Apocalipsis 22

1Intuddun bon nan anghel ke ha-on on wangwang an kalpuwan nan danum an umidat hi biyag an kay crystal te makallin-ong. Hidiyen wangwang ya nalpu nah inumbunan Apu Dios ya nan kanan dan Impan di Karnero ot 2mundalan nah gawwan nan boble. Hanah numbinah-el an pingngit di wangwang ya nunha-ob di kaiw an kalpuwan di biyag. Kabulabulan on bumunga dadiyen kaiw ta maminhimpulut duwan bumunga hi ohan toon. Hanan tubuna ya pun-agan di tatagu. 3Maid di gaga-ihon diyen boble te hidiy pun-ap-apuwan Apu Dios ya nan kanan dan Impan di Karnero ya hiyay ahi dayawon am-in di muttatyuna. 4Ahida tibon di angana ya mimalkay ngadanah tuktuk da. 5Hidiyen boble ya adi humilong te hi Apu Dios di mamat-al, kinali adi mahapul di algo weno dilag. Ya hanadan muttatyuna ya makiap-apu da ta inggana. 6Ya kanan nan anghel ke ha-oy di "Hi Apu Dios an hi Apu takuy nangipakali hanadah profetas ya hiyay nangitud-ak ke ha-on an mangipainila hanadah muttatyuna nah gagalan maat. Am-in datuwe ya makulug ya pundinolan." 7Kimmalih Jesus an kananay "Donglon yu tun kalyok ke dakayu te nakatang mo ya umaliyak. Am-in da nan mangulug ketuwen nitudok tuh liblu ya mun-am-amlong da." 8Ha-oy an hi Juan ya dingngol ku ya tinibok am-in datuwe. Handih nangngolak ya nanib-ak am-in ke datuwe ya nundukkunak hi hinangngab nan anghel an nangipainilan datuwen ha-on ta dayawok. 9Mu kananay "Adiyak dayawon te nun-ingngo ta an muttatyu ditan Apu Dios, umat hanadan ibba takun profetas ya am-in nadan mangulug hi kalin Apu Dios an nitudok ketuwen liblu. Hi Apu Dios di dayawom." 10Ot kanana boy "Adiyu italu tun nitudok tuh liblu te nih-up moy tiempon umannungan am-in datuwe. 11Hanadan gaga-ihoy at-atton da ya hidiyey at-atton dat inggana. Ya hanada ken maphod di at-atton da ya maphod di at-atton dat inggana." 12Kimmalih Jesus ot kananay "Donglon yu tun kalyok ke dakayu te gagala mo ya umaliyak. Ialik di gun-udon yu mipuun hi in-innat yuh luta. 13Ha-oy ya wadaak tuwali ot ahi mawadan am-in ya wadaak ta inggana. Ha-oy di kalpuwan di am-in ya ha-oy di poppog di am-in. 14Mun-am-amlong da nan mangat hi maphod te kalebbengan dan midatan hi maphod an nitaguwan an maid di poppog na ya waday kalebbengan dan humgop nah hoob nan boble. 15Mu hanadan tatagun humauhaul, mangat hi ayak, ihuyop day bokon da inayan, pimmatepate, daydayawon day adi makulug an dios, makallangkak hi kali ya pangat ya adida makiha-ad nah boble. 16Ha-oy an hi Jesus di nangitud-ak nah anghel ke dakayu hanadah simbaan an e mangipainila mipanggep ke ha-on. Ha-oy di ohan tanud David ya ha-oy nan kanan dan talo nah mungkabigat an makahhiyo." 17Kanan hanan Espiritun Apu Dios ya nan inayan nan Impan di Karneroy "Makayu." Am-in da nan mangngol ketuwen kalin Apu Dios ya mahapul damdaman ayagan da nadan udum an kanan day "Makayu. Makayun nungkauwo. Abuluton yu tun maid di bayad nan danum an umidat hi biyag an maid di poppog na." 18Ha-oy an hi Juan di nangitudok ke datuwen am-in. Kalyok ke dakayu an hay tagun udmana tun nitudok tuh liblu ya udman Apu Dios di ligat nan umat hi ligat an nakalkali tuh liblu. 19Ya hay tagu an kudangana tun nitudok tuh liblu ya adi idat Apu Dios di bingay na nah kaiw an kalpuwan di biyag ya nan bingay na nah boblen nakali tuh liblu. 20Hi Jesus an nangipainilan makulug am-in tun nitudok tuh liblu ya kananay "Gagala mo ya umaliyak." Ot kanak di "Maphod hin umali ka. Umali ka mo Apu Jesus." 21Hana ot ta hayudutan dakayun Apu takun hi Jesus. Amen.

will be added

X\