Apocalipsis 12

1Indai ya waday numpatibod kabunyan an umipamodwong. Hay ang-ang na ya babain kay numbulwatih algo an humihhili. Kay timmaddog hi bulan ya kay hanan inipngot nah ulunay himpulut duwan bittuwon. 2Himmiga an gagala mo ya muntungo ya pumalapalak hi hakit na. 3Indai ya tinibok ad kabunyan di oha bon umipamodwong. Hay ang-ang na ya ongal an dragon. Maingit ya pituy ulunan napngotan hi balituk ya himpuluy hakgud na. 4Hinigid di iwit nay dandani kagodwa hanadah bittuwon ad kabunyan ot mag-a dah luta. Tumataddog nah kad-an diyen babai ta kanona nan golang hin mitungo. 5Nuntungo nan babai ya lalaki nan intungo na an hiyay ahi mun-ap-apuh am-in hi boble an maid di pakaapput ke hiya ya mahapul an hiyay maunud. Kal-inadi ya impaalan Apu Dios nan golang hidih langit hi kad-ana ot ugge kinan nan dragon. 6Binumtik nan babai ot e miha-ad nah adi maboblayan an indadaan Apu Dios hi kipaptokanah hinlibu ta duway gatut ta nan-om an algo. 7Indani ya tinibok bon waday gubat hi langit. Hi Miguel an ap-apun di anghel ya nadan anghel na ya nakigubat da nah dragon ya nadan anghel na. 8Naapput nan dragon ya nadan anghel na. Kinali adinadaman eda mo miha-ad hidih langit 9ot ogahon da didah luta. Hituwen dragon ya hidiye nan ulog handi an kanan dan dimonyo ya Satanas an humahhaul hi tatagu tuh luta. 10Indani ya waday dingngol kuh nal-ot an kalih did kabunyan an kananay "Nadatngan moy pangibaliwan Apu Dios ke ditaku. Impatibonay ongal an kandamanan mun-ap-apu. Ya impatibon damdaman nan Kristo an mangipaptok hi tatagu an waday kalebbengana te naapput mo hi Satanas an dakol di oggana ipabahul hanadah ibba takun mangulug hi hinangngab Apu Dios. 11Dadiyen ibba taku ya inapput dah Satanas te gapuh dalan nan kanan dan Impan di Karnero dih natayana ya gapuh nangipainilaan dah kalin Apu Dios takon di hidiyey lummuh katayan da. 12Kinali mun-am-amlong kayun wadah langit, mu dakayun wadah luta ya mahmok kayu te dehnah Satanas an nahalman di bungot na te inila nan gagala ya mapoppog moy pangatana nah pinhod na." 13Handih imama-uwan nan dragon an nag-ah luta ya ena nunhamak nan babain nangitungo nah lalaki. 14Mu nan babai ya nidatan hi duwan payak an umat hi payak di ongal an hamuti ta damanan tumayyap nah adi maboblayan ta mipaptok hidi hi tuluy toon ta kagodwa ta maid di aton nan dragon an mangakhup ke hiya. 15Pumbughakan nan dragon nan babai hi dakol an danum ta pangalinat mianud. 16Mu kay bimmaddang di luta nah babai te natom-ang ot mundaga nan dakol an danum. 17Namahig di boh-ol nan dragon nah babai ot ena gubaton nadan tanud nan babai an dadiye nan mangun-unud hi tugun Apu Dios ya nan intuttudun Jesus. 18Imme nan dragon nah pingngit di baybay.

will be added

X\