Romanonenge 8

1Dadiyey kitib-ana an ditakun mangulug ke Jesu Kristo ya adi taku makastigu, 2te gapuh nigappatan takun hiya ya wadan ditaku nan Espiritun Apu Dios an manannot hi pangi-e taku ta adi mo deke on ihik takun aton nan punliwatan an hidiye nan gumapuh kihi-anan takun Apu Dios ta inggana. 3Adi mapakomaan di liwat taku hi pangun-unudan taku nah Tugun Apu Dios te adi taku pakaun-unud te hay kinatagu taku ya gaga-iho. Mu hi Apu Dios ya pakomaanay liwat taku te intud-ak na nan Imbabalenan numbalin hi tagu an umat ke ditaku ot ikate nay liwat taku. Hidiyey pamaddang Apu Dios ke ditaku ta aton takuy maphod an bokon mo hay gaga-iho. 4Inat nah tuwe ta ditakun mangulug ya waday kabaelan takun mangat hi niptok an umat nadah nitudok nah Tugun Moses. Ta hidiye nan ditakun mangulug ya bokon nan gaga-ihon pinhod di adol takuy un-unudon taku, mu nan pinhod nan Espiritun Apu Dios. 5Nan tagun hay gaga-ihon pinhod di adol nay nonomnomona ya hidiyey un-unudona. Hituwey lummuh kihi-anana ke Apu Dios. Mu nan tagun hay pinhod di Espiritun Apu Dios di nonomnomona ya hidiye boy un-unudona ya hay pumbalinana ya luminggop ya midatan hi biyag an maid di poppog na. 7Ta hidiye nan hanan tagun hay gaga-ihon pinhod di adol nay un- unudona ya hiyay buhul Apu Dios. Adina un-unudon di tugun Apu Dios te hay kakulugana ya maid di kabaelanan mangun-unud kediye. 8Hanadan mangun-unud hi gaga-ihon pinhod di adol da ya adida ipaamlong hi Apu Dios. 9Mu ditaku ke ya adi athidi te wadan ditaku nan Espiritun da Apu Dios ke Jesu Kristo an mangituttuduh aton taku. Mu hanada ken tatagun maid di Espiritun Kristo ke dida ya bokona tatagu dida. 10Mu ditaku ken wadah Jesu Kristo ke ditaku ya takon di mate taku gapuh liwat taku ya wadan ditaku nan balun biyag te imbilang ditakun Apu Dios an maphod te hay nangidinolan takun Jesus. 11Deket wadan ditaku nan Espiritun Apu Dios an nunmahun Jesu Kristo ya athidi bo damdamay atonan ditaku an takon di mate tun adol taku ya mahuwan ditaku te hay kandamana. 12Kinali, dakayun kaibaiba, ad uwanin wada mon ditaku nan Espiritun Apu Dios ya mahapul an iwalong takuy gaga-ihon pinhod di adol taku. 13Te deket aton taku nan gaga-ihon pinhod di adol taku ya mihi-an takun Apu Dios ta inggana. Mu deket abuluton takuy baddang nan Espiritun Apu Dios ta itikod takun mangat nadah gaga-ihon pinhod di adol taku ya makitagu takun Apu Dios ta inggana 14te am-in di mangun-unud nah Espiritun Apu Dios ya diday mibilang an imbabalena. 15Ta hidiye nan bokon mo hay takut di nangdon ke ditaku te waday Espirituna ke ditaku, kinali madinol takun mangalih "Ama" ke hiya. 16Nan Espiritun Apu Dios di mangipainila an imbabale ditakun Apu Dios. 17Tedeyan imbabale ditaku mon hiya ya milak-am taku nah idat na ke Jesu Kristo. Ya deket makililigat takun Kristo te hay pangun-unudan takun hiya ya ahi taku bo makidayaw ke hiya. 18Inilak an nan punholholtapan takud uwani te hay pangun-unudan takun Jesus ya ittaittay hin iingngo nah ahi pangipadayawan Apu Dios ke ditaku. 19Ya am-in di lintun Apu Dios ya kay da uma-aptuh pangipatib-an Apu Dios hi kidayawan nadan imbabalena. 20Man-uke ya ugge naat di pinhod Apu Dios am-in nadah lintuna te impumbalina didah madadag. Adida pinhod, mu hidiyey pinhod Apu Dios. Mu takon di athidi ya waday namnama taku an 21hi udum hi algo ya am-in di lintun Apu Dios ya ahina pakiphod hantuh pangipaphodana ke ditakun tataguna an mumbalin taku nah pinhod nan pumbalinan taku. 22Inila taku an am-in di lintun Apu Dios ya nunligligat da ingganad uwani hi panpan-oddan dah ahida kiphodan. Hidiyen nunligligatan da ya umat hi punligatan di babain muntungo. 23Takon di ditakun mangulug an nangipaaliyan Apu Dios hi Espirituna ya maligligatan taku damdama. Ta hidiye nan umaptu takun madatngan nan pangipatib-an Apu Dios an ditakuy imbabalena. Kediyen tiempo ya mahannotan tun adol taku hi balun adol an adi mo mate. 24Tedeyan imbaliw ditakun Apu Dios ya wada nan namnamaon takun ahi maat. Mu inila taku an ugge ni-an naat te kon gulat nat naat ya adi taku ot mo hadhad-on, te kon mabalin bo an had-on takuy nagibbu mon naat? 25Mu gapu te madinol takun ahi taku ang-angon di kipaannungana ya anusan takun munho-ho-od ta ingganay mipaannung. 26Bokon hidiye ya abu, mu baddangan ditakuh Espiritun Apu Dios hin waday pungkudangan taku. Umat nah pundasalan taku te ugge taku inilay aton takun mundasal. Mu takon di athidi ya wada nan Espirituna an mangitakdog ke ditaku ke Apu Dios te takon di waday pinhod takun kalyon ya adi taku pakaikali. 27Ya hi Apu Dios an nanginilah wadah nomnom taku ya inilana damdama hin nganney pinhod nan Espirituna hin pun-idasalan ditaku, te nan ibaga nan Espirituna ya hidiyey pinhod Apu Dios an idat ke ditaku. 28Ya inila taku an am-in di ma-ma-at ke ditaku ya pumbalinon Apu Dios an kiphodan takun naminhod ke hiya, an pintok nan tataguna mipuun hi ninomnom nan aton. 29Handih pinghana ya inilan Apu Dios tuwali hanadan mangun-unud ke hiya ya pinilina tuwali didan miunnud nah Imbabalenay pangi-eda. Ta ditakun mangulug ya mibilang an imbabalena ta hi Jesu Kristoy kay panguluwan taku. 30Ditakuy pinilin Apu Dios an imbabalena te plinanu na tuwaliy pinhod nan pangi-e taku ot tobalon ditakun maphod. Hay manguddidin atona ya ipadayaw ditaku. 31Deket umat hidin hi Apu Dios di kon tagun ditaku ya maid moy mabalin an manadag ke ditaku. 32Hi Apu Dios ya uggena kinawwanan nan binugtung an Imbabalena ot ipaalina ot ikate nay kiphodan takun am-in. Ot namam-a mo hin mipanggep nah udum an mahapul taku te adina kawwanan an idat am-in dadiye. 33Hi Apu Dios di numpakoma hi liwat taku ot ibilang ditakun maphod, kinali maid di lebbeng di ohan tagun ena kanan di naliwat takun pinilin Apu Dios an tataguna. 34Ya athidi bon maid di mabalin an mangihi-an ke ditaku ke Apu Dios te wadah Jesu Kristo an nangikateh liwat taku ot ahi mahuwan Amana. Hi Jesus an impatag-enan mun-ap-apu ya dehdih winawwana ta hiyay mangitakdog ke ditaku. 35Takon di nganney maat ke ditaku ya adi mapoppog di impaminhod Jesu Kristo ke ditaku. Takon di maligligatan taku, mabulubulun di nomnom taku, punholholtapon ditaku te hay pangulug takun Jesu Kristo, kumudang di kanon ya bulwati taku, takon di waday katatakut hi maat ke ditaku weno patayon ditaku ya nanongnan pinhod ditakun Jesu Kristo. 36Te wada tuwali nah kalin Apu Dios di mipanggep hi punligligatan taku an kananay "Hanghanggaon mi ta nangamung di katayan mi te hay pangun-unudan min he-a Apu Dios. Te hay punnomnom di tatagun dakami ya kay kami karneron na-ala on kinlong da." 37Mu takon di athidin munligligat taku ya waday dinol taku an mangapput takuh udidina gapu ke Jesu Kristo an naminhod ke ditaku. 38Madinolak an ongal di impaminhod Apu Dios ke ditaku ya maid di mabalin an manadag kediyen pamhod nan ditaku, takon di mate taku weno matagu taku, takon nadan anghel, dimonyo ya nadan udum an adi matibon waday kandamada, takon di nganney ma-ma-at ke ditakud uwani weno hi udum an algo, 39takon di hanadan makandama ad tap-o ya ad dalom weno nganneh diyen lintuna ya maid di kabaelan dan manadag hi impaminhod na ke ditaku gapuh nigappatan takun Jesu Kristo an hi Apu taku.

will be added

X\