Mateo 20

1Nun-ab-abig hi Jesus an kananay "Hay kialigan di pun-ap-apuwan Apu Dios ya nan tagun waday laguntana an himmalaman an e maniboh mungngunuh di. 2Ya wadaday hinamak na ot ihuhummangan day tangdanon di ohan taguh ohan algo ot pungngunuwona dida. 3Nunggaway algo ot umeh malkadu nan tagu ya wadada boy tatagun maid di at-atton da. 4Ot kananan diday `Ume kayu ta ekayu mungngunuh laguntak ta tangdanan dakayuh ustu.' 5Ot ume da nan tatagun e nungngunu. Indait maal-algo ya wadada boy inayaganan mungngunu. Athidi bo dih nahimbatangan. 6Mungkahilong ot ume bo nah malkadu ya wadada boy tinibo nah tatagun muntattaddog ot kananan diday `Tipet pakawaon yuy ohan algo?' 7Ya kanan dan hiyay `Maid di mangayag ke dakamih emi pungngunuwan.' Ot kananan diday `Deket athina ne makayu ta ekayu mungngunuh laguntak.' 8Nahilong mon diye ya impaayag nan kon lagunta nan mumpaptok hi laguntana ot kananay `Ayagam nadan mungngunu ta idat muy tangdan da. Pamanguluwom an idat di tangdan nadan nanguddidin nungngunu ta ahim idat di tangdan nadan namangulu.' 9Immali da nan nanguddidin nungngunu ot idat nay himpipihu an hidiyey tangdan dah hin-algo. 10Immali da nan namangulun nungngunu ya kanan da pe on ong-ongal di tangdan da, mu adi te hin-oh-an pihu damdama. 11Indai ya mundiklamu da an kanan day 12`Hanadan nanguddidi ya hin-olas ya abuy nungngunuwan da ya dakami ke ya inlappu mih biggatna ta napopotangan kami ya antipet nun-iingngoy tangdan mi?' 13Mu kanan nan kon lagunta nah oha ke diday `Ibak, ugge dakayu dinalogat te hidiyey inhuhummangan takun tangdan yuh hin-algo. 14Alan yu ot ya abu ta umanamut kayu. Nangamungak hin kanak di iingngok di tangdan nadan nanguddidi nah tangdan yun namangulu. 15Nangamungak hi pangiatak hi pihhuk. Kon umamo kayu te himmok ku dida?'" 16Ot kanan bon Jesus di "Athinay ahi maat hi udum hi algo an nadan tatagun nakababba ad uwani ya diday ahi mibilang an natag-e, ya nadan mibilang an natag-e ad uwani ya diday ahi nakababba.'' 17Handih mange da Jesus ad Jerusalem ya inayagana nadan disipulosna ot handih ab-abbu da ya kananan diday 18"Deyan ume takud Jerusalem an ahik kadpapan an Panguluwan di tagu ta mieyak hi kad-an di ap-apun di padi ya hanadah muntuttuduh Tugun Moses. Kalyon day mahapul an mateyak 19ya ipaboltanak hanadah bokon Judyu ta diday mamaten ha-on. Ahiyak taltalanggaan ya punhoplat ne ahiyak impatak hi krus ta mateyak, mu hi mikatlun algo ya mamahuwanak." 20Hanan inayan Sebedi an ibbana nadan duwan imbabalena ya imme dah kad-an Jesus ot mundukkun an kananay "Wada anhan di ibagak ke he-a." 21Kanan Jesus di "Nganneh diye?" Kananay "Ahim anhan pab-unon tun duwan imbabalek hi winawwan mu ya hi iniggid mu hantuh pun-ap-apuwam." 22Mu kanan Jesus di "Uggeyu kattog inilay pun-ibaga yu. An pakaippol kayun munholtap hi ahik holholtapon?" Ya kanan dan hiyay "Pakaippol kami." 23Ot kanana bon diday "Makulug an ahi kayu munholholtap umat hi punholholtapak, mu hay ke ahi makib-un ke ha-on ya bokonak an mamili, mu hi Aman hi Apu Dios di ahi mangipab-un hanadah pinilina tuwali." 24Dingngol nadan himpulun disipulos hidiye ya bumobboh-ol da hanadah duwan hintulang. 25Ot ayagan Jesus didan am-in ot kananay "Inila yu an hay aap-apu ya mandalan day tatagu ya hay pinhod day maunud te diday ap-apu. 26Mu adi athidin dakayu. Deket waday ohan dakayu an pinhod nan hiyay katagtag-ayan ya mahapul an hiyay kay muttatyun nadan ibbana. 27Ya deket wada nan pinhod nan hiyay mun-ap-apu ya mahapul an mumbalin an kay muttatyu. 28Umat ke ha-oy an Panguluwan di tagu an immaliyak an punmuttatyun am-in di tagu, bokon hay mun-ap-apu. Immaliyak an mangikateh boklan di liwat di tagu ta mibaliw da." 29Puntayanan da Jesus nan bobled Jerico ya niunud day dakol an tatagu. 30Wadaday duwan nakulap an um-umbun nah pingngit di kalata ya dingngol dan mungkala-uh Jesus ot muntukuk da an kanan day "Apu an tanud David, homkon dakami anhan!" 31Pun-ihong-ak nadan tatagu dida ta umop-opya da ot, mu pun-olot da ot ya abuy tukuk da an kanan day "Apu an tanud David, homkon dakami anhan!" 32Immohnong hi Jesus ot ayagana dida ot kananay "Nganney pinhod yun atok ke dakayu?" 33Kanan day "Apu, pinhod min pakatibo kami." 34Himmok na dida ot dapaonay matada ya pinghanadi ya pakatibo da ot miunud dan hiya.

will be added

X\