Filipenses 1

1Hituwen tudok ya nalpun dakamin muttatyun Jesu Kristo an hi Pablo ya hi Timothy. Muntudok kamin dakayun am-in an mangulug ke Jesu Kristo hinad Philippi ya takon di dakayun mangipangpangulu ya dakayun bumadbaddang hanadah mangulug. 2Hana ot ta munnananong an wadan ditakuy hayudut ya linggop an malpu ke da Apu Dios an hi Ama taku ya hi Apu takun hi Jesu Kristo. 3Deket ninomnom dakayun ha-oy on numpasalamatak ke Apu Dios 4ya am-in nah pundasalak ya maka-am-amlongak hi pangidasalak ke dakayu, 5te ongal di imbaddang yun ha-on hi nipainilaan nan mipanggep ke Jesus nipalpu handih nangulugan yu ingganad uwani. 6Ya madinolak an hi Apu Dios an bimmaddang hi nangulugan yu ya itultuluy nat nangamung an mangipaphod hi niatan yun hiya ta inggana hantuh kibangngadan Apu takun hi Jesu Kristo. 7Athituy punnomnom ku te ongal di impaminhod kun dakayu ya nilak-am kayuh homok Apu Dios ke ha-on. Handih ek nangitanuttuduwan ya nangitakdogan nah tuttudun Kristo ya dakayuy namaddang ke ha-on. Ya deyan ingganad uwanin wadaak tuh kalabut ya nanongnay ongngal an homok yun ha-on. 8Inilan Apu Dios an uma-aptuwak an manibon dakayu te ongal di naminhod kun dakayu an nalpun Jesu Kristo. 9Ta hidiye nan idasadasal kun Apu Dios ta mihamad di punhimpopohhodan yu ya, ta umong-ongal di inila yu mipanggep ke hiya ya umong-ongal di kabaelan yun mun-awat hi pangi-ena 10ta inilaon yuy makaphod an pangi-e ta maid di akhupan Jesu Kristoh liwat yu hantuh pumbangngadana. 11Ya hana ot ta baddangan dakayun Jesu Kristo ta am-in di aton yu ya maphod ta kidayawan Apu Dios. 12Dakayun kaibaiba, pinhod kun inilaon yu an tun ma-ma-at ke ha-on ya maphod di numbalinana. Te gapu tuh nikalabutak ya namam-an nihinap nan tuttudun Apu takun hi Jesu Kristo. 13Te am-in da tun tataguh tu an takon hantudan mungguwalyan ha-oy ya ininnila da an nikalabutak te hay ek pangitanuttuduwan hi mipanggep ke Kristo. 14Ya gapuh nikalabutak ya dakol hanadah ibba takuy nihamad di pangulug da ke Apu taku ta maid di takut dan e mangipainilah kalin Apu Dios. 15Man-u te om, wadaday udum an e mangituttuduh mipanggep ke Jesu Kristo gapuh amo dan ha-on te pinhod dan diday makalin muntuttudu. Mu wadada peman nan udum an ihapot dan e muntuttudu 16gapuh impaminhod dan ha-on te inila da an piniliyak ke Apu Dios an mangitakdog nah mituttudu mipanggep ke Jesu Kristo. 17Mu hanadan udum an maka-amon muntuttudu mipanggep ke Kristo ya ad-adiy wadah nomnom da te pinhod dan mam-ahon di ligat ku tuh baludan. 18Mu takon di athidi day udum ya mun-an-anlaak damdama te hay importante ke ha-oy ya hay kipainilaan nan mituttudu mipanggep ke Kristo, takon di maphod weno ad-adiy wadah nomnom nadan udum an muntuttudu. 19Ya nanongnan maan-anlaak te inilak an gapuh pangidasadasalan yun ha-oy ya gapuh baddang nan Espiritun Jesu Kristo ya mipaeyak. 20Hay ahan pinhod ku ya namnamaok an adik ibain an mangat nah ngunuk, namam-ad uwanin tiempo, mu ta wada ot di tulid kun mangat nah kidayawan Jesu Kristo, takon di hidiyey lummuh katayak. 21Te ha-oy ke ya ad uwanin mataguwak ya hay kidayawan Kristoy pinhod kun aton, mu deke bot mateyak ya namam-an mun-am-amlongak te umeyak hi kad-ana. 22Mu deket madukdukey biyag ku ta dakdakol di maat ku ketuwen ngunun nidinol ke ha-oy ya uggek inila mo hin nganney kudkudukdul, mateyak weno mataguwak. 23Uggek inila hin nganney mapmaphod ke dadiyen duwa, mu pakappinhod kun umeh kad-an Kristo te hidiyey kapkaphodan. 24Mu gapuh punnomnom kun dakayu ya kudukdul nay mataguwak ni-an ta waday atok an bumaddang ke dakayu. 25Ta hidiye nan inilak an adiyak ni-an mate ta mabalin an umaliyak hi kad-an yu ta baddangan dakayu ta mihamhamad di pangulug yun Jesu Kristo ta umong-ongal di pun-amlongan yu. 26Ta wadan am-in kayuh na ya mamam-ay amlong yuh pundayawan yun Jesus Kristo hin mibangngadak hina. 27Takon di nganney maat ke ha-on, halipat-an yu ta nangamung an mangun-unud nah tuttudun Kristo an kiphodan taku. Ta takon di umaliyak an manibon dakayu weno adiyak ya maphod di donglok mipanggep ke dakayu an mun-uunnud kayun am-in an mangitakdog kediyen mituttudu mipanggep ke Jesu Kristo an kinulug taku. 28Adi kayu tumakut hanadah humihhingit ke dakayu ta panginilaan dan maapput da an diday makastigu ta mihi-an dan Apu Dios ta inggana ya dakayuy pangapputon Apu Dios hi pangibaliwanan dakayu te maid di udum hi mangibaliw ke dakayu hin bokon hiya ya abu. 29Adi kayu tumakut, te hay namiliyan Apu Dios ke dakayu ya bokon ya abu hay pangulugan yun Kristo, mu munligat kayu te hay pangun-unudan yun hiya. 30Ta hidiye nan am-in taku ya makihangga taku nah buhul Apu Dios. Tinibo yun namahig di nunligaligatak handi gapun hiya ya takon ad uwani ya nanong nan makihananggaak hanadah bubuhul na.

will be added

X\