Exodus 40

1Kan Apu Dios nan Moses ey 2“Yan memengngulun aggew ni memengngulun bulan hu pemehwatan yun Tabernacle. 3Ipahgep yu etan Kaban diman ey ihabley mudda kultinah et meha-ninan. 4Ilaw mu etan tebol ey iha-ad mudda meihha-ad diman. Ey ipahgep mu etan pengippettukan ni kengkeh et ituun mudda kengkeh. 5Iha-ad mu etan altar ni pengiggihheban ni bangbanglun insensoh etan di demang ni Kaban ku. Ey ihabley mu hu kultinah di heggeppan ni Tabernacle. 6Ey ya etan altar ni pengiggihheban ni kamei-appit ey iha-ad mud hinanggan heggeppan ni Tabernacle. 7Penum ni danum etan besen ey inha-ad mud nambattanan nunyan altar et ya Tabernacle. 8Kapyam hu dallin ni Tabernacle ey ihabley mu hu kultinah di heggeppan. 9Hedin negibbuh, wakgihim ni lana hu Tabernacle niyadda etan meussal diman et maieng-eng idan emin ni hi-gak. 10Wakgihim dama etan altar ni pengiggiheban ni kamei-appit niyadda meussal diman et maieng-eng idan hi-gak 11anin ya etan besen niya etan pengippettukan tu. 12Ipahding mu hu elaw ni panlinnih nan hi Aaron niyadda u-ungnga tud heggeppan di Tabernacle, 13et pebalwasim nan Aaron hu balwasin padi ey duyagim hu ulu tun lana et keang-angan tu e hi-gatu neieng-eng ni padin mansilbin hi-gak. 14Pebalwasim damaddan u-ungnga tu etan intugun kun ibbalwasi da, 15ey duyagim dama hu ulu dan lana, henin pehding mun ameda et maieng-eng idan padin mansilbin hi-gak. Huyyan pena-adan mun lanan ulud Aaron niyadda u-ungnga tu hu keang-angan tu e ebuh hu helag dan manhulluhullul ni mampeddiddan helag Israel.” 16Inu-unnud Moses emin humman ni intugun Apu Dios ni pehding tu. 17Yan nemangulun aggew ni nemangulun bulan ni meikkadwan toon neipalpun neni-yanan dan Egypt ey binehwat da etan Tabernacle ni panha-adan Apu Dios . 18Ingkapyan Moses etan pengittu-unan daddan tukud niyadda etan kalkalimangnga tu. 19Et han tu ietep etan tuldah et iha-ad tudda etan dingding e inu-unnud tu inhel Apu Dios ni pengapya tu. 20Inla tu etan dewwan batun neitudkan ni Tugun Apu Dios, et iha-ad tu etan di Kaban et hu-keban tu. Et iduduk tudda etan keyew ni pan-attang etan di netullikeng ni neikapyad Kaban. 21Et ipahgep tu huyyan Kaban di Tabernacle et ita-yun tu etan kultinah ma-lat maiheni etan di Kaban. Impahding tudda e inu-unnud tu inhel Apu Dios . 22Impahgep tu hu tebol etan di bawang ni Tabernacle di hinanggan etan ni kultinah 23et iha-ad tudman etan sinapay ni kamei-appit nan Apu Dios e inu-unnud tu hu inhel Apu Dios ni pehding tu. 24Impahgep tu pay etan pengippettukan idan kengkeh di Tabernacle, et iha-ad tud demang etan ni tebol di appit ni south. 25Et integan tudda humman idan kengkeh di hinanggan Apu Dios e inu-unnud tu inhel tu. 26Et iha-ad tu etan balituk ni pan-appitan di hinanggan ni kultinah, 27et giheben tu bangbanglun insensoh ni kamei-appit nan hi Apu Dios e inu-unnud tu inhel tun pehding tu. 28Negibbuh humman et kultinahan tu etan heggeppan etan di Tabernacle. 29Inha-ad tud dallin ni Tabernacle etan pan-appitan daddan kagihheba. Yadman nan-appitan tu etan ni kinleng tu niya ineni dan in-appit da e inu-unnud tu inhel Apu Dios . 30Inha-ad tu etan besen di nambattanan etan ni Tabernacle niya pan-appitan et penuen tun danum. 31Yadman hu pan-ullahan di Moses, hi Aaron niyadda u-ungnga tun heli da niya ngamay da 32hedin umhehgep idad Tabernacle. Impahding tudda huyya meippuun di in-olden Apu Dios . 33Ya nanggillig ni impahding Moses, ey kinultinahan tu nanlinikweh ni dallin ni Tabernacle niya etan ni heggeppan tu, et megibbuh hu ngunu dad Tabernacle. 34Entanni ey hinephepan ni kulput etan Tabernacle ey kaumhili tep wada Apu Dios diman. 35Et eleg pakahgep hi Moses tep hinephepan nisin nunman ni kulput ey kaumhili dayaw Apu Dios . 36Hedin immahpat etan kulput et immela, han ida immegah hu helag Israel et unuden da et lumaw idad lawwan da. 37Nem hedin eleg meglid man eleg ida dama. Nem hedin immela, immeladda dama. 38Yan kawwalwal ey kameipettek di ahpat ni Tabernacle ey hedin hileng, kamambalin ni apuy ma-lat panilag idan helag Israel. Humman ni kulput ey wadan ingganah ni nunman ni da nandaldalnan. CO00848c.TIF

will be added

X\