Exodus 38

1Nengapya pay di Besalel et yadda edum tun altar ni pengihheban ni kamei-appit e inusal da keyew ni akasyah. Huyyan altar ey kuwadladuh e pitu et kagedwah ni piyeh hu kadinukkey tu niya kalinakkeb tu, niya epat et kagedwah ni piyeh hu kasina-gey tu. 2Ingkapya tu hu heni ha-duk idad ta-pew ni epat ni dugu tun neihakkey hu kapkapya tud altar. Negibbuh ni kinapya tu et takapan tun giniling. 3Nengapya pay idan meussal di pan-appitan henin baldih ni pengi-ha-adan ni dep-ul, ya pala, ya besin, ya tewik ni detag niya penellukduk ni ngalab. Emin ida huyya ey nekapyad giniling. 4Nengapyan nelaggan giniling ni meihha-ket di dimmewdew di gawwan bawang ni altar. Ingkapya tu epat ni netullikeng etan di epat ni dugun nunman ni altar ni keidduddukan idan pan-attang. 6Ey nengapyan keyew ni akasyah ni pan-attang e sinekatan tun giniling. 7Induduk tudda humman ni pan-attang etan idad netullikeng ni ingkapya tuddad dugun altar ma-lat pengitngedan idan mengi-attang. Tabla hu kinapyan tun altar ey eleg tu det-alan. 8Kinapya da etan giniling ni besen ni pan-ulahan niya etan giniling ni neipetukan tu e inusal dadda diggal ni indawat idan bibi-in kamangngunnud heggeppan di Tabernacle. 9Ey kinapya da hu dallin ni Tabernacle e nekultinahan ni kakkayyaggud ni luput hu appit ni south e hanggatut et neliman piyeh kadinukkey tu. 10Ya mengnged nunman ni kultinah, ey dewampulun tukud ni giniling ni meittu-un di dewampulun giniling ni pengittu-unan. Meihhabley ida etan idad silber ni kawit ey silber ni pengihhableyan ni neikapyaddad tukud. 11Hanniman damad appit ni north e hanggatut et neliman piyeh hu kadinukkey ni kultinah ni meihhabley di silber ni kawit ey silber ni pengihhableyan ni meikkapyad dewampulun giniling ni tukud ni meittu-un di dewampulun giniling ni pengittu-unan. 12Yad awwidan di appit ni kakelinnugin aggew ey nepitu et liman piyeh hu kadinukkey ni neikultinah e neihabley di hampulun tukud ni neituun di hampulun pengittu-unan. Silber hu nekapyan kawit niya hableyyan. 13Hanniman damad heggeppan di dallin ni Tabernacle di appit ni kasimmilin aggew e mekultinahan ni nepitu et liman piyeh kalinakkeb tu. 14Yadman ni heggeppan ey meikkapya hu dewwan kultinah e hakey ni kultinah di winannan ey hakey di winilli. Handedwampulut dewwa et kagedwah ni piyeh hu kalinakkeb ni hakey. Ey hantetlu hu tukud ni meittu-un di tellun nekapyan pengittu-unan hu pengihhableyan idan nunyan kultinah. 16Emin ida humman ni kultinah ni neihabley di nanlinikweh di dallin ni Tabernacle, ey kayyaggud ni luput. 17Ey emin ida neituunan ni tukud ey giniling nekapya, nem yadda kawit niya hableyyan ey silber. Et yadda utduk ni tukud ey netakapan ni silber. Emin ida tukud ey nekapyaan ni silber ni hableyyan. 18Yadda kultinah ni neihenid heggeppan ey telumpulun piyeh hu kadinukkey da, ey pitut kagedwah ni piyeh kasina-gey da heniddan etan ni kultinah ni neidingding ni nekapyad kayyaggud ni luput, ey nebordaan ni sinayyum ni blue, purple niya makadlang. 19Epat hu tukud tu ey neituun idad giniling ni pengittu-unan. Neha-adan daman silber hu utduk da, anin idan neilibed et yadda pengihhableyan ni kultinah ey nekapyad silber. 20Ey emin ida paghek ni Tabernacle, anin idad nanlinikweh di dallin tu ey giniling hu nekapya. 21Ya bilang ni balituk ya silber niya giniling ni neusal di Tabernacle ey intudek idan helag Levi tep humman in-olden Moses. Hi Ithamar e u-ungngan Aaron e padi hu ap-apu da. 22Hi Besalel e u-ungngan Uri e u-ungngan Hur e helag Judah hu ingkalgaduh di emin idan nunyan meippahding ni in-olden Apu Dios nan Moses. 23Bimmaddang ni hi-gatu hi Oholiab e u-ungngan Ahishamak e helag Dan. Nelaing ni man-al-alkus ey mengibbordan blue, ya purple niya makadlang ni sinayyum di kayyaggud ni luput. 24Hanlibun kiloh ni balituk hu in-aliddan helag Israel ni neusal di Tabernacle. 25Tellun libu et epat ni gatut et telumpulut dewwan kiloh ni silber hu neamung ni indawat idan tutu-u eman ni nebilangan da e nekibilang ida lalakkin dewampulu toon da winu nehuluk e umlaw di enem ni gatut et tellun libu et liman gatut et nelima hu bilang da. 27Tellun libu et epat ni gatut ni kiloh ni silber hu neusal idad hanggatut ni neituun ni tukud ni Tabernacle, et yadda neituunan ni tukud ni pengihhableyan ni kultinah 28ey dewampulun kiloh ni silber hu nekapyan kawit, yadda neibaddeng ni hableyyan ni kultinah niyadda inha-ad dad ta-pew idan tukud, 29niya dewwan libu et epat ni gatut ni kiloh ni neamung ni giniling ni indawat idan tutu-u. 30Nekapyadda huyyad keittu-unan idan tukud di heggeppan di Tabernacle, ya altar, ya etan nelaggan neiha-ad di bawang tu, et yadda ngunut ni meussal di altar. 31Neiusal pay hu giniling di neituunan idan tukud ni keihhableyan idan kultinah di nanlinikweh di dallin ni Tabernacle, yad heggeppan, et yadda paghek pengi-ikketan idan kultinah.

will be added

X\