Genesis 5

1Yan eman ni nanletuan Apu Dios ni tuu ey lintu tuddan mei-ingngeh hu elaw dad elaw tu. Lintu tuddan laki niya bii ey binendisyonan tudda et ngadnan tuddan tuu. Huyyadda tenten ni helag Adam. 3Yan eman ni hanggatut et telumpulu toon Adam ey nan-ungngan hakey ni laki e nengalla-allan hi-gatu et ngadnan tun hi Seth. 4Nambiyag pay ni walun gatut ni toon et mawedadda edum ni u-ungnga tu. 5Yan eman ni neteyyan tu ey heyam ni gatut et telumpulu toon tu. 6Hi Seth ey hanggatut et lima toon tu et han maweda etan u-ungnga tun hi Enos. 7Nambiyag pay ni walun gatut et pitun toon et mawedadda edum ni u-ungnga tu. 8Et yan eman ni neteyyan tu ey heyam ni gatut et hampulut dewwa toon tu. 9Hi Enos ey nahyam hu toon tu et han maweda etan u-ungnga tun hi Kenan. 10Nambiyag pay ni walun gatut et hampulut liman toon et mawedadda edum ni u-ungnga tu. 11Et yan eman ni neteyyan tu ey heyam ni gatut et lima toon tu. 12Hi Kenan ey nepitu toon tu et han maweda etan u-ungnga tu e hi Mahalalel. 13Nambiyag pay ni walun gatut et na-pat ni toon et mawedadda edum ni u-ungnga tu. 14Yan eman ni neteyyan tu ey heyam ni gatut et hampulu toon tu. 15Hi Mahalalel ey na-nem et lima toon tu et han maweda etan u-ungnga tu e hi Jared. 16Nambiyag pay ni walun gatut et telumpulun toon et mawedadda edum ni u-ungnga tu. 17Yan neteyyan tu ey walun gatut et nahyam et lima toon tu. 18Hi Jared ey hanggatut et na-nem et dewwa toon tu et han maweda etan u-ungnga tu e hi Enok. 19Nambiyag pay ni walun gatut ni toon et mawedadda edum ni u-ungnga tu. 20Yan eman ni neteyyan tu ey heyam ni gatut et na-nem et dewwa toon tu. 21Hi Enok ey na-nem et lima toon tu et han maweda etan u-ungnga tun hi Methushelah. 22Nambiyag pay ni telunggatut ni toon et mawedadda edum ni u-ungnga tu. Ey nekidagyum tun Apu Dios. 23Ya nga-mut ni toon ni nambiyagan Enok ey telunggatut et na-nem et lima. 24Yan nambiyagan tu ey nekidagyuman tun Apu Dios. Entanni ey endi maptek ey ettukaw hi Enok tep ingkuyug Apu Dios. 25Hi Methushelah ey hanggatut et newalut pitu toon tu et han maweda etan u-ungnga tun hi Lamek. 26Nambiyag pay ni pitun gatut et newalut dewwan toon et mawedadda edum ni u-ungnga tu. 27Yan neteyyan tu ey heyam ni gatut et na-nem et heyam hu toon tu. 28Hi Lamek ey hanggatut et newalut dewwa toon tu et han maweda etan u-ungnga tun laki. 29Kantuy “Huyyan u-ungnga hu mengippeamleng ni hi-gatsun emin eyad neligat ni ngunu tayu eyad puyek ni inidutan Apu Dios .” Et ngadnan tun hi Noah. 30Nambiyag pay hi Lamek ni liman gatut et nahyam et liman toon et mawedadda edum ni u-ungnga tu. 31Yan neteyyan tu ey pitun gatut et nepitut pitu toon tu. 32Hi Noah ey limanggatut toon tu et han maweda tellun u-ungnga tu e hi Shem, hi Ham et hi Japet.

will be added

X\