X\