Apocalipsis 11

1Nidat ke ha-oy on puntopong ya wada on nangalin ha-on an kananay "Ekat em topngon nan templo ya nan altar nah bohongna ya uyapom hanadan tatagun mundayaw ke Apu Dios. 2Mu adim topngon di dolan nan templo te hidiyey midat hanadah bokon tatagun Apu Dios an dida nan mangat hi kumpulnan gaga-iho kediyen boblen Jerusalem hi nap-at ta duway bulan." 3Kanana boy "Ahik itud-ak nadan duwan tagun numbulwatih langgote an hinlibu ta duway gatut ta nan-om di algoy pangipainilaan da nah impainilak ke didan ahi maat." 4Dadiyen duwan taguy mialig nah duwan kaiw an oliba ya nan duwan pangipattukan hi dilag an wadah hinangngab Apu Dios an Apun am-in hi luta. 5Deket waday mangipatnan mangat hi gaga-ihon dida ya waday bumudduh apuy hi tokoda ta hidiyey pamate da. 6Waday kabaelan dan mangipatikod hi udan, kinali hantuh ahida pangipainilaan nah impainilan Apu Dios ke dida ya adi umudan. Kabaelan da bon pumbalinon di danum hi dala ya diday nangamung an mangipaalih kumpulnan ligat hituh luta hi kumpulnan tiempo. 7Deket magibbun ipainila da nan impainilan Apu Dios ya bumuddu mo nan katatakut an aggayam an malpun nah bitun maid poppog di kadinalom na, ta makipatten dida ingganay patayona didan duwa. 8Ahi mihaad di adol da nah gawwan di kalata nah nundingngol an boblen nipatakan din Apu takuh krus. Hidiyen boble an ahida katayan ya hidiye nan ingadanan dah Sodom ya Egypt. 9Ahi waday tatagun nunhihinnatkon di bobleda, hay nahlagan da, hay kalida ya hay nitaguwan da an ahida punhin-aang-angan di adol dadiyen nate hi tulun algo ta kagodwa ya iadida didan e milubuk. 10Ahida mun-am-amlong am-in di tataguh natayan dadiyen duwan tagu te diday nangialih nahalman an ligat tuh luta. Ta hidiye nan mumpipiyesta da ya munhin-iiddatan dah kumpulmin wadan dida. 11Mu mala-uy tulun algo ta kagodwa ya ahi mahuwan Apu Dios dida ta hanadan tatagun manibon dida ya tumattakut da. 12Dadiyen duwan namahuwan ya waday ahida donglon hi langit an kananay "Umali kayuh tu." Ya hanadan buhul da ya ahida ang-angon didan wada nah kulabut an mange dah langit. 13Kediyen tiempo ya ahi kumolyog hi nal-ot. Mapa-iy pangngel diyen boble ta mate day pituy libun tatagu. Ahida tumattakut di udum an tatagu ta dayawon da moppeh Apu Dios hi langit te hay kandamana. 14Hituwey mikadwan katatakut an ahi maat an punligligatan di tatagu. Ya magibbuh tuwe ya waday mikatlu. 15Impagangon nan mikapitun anghel di tangguyub na ya wadaday mungkalih nal-ot hi langit an kanan day "Am-in mo tuh luta ya hi Apu Dios ya hi Kristoy mun-ap-apu ta nangamung." 16Ya hanadan duway pulut opat an aap-apun inumbun nadah ubunan di ap-apuh hinangngab Apu Dios ya nundukkun dan mundayaw ke hiya ot 17kanan day "Apu Dios an wada tuwali handi ya wada ta inggana, makandama ka. Mumpasalamat kami te inlappum an mun-ap-apu an impatibom di kandamam. 18Bumobboh-ol day adi mangulug te ad uwaniy nadatngan di pangipatib-am hi boh-ol mu. Ad uwaniy punhumalyaam hanadah nate ya pangidatam hi gun-udon nadan profetas an muttatyum ya nadah mangulug ke he-a, takon di nganney katatagu da. Ad uwani boy pangastiguwam am-in hanadah tatagun mangmangngat hi gaga-iho tuh luta." 19Hay templon Apu Dios hi langit ya nibughul ya matibo nan niha-adan nan nitudokan di kalin hinamad Apu Dios. Indani ya mungkikil-at, mungkikidul ya waday mumbungug ya mungkolyog ya nahalman di dalalu.

will be added

X\