1 Gapu te athidi ya wadan pangali yuy "Deket athidi ya maid moy hilbin di kinaJudyu taku ya hay nakugitan taku." 2 Mu adi athidi te dakol di hilbin di kinaJudyu taku. Hay oha ya hay nangidinolan Apu Dios ke ditaku nah kalina. 3 Takon di kananat wadaday udum an Judyun adi mangun-unud nah kalin Apu Dios ya bokon hidiyey gumapuh ena adi pangatan nah kinalina an atona te 4 hi Apu Dios ya adi munlangkak, takon di munlangkak am-in di tagu. Makulug hituwe te hanan nitudok an kalin Apu Dios ya kananay "He-a Apu Dios ya deket waday kinalim, ya nainilan umannung am-in te makulug di kalim. Ta hidiye nan gulat nat kanan di taguy nihallay inat mu ya maid di eda mahamak hi nihallaam." 5 Wadada nin hanadan makahhapit an kanan day "Ditaku ya gaga-iho taku te tagu taku, ta deket hay kinagaga-iho takuy kainilaan di kaphod Apu Dios ya adi ditaku ot mo kastiguwon ke hiya, mu deket kastiguwon ditaku ya kitib-anan hiya ya adi limpiyu." 6 Mu nihallah diyen pun-nomnom, te gulat nat athidi ya maid di lebbeng nan munhumalyah tatagu. 7 Wadan pangali yu boy "Ot deket hay kinagaga-iho takuy kitib-an di kaphod Apu Dios ya kon bokona kidayawan hidiye? Deket athidi ya tipet e ditaku kastiguwon ke hiya?" 8 Ne wadan pangali yu moy "Takon di munliwat taku ot deyan kidayawan Apu Dios hidiye." Mu kalyok ke dakayu an hanadan mangalih athidi ya makulug an kastiguwon Apu Dios dida. Wadaday udum an tatagun kanan day athituy ituttuduk, mu langkak da. 9 Gapu te Judyu taku ya pangali yu nin bo on kudukdul taku ya mayapyap-oy kastigu taku mu hanadan bokon Judyu. Mu adi athidi te kinalik ke dakayu an am-in di tagu ya naliwat, Judyu ya bokon. 10 Makulug hituwe te hay nitudok an kalin Apu Dios ya kananay "Maid di ohan tagun maphod di panibon Apu Dios ke hiya. 11 Maid di ohan tagun pakaawwatanay mipanggep ke Apu Dios ya maid di ohan tagun paka-un-unudona hiya. 12 Te am-in di tagu ya inwalong dah Apu Dios ya numbalin dan am-in hi gaga-iho. Kinali maid di tagun mangat hi maphod, takon di oha. 13 Gaga-ihoy kalkalyon da te hay tokoda ya umat nah natukaban an lubuk an makahammuy. Ya hauhaulon day ibba dan tagu. Hay kalida ya umat nah gitan di ulog an pumate. 14 Mun-idut da ya mahakit di kalida. 15 Takon di ittay di humlun ya pumate da. 16 Am-in nah pangayan da ya waday dadagon da ya waday paligligaton dah ibbadan tagu. 17 Uggeda inilay aton dat malinggop di paki-kiayan dah ibbadan tagu. 18 Ya adida tumakut an munliwat ke Apu Dios." 19 Inila taku an ditakun Judyuy nangituttuduwan Apu Dios nah Tuguna. Muden ugge taku inun-unud, ta hidiye nan adinadaman etaku kanan di maid di liwat taku te takon di ditakun Judyu ya naliwat taku an umat hanadah bokon Judyu. Kinali mahapul an abuluton taku an naliwat takun Apu Dios, ta hidiye nan gulat na ya makastigu takun am-in, Judyu ya bokon. 20 Ta hidiyey kainilaana an maid di ohan tagun ibilang Apu Dios an maphod gapuh pangun-unudana nah Tugun. Gapu te adi taku kabaelan an un-unudon am-in dadiyen Tugun ya hidiyey kitib-anan am-in taku ya naliwat taku. 21 Mu ad uwani mo ya nipainilay pangibilangan Apu Dios ke ditaku an maphod. Hituwe ya in-uh-un Moses ya handidan profetas nah intudok da. Adi mipuun nah pangun-unudan hi Tugun di pangibilangan Apu Dios ke ditaku an maphod, mu mipuun hi pangidinolan takun Jesu Kristo. Athitun am-in di pangibilang Apu Dios hanadah mangulug ke Jesu Kristo te nun- iingngon am-in di tagu. 23 Am-in taku ya nunliwat takun Apu Dios, ta hidiye nan makakuddang di kaphod taku hi panibona. 24 Mu gapu te ongal di hayudut na ke ditaku ya intud-ak nah Jesu Kristo an namoklah liwat taku ta deket mangulug takun hiya ya ibilang ditaku an maphod. 25 Intud-ak Apu Dios hi Jesus ta mate ta mapakomaan di liwat di tagu hin mangulug dan hiya. Hituwey inat Apu Dios hi pangipatib-anah kinalimpiyuna. Te takon di uggena kinastigu handidan nunliwat handi ya nanongnan hiya ya limpiyu te ingkaten Jesus di liwat di tagu. Hituwey kitib-anan maandong di pangat Apu Dios hi pangibilanganan ditakun maphod hin mangulug takun Jesus. 27 Ta hidiye nan adi taku it-ok an maphod taku gapu te hay pangipatnaan takun mangun-unud nah Tuguna, te bokon hidiyey pangipuunan Apu Dios hi pambalanan ditaku, mu hay pangidinolan takun Jesu Kristo ya abu. 29 Adiyu e kanan di abuna hanadan Judyu an ibilang Apu Dios an tataguna te ibilang nan am-in di mangulug an taguna, Judyu ya bokon, 30 te oha ya abuy Dios. Kinali takon di Judyu ya bokon ya ibilang Apu Dios an maphod hin waday pangulug dan Jesus. 31 Kon hay pinhod tuwen kalyon ya iwalong taku mo nan Tugun Apu Dios gapu te mangulug takun Jesus? Adi, te deket waday pangulug takun hiya ya namam-an paka-un-unudon takuy Tuguna.
