Romanonenge 4

1Nganney kalyon taku mipanggep nah nambalan Apu Dios ke Abraham an ammod takun Judyu? 2Gulat na ot ta imbilang Apu Dios hi Abraham an maphod te hay maphod an inainat na ya hidiye ot di iniit-ok na. Mu adi athidi te bokon hidiyey pangibilangan Apu Dios an maphod di tagu, kinali maid di ipahhiyan di tagu hi hinangngab na. 3Makulug hituwe te nitudok nah kalin Apu Dios an kananay "Kinulug Abraham di kinalin Apu Dios ot ibilang Apu Dios an maphod." 4Inila taku an nan tagun pungngunuwon ya matangdanan. Hidiyen tangdana ya adi mibilang an regalo, te binoklana. 5Mu hi Apu Dios ya hinnatkon di pangat na te hay kibaliwan takun idat na ya libli an adi e ingunuwan. Hay kitib-ana ya hay pangibilanganah gaga-ihon tagu an maphod gapuh pangulug na. 6Hituwey kialigan nan kinalin din hi David mipanggep hi pun- amlongan di tagun imbilang Apu Dios an maphod, takon di maid di maphod hi inat na ot ahi mibilang an maphod. 7Hituwey kanana, "Mun-am-amlong nadan tatagun pinakomaan Apu Dios di liwat da. Mun-am-amlong da te adina ibilang didan naliwat." 9Mu kon ditaku ya abun Judyuy mun-am-amlong gapu te nakugit taku? Adi, te takon hanadan ugge nakugit. Hay pangulug day pangibilangan Apu Dios an maphod da. Takon di hi Abraham an ammod takun Judyu ya inila taku an imbilang tuwalin Apu Dios an maphod te hay pangulug na ot ahi makugit. 11Hidiyen numpakugitanay kitib-anan nibilang an maphod gapuh pangulug nan Apu Dios handi tuwalih uggena nakugitan. Inat Apu Dios hituwe ta mibilang hi Abraham an pun-ammod am-in di tatagun nibilang an maphod te hay pangulug da, takon di uggeda nakugit. 12Ya hanada ken Judyu ya adi gapu te nakugit da ya e mo tobalon Apu Dios dida. Mu mahapul an miingngoy pangulug da hi pangulug Abraham handi tuwalih uggena nakugitan. Ta hidiye nan hi Abraham an ammod nadan Judyu ya mibilang bon amada nah pangulug da. 13Kinalin Apu Dios ke Abraham an hiya ya hanadan holag nay ahi mamoltan tuh luta ya diday pun-ap-apun am-in di tatagu. Kinalina ke Abraham hituwe gapu te hay pangulug na ot mibilang an maphod. Bokon gapu nah nipab-on Tugun Moses. 14Ta hidiye nan bokon hay pangun-unudan kediyen Tugun di pangipaannungan Apu Dios nah kinalinan atonan kiphodan taku, mu mipuun hi pangulug ke hiya, te gulat nat adi athidi ya maid moy hilbin di pangulug ke hiya, ya adi mo umannung nan kinalina te adi kabaelan di tagun mangun-unud am-in nah Tuguna. 15Hidiyen Tugun di humlun hi kakastiguwan taku te adi taku pakaun- unud. Gulat nat maid hidiyen Tugun ya maid ot di kainilaana an naliwat di tagu. Muden gapu te wadah diyen Tugun ya hidiyey kitib-anan naliwat takun am-in te adi taku pakaun-unud. 16Ta hidiye nan, hay panawatan taku nah kiphodan an malpun Apu Dios ya adi mipuun hi pangun-unudan ketuwen Tugun, mu mipuun hi kinalinan atona hi tagun waday pangulug na. Hituwey kitib-anan hay panawatan taku kediyen kiphodan ya gapuh hayudut nan ditaku. Ya bokon ya abu hanadan Judyun mangipaanhan ketuwen Tugun di hayudutana, mu takon di dahdih diye an waday pangulug na, umat ke Abraham di pangulug na. Hituwey gapunan hi Abraham ya ammod takun am-in an mangulug 17te waday nitudok an kalin Apu Dios an kananay "He-a Abraham di mibilang an pun-ammod am-in di mangulug hi kabobboble." Kinalin Apu Dios hinae te imbilang nah Abraham an ammod takun am-in an mangulug. Te hi Abraham ya nangulug ke Apu Dios an kabaelanan managuh nate ya wadaonay maid. 18Hi Abraham ya ongal di pangulug nan Apu Dios te takon di inilana an adi mabalin an muntanud da nah inayanan hi Sara, ya ongal di namnamana ot kulugona an umannung nan kinalin Apu Dios ke hiya an hiya ya mumbalin hi ammod di dakkodakkol an tataguh kabobboble. Hay kinalin Apu Dios ke hiya handi ya "Ahi dumakkodakkol di holag mu ta umat hanadah bittuwon hi kabunyan an adi mabilang." Kediyen nangalyan Apu Dios ketuwe ya dandanin hinggatut di toon Abraham ta athidi mo nan kay natey adol na ya hi ke damdama Sara ya adi pakaimbabale tuwali, mu nanongnay pangulug Abraham ke Apu Dios ot deyan immannung peman an dakol day tanud na. 20Ugge nunhalinduwan nangulug kediyen kinalin Apu Dios ke hiya te ongal di dinol nan kabaelan Apu Dios an paannungon hidiyen kinalina. Ot namam-an nahamad di pangulug na ot dayawonah Apu Dios. 22Ot gapu kediyen nahamad an pangulug Abraham ke Apu Dios ya "imbilang nah Abraham an maphod an tagu". 23Hidiyen nitudok an imbilang Apu Dios hi Abraham an maphod an tagu te hay pangulug na ya bokon hiya ya abuy nibilang te 24takon di ditaku gapuh pangulug takun hiya an nunmahun Apu takun hi Jesu Kristo. 25In-abulut Apu Dios an mateh Jesus ta boklaonay liwat taku, mu minahuwana bo ta ditakun mundinol ke Jesus ya mibilang takun maphod.

will be added

X\