1 Hituwen tudok ya nalpun Timothy an ibba taku ya ha-on an hi Pablo an dehtun nikalabut gapuh pangitanuttuduwak mipanggep ke Jesu Kristo. Muntudok kamin he-a Pilimon an napateg an gayyum mi ya ibba min muntuttudu 2 ya hanadah ibba takun mangulug an oggan maamung hi baleyu ya ke Apiya an ibba takun babai ya hi Alkipus an ibba takun tindalun Jesu Kristo. 3 Hana ot ta hi Ama takun hi Apu Dios ya hi Apu takun hi Jesu Kristo ya munnananong di hayudut dan dakayu ya palinggopon dakayu. 4 Am-in nah pundasalak ya adik kal-iwan an mumpasalamat ke Apu Dios gapun he-an iba Pilimon 5 te dingngol kuy mipanggep hi kahamad di pangulug ya pamhod mun Apu takun hi Jesus ya hay pamhod mu hanadah ibba takun tatagun Apu Dios. 6 Ya idasadasal ku bo an gapuh pangulug takun am-in ya inilaon taku nan dakol an kiphodan takun mangulug ke Kristo. 7 Nan nahamad an pamhod mun iba ya nan pangipaamlongam hanadah ibba takun tatagun Apu Dios di nangipaamlong ke ha-oy ya nangipakodhol hi nomnom ku. 8 Hay gapunan gulat na ya ipapilit kuy pinhod kun atom ya hay nunhintulangan ta gapuh nigappatan ta ke Kristo, 9 mu adik pinhod an iathidi. Man-uke ya inilak an nahamad di pamhod muh ibbam. Oha bo ya deyan naam-amaak ya dehtuwak tuh kalabut gapuh pangun-unudak ke Jesu Kristo. 10 Hay pinhod kun ibaga anhan ke he-a ya ulayam nan himbut mun hi Onesimus an binumtik ni-an. Te hiya ya ibilang kun imbabalek te handih nangaliyanah tuh kalabut ya tinanuttuduwak ot deyan mangulug mo ke Jesu Kristo. 11 Inilak an kediye ya maid di hilbinan he-a, mu maphod ta ad uwani ya numbaliw ta damanan bumaddang ke ditan duwa. 12 Pumbangngadok hi kad-am, takon di naligat ke ha-on te ongal di naminhod kun hiya. 13 Dehtuwak hi kalabut te hay nangituttuduwak hi mipanggep ke Jesu Kristo, kinali pinhod ku ot an makiha-ad ke ha-on ta baddanganak ta kay ka wadah tun bumaddang ke ha-on. 14 Mu nangamung ka te adik pinhod an piliton dakan bumaddang ke ha-oy te kudukdul nay he-ay kon nomnom. 15 Man-uke nin ta tinaynan daka ni-an ke Onesimus ya wadan deket mibangngad ya makiha-ad ke he-a ta inggana. 16 Ad uwani ya bokon mo ya abu himbut di pangibilang mun hiya, mu ibilang mun tulang. Pakappinhod ku hiya, mu namam-an he-a an kon himbut ke hiya. Bokon mu ya abu himbut, mu napateg an tulang mu mo gapuh nangulugana ke Apu Jesu Kristo an umat ke dita. 17 Kinali deket ibilangak an tulang mu ya abulutom hi Onesimus umat hi pangabulutam ke ha-on. 18 Ya deket waday inat nan he-ah ad-adi weno waday utang na ya ha-oy di mamayad. 19 Ot deyan ha-oy an hi Pabloy mangitudok an abulutok an ha-oy di mamayad hin waday utang na, mu adik pinhod an ipanomnom an he-a ya kay waday utang mun ha-on te ha-oy di nanuttudu ke he-a ot ahim inilaon di atom an midatan hi biyag an maid di poppog na. 20 Kinali ibagak ahan ke he-a tulang ku, an gapuh nigappatan tan Apu Kristo ya atom danaen kinalik ta paamlongonak. 21 Madinolak an un-unudom danaen ibagak ke he-a, ya inilak an mamam-ay pamhod mun hiya mu nan ibagak ke he-an atom. 22 Deket abuluton Apu Dios di dasal yu ta mipaeyak ya mangin-a-aliyak an manibon dakayu. Kinali deyan pamanguluwok an kalyon ke he-a ta deket mabalin ya idadaan yuy kiha-adak hi baleyu. 23 Hi Epaphras an dehtu damdaman tuh kalabut gapuh pangitanuttuduwanah mipanggep ke Jesu Kristo ya kananay nonomnomon dakayun hiya. 24 Ya athidi damdamay kinalin nadan ibbak an mungngunuh tu an da Marcos, hi Alistalkus, hi Demas ya hi Lucas. 25 Hana ot ta hayudutan ditakun Apu Jesu Kristo.
