Romanonenge 10

1Kaibaiba, idasadasalak nadan iibbak an Judyu te pinhod ku ot anhan an ibaliw Apu Dios dida. 2Inilak an pinhod dan abun mangun-unud ke Apu Dios, mu mibanahho te makudang di inila dah mipanggep ke hiya. 3Man-uke ya adida pinhod an awatan di ine-en di pangibilangan Apu Dios an maphod di tagu. Te hay pangidinolan dan mibilang an maphod ya hay pangun-unudan da nah Tugun Moses an bokon hi hayudut Apu Dios. 4Nihallah diyen punnomnom da te pinoppog Kristoy pangidinolan kediyen Tugun ta hiyay pangidinolan takuh katbalan takun Apu Dios. 5Hi Moses ya impatibonan makahhapul an un-unudon am-in di Tugun Apu Dios hin hidiyey pambalanan ditaku te kananay "Hay tagun paka- un-unudonay Tugun Apu Dios ya hiyay manawat hi mikadwan biyag an malpun hiya." 6Athidi, mu kon ipapilit Apu Dios an aton taku nadan adi taku kabaelan ta ahi ditaku ibilang an maphod ta mibaliw taku? Adi, te hay kipuunan di pangibilangana hi tagun maphod ya hay pangulug na. Hituwe ya miunnud nah nitudok an kananay "Adi mahapul an ume kayuh langit weno ad dalom an e mangikuyug ke Kristo tuh luta ta ahi kayu mibaliw." Adi athitu te hay kibaliwan ya hay pangidinolan ke Jesu Kristo. 8Hay impainilan Apu Dios an mahapul ya hay pangihamadan takuh pangulug takun Kristo an hinae nan emi itanuttudu. Wada boy impitudok Apu Dios an kananay "Adi naligat an maawatan nan pinhod Apu Dios an inilaon taku mipanggep hi pangulug ke hiya te am-in taku ya mabalin an nomnomon taku ya punhuhummanganan takuh diye." 9Deket kalkalyon takuh ibba taku an abuluton takun Apu takuh Jesus ya nahamad di pangulug taku an minahuwan Apu Dios ya mibaliw taku. 10Te hay kibaliwan di tagu ya mipuun hi pangidinolanan Jesu Kristo, te hanan tagun mangulug ke hiya an ipainila nay nangulugana ya hiyay tobalon Apu Dios an maphod. Hidiyen tagu ya mibaliw. 11Makulug hituwe te waday impitudok Apu Dios an kananay "Hanan tagun mangidinol ke Kristo ya adi muntutuyuh ena nangidinolan ke hiya te ahi mibaliw." 12Am-in di tagun mangulug ya nigappat ke naen kibaliwan te maid di kituppugana, Judyu ya bokon te hi Apu Dios ya Ap-apu da. Kinali takon di dahdih diyen tagun mumbagah baddang ke hiya ya homkona. 13Makulug hituwe te waday impitudok Apu Dios an kananay "Am-in di mumbagah baddang an kananay `Apu, ibaliwak' ya mibaliw." 14Mu nganney aton dan mangibagan Jesu Kristo an ibaliw na dida hin adida mangulug ke hiya? Ya nganney aton dan mangulug ke hiya hin maid di eda dingdingol hi mipanggep ke hiya? Ya nganney aton dan mangngol hin maid di e mangituttudun dida? 15Kinali mahapul an wadaday mangulug an mitud-ak an e muntuttudu. Hituwey kialigan nan impitudok Apu Dios an kananay "Maan-anla nadan tatagun datngan nadan mangipainilah maphod an mituttudu an kiphodan di tatagu." 16Mu adi am-in nadan nangngol kediyen nituttudu ya nangulug da. Makulug hituwe te kinalin Isaiah ke Apu Dios di "Apu, o-oha day mangulug hi ituttudu mi." 17Hay pangulugan di tagu ya mahapul an donglon day mituttudu mipanggep ke Kristo, kinali mahapul an waday umen e muntuttudun dida. 18Mu hanadan Judyu an ugge nangulug ya maid di pangigadulan da an uggeda dingngol hidiyen nituttudu te nitudok nah kalin Apu Dios an kananay "Hay mipanggep ke Apu Dios ya nundingngol am-in hi kabobboble tuh luta." 19Adinadaman ugge naawatan nadan Judyu handin intuttudun Moses handih namoh-olan Apu Dios ke dida hi uggeda nangun-unudan ke Apu Dios. Te kinalin Moses ke dida nan kinalin Apu Dios ke hiya an kananay "Homkok nadan udum an tatagun bokon Judyu an dida nan adiyu ibilang an tagu. Pinihupihul yu dida te uggeda inilay mipanggep ke ha-on, mu ahi kayu bumobboh-ol te hay amoyuh pangipaptok kun dida." 20Hi ke damdama Isaiah ya ugge timmakut an nangipainila nah impaabig Apu Dios ke hiya an kananay "Ha-oy an Dios ya numpainilaak hanadah tatagun ugge nunnomnom ke ha-on handih pinghana, te handi ni- an ya man-u te adiyak ibilang, mu ad uwani ya inilaak mo ke dida." 21Hidiyen kinalin Isaiah ya mipanggep hanadah bokon Judyu. Mu hituwe damdamay kanana hanadah Judyu "Takon anhan di anal-alukok dida ta abuluton day impaminhod kun dida ya kapyanan adi da, mu namam-a ot ya abuy ngohe dan ha-on."

will be added

X\