Romanonenge 13

1Am-in takun tatagu ya mahapul an un-unudon taku nadan ap-apuh gubilnu te hi Apu Dios di nangiabulut kediyen ngunuda ya hiyay namilin dida. 2Ta hidiye nan deket waday tagun kahing hanadah ap-apu ya kay na kinahing damdamah Apu Dios, ta hidiye nan makastiguda. 3Mu maid di gapunan etaku tumakut hanadah ap-apu taku ten un-unudon takuy tugun da. Hanada ya abun adi mangun-unud hi tugun di tumakut. Ta hidiye nan mangun-unud taku ya hay maphod di aton taku ta tobalon ditakun dida. 4Un-unudon yu dida te diday muttatyun Apu Dios an mangingunuh kiphodan yu. Mu deket aton yuy gaga-iho, hidiyey takutan yu te indat Apu Dios di kalebbengan dan mangastiguh tatagun gaga-iho. 5Ta hidiye nan mahapul an un-unudon taku dida, adi gapu te tumakut takuh pangastiguwan dan ditaku, mu gapu te inila taku an hidiyey mahapul an aton ta malinggop di nomnom. 6Hituwey gapunan mahapul an mumbayad takuh buwis hanadah ap-apu te hituwey ohan impangunun Apu Dios ke dida. 7Kinali bayadan takun am-in di kalyon dan bayadan ya un-unudon taku dida ya adi taku ngohayon dida. 8Deket waday inutang yu ya bayadan yu ta maid di eyu nomnomnomon. Mu hay ot kay taku pun-uuttangan ya hay punhimpopohhodan takun am-in. Te nan tagun pohdonay ibbanan tagu ya inun-unud nan am-in nan Tugun an dinawat Moses ke Apu Dios. 9Te am-in datuwen tugun an kananay adiyu ihuyop di bokon yu inayan, adi kayu pumate, adi kayu mangako, adi kayu umamoh wadah ibbayuh tagu ya takon nadan udum an tuguna ya niohha dan am-in nah tugun Apu Dios an kananay pohdon yuy ibba yun tagu umat hi impaminhod yuh adol yu. 10Hanan tagun waday pamhod nah ibba nan tagu ya adina aton di gaga- ihoh ibbana. Hidiye nan hay paminhod hi ibban tagu ya mumbalin hi pangun-unudan am-in nah Tugun Apu Dios. 11Bokon hidiye ya abuy aton taku, te inila takun mahapul an aton takuy kabaelan takun mangun-unud ke Apu Dios te nakatang moy pangingunuwan taku nah ipangununa. Te gagala mon madatngan di kibaliwan takun adi umat handih lappunah nangulugan taku. Kinali mahapul an adi taku palpal-iwan an umat nah tagun makahigga an mahmahhuyop takon di dakol di mingunu. 12Te maid uhup ya mibangngad hi Kristo an mangibaliw ke ditakun tataguna. Kay munhihhilong ad uwani te dakol di gaga-ihon ma-ma-at tuh luta, mu gagala ya kay mabigat te ahi mibangngad hi Kristo. Ta hidiye nan mahapul an iwalong takun am-in di punliwatan ya ihamad takuy pangulug taku ya aton takuy maphod ta midadaan takun makihanggan Satanas an umat hi pundadaanan di tindalun e makigubat. 13Mahapul an maphod di aton taku umat hi aton di tagun napat-alan, ta iwalong taku mo nadan gaga-iho. Adi taku halman di pun-inum ya adi taku mumbutong. Ditaku ken linalaki ya adi taku makibabai ya athidi bon dakayun binabai an adi kayu makilalaki. Adi taku muntututut ya adi taku amowan di ibba takun tagu. 14Mu hay maphod ya iingngo takuy pangi-e taku ke Apu takun hi Jesu Kristo. Ya adi taku un-unudon di gaga-ihon pinhod di adol taku.

will be added

X\