Apocalipsis 10

1Indani ya tinibok boy ohan nal-ot an anghel an nalpuh langit. Kay numbulwatih kulabut ya waday at-atibungalon hi uluna. Hay angana ya kay algo ya hay hukina ya kay tukud an mundadalang. 2Waday inodnanah nabokyag an papel. Inggattinay wawwan an hukina nah baybay ya nan iggid nah luta. 3Inlot nay kalina ya kay olmom di layon. Nagibbun kimmali ya himmumang di kidul hi naminpitu. 4Ek ot itudok ya waday kimmalid kabunyan an kananay "Adim ipainila nan kinalin nan kidul ya adim itudok." 5Ya nan anghel an tinibok an muntattaddog an inggatinay ohan hukina nah baybay ya nah lutay oha ya intagge nay takle nad kabunyan 6ot munsapata ke Apu Dios an wada ta inggana, an lintunay luta, kabunyan, baybay ya am-in nan wadah di, ot kananay "Gagala mo. 7Hantuh pangipagangowan nan anghel hi tangguyub na ya maat mo nan impainilan Apu Dios handidah profetas na ya abu." 8Indai bo ya mungkalin ha-on nan wadad langit an kananay "Ume kat em alan nan papel an inodnan nan anghel an inggattinay ohan huki nah baybay ya nah lutay oha." 9Immeyak ot kalyok di alak nan papel an inodnana ya kananan ha-oy di "Alam ta kanom. Munlumiiy tamtam na an kay danum di iyyukan, mu hi putum ya mun-antam." 10Inalak ot kanok ya makalummii an kay danum di iyyukan, mu inukmun ku ya mun-antam hi putuk. 11Ya kanana boy "Mahapul an em kalyon tun kinalin Apu Dios mipanggep hanadah ap-apu ya nadah tatagun nunhihinnatkon di boble da ya nunhihinnatkon di nitaguwan da ya kalida."

will be added

X\