Mateo 16

1Immali day udum an Pharisee ya Saducee an mamatnan Jesus ot ibaga dan atonay milagro an malpun Apu Dios. 2Mu hinumang na an kananay "Deket mungkalimuy algo ta maingit di kabunyan ya kanan yuy adi umudan hi bigat 3ya deket nah biggatna ta mungkukulabut ya kanan yuy umudan. Nalaing kayun mangimatun hi tibon yuh kabunyan, mu adi kayu pakaimatun hi ma-ma-at ad uwani. 4Gaga-iho kayun tatagun uwani! Mumbaga kayuh pangimatunan yuh kandaman Apu Dios, mu maid di udum hin bokon ya abu nan naat ke Jonah." Nagibbuh diye ot taynan Jesus dida. 5Naagwat da Jesus nah baybay ya ninomnom nadan disipulosna an nakal-iwan dan numbalun hi tinapay. 6Kanan Jesus ke diday "Halipat-an yu ot nan yeast di Pharisee ya nadan Saducee." 7Munhuhummangan nadan disipulos an kanan day "Man-uket kinali nah diye ya kinal-iwan takun numbalun hi tinapay." 8Inilan Jesus di kalkalyon da ot kananay "Makudang di pangulug yun ha-on te tipet hay kamaid di tinapay takuy ihuhummangan yu? 9Kon adiyu pay maawatan? Kon kinal-iwan yu handin nami-angak di liman tinapay ot kanon di liman libun tatagu ya kaatnay kaba di inamung yun natdaan? 10Ya kon kinal-iwan yu bo din pitun tinapay an pinani-ang ku ot kanon di opat an libun tatagu, kaatnan kabay inamung yun natdaan? 11Tipet adiyu maawatan an bokon hay tinapay di kalkalyok ke dakayu hi nangaliyak an halipat-an yuy yeast nadan Pharisee ya nadan Saducee?" 12Ot ahi nuppe maawatan nadan disipulosna an bokon hay yeast an ikamoh tinapay di kalkalyon Jesus, mu nan mipanggep hi ituttudun nadan Pharisee ya nadan Saducee. 13Manatong da Jesus ad Cesarea Philippi ya hinanhanana nadah disipulosna an kananay "Dahdi pey pangalin di tatagu ke ha-on an Panguluwan di tagu?" 14Ya kanan day "Hay udum ya kanan day he-a din hi Juan an mumbonyag ya hay udum ya kanan day he-a din hi Elijah. Wadada boy udum an kanan day he-a din hi Jeremiah weno he-ay oha handidah udum an profetas Apu Dios." 15Ya kanan Jesus ke diday "Dakayu ya-, dahdiyak pe tuwali?" 16Himmumang hi Simon Pedro ot kananay "He-ah Kristo an Imbabalen nan makulug an Dios." 17Kanan Jesus ke Pedroy "He-a Simon an nak Jonah ya umamlong ka te ugge nalpuh nomnom muh naen kinalim, mu impanomnom Apu Dios hi langit ke he-a. 18Ad uwani ya ngadanan dakah Pedro an hay kibalinana ya batu. He-a Pedroy puun di ahi pangulugan di tatagun ha-oy te gapu kediyen kinalim mipanggep ke ha-on. Hidiyen pangulug dan ha-oy ya maid di kabaelan Satanas an mangaan, takon di mate da. 19Idat kun he-ay kalebbengam ta he-ay mangdon nadah aladdun di pun-ap-apuwan Apu Dios ta hay adim abuluton hituh luta ya adi damdama abuluton Apu Dios hi langit. Hay abulutom hituh luta ya abulutona damdamah langit." 20Nagibbuh diyen kinali na ot pakatuggunona didan adida kalkalyon hi udum an hiyah Kristo. 21Kediyen tiempoy nangipainilaan Jesus hanadah disipulosna nah ahi maat ke hiya. Kananay "Mahapul an umeyak ad Jerusalem ya munholholtapak te hay aton nadan mangipangpangulun Judyu ya nadan ap-apun di padi ya nadan muntuttuduh Tugun Moses. Ahiyak pipate, mu hi mikatlun algo ya mamahuwanak." 22Inayagan Pedroh Jesus nah e-elena ot kananan hiyay "Apu, hana ot ta adi iabulut Apu Dios ta adi maat di athina." 23Mu inliggu nan Pedro ot kananay "Mange-ele ka! Umat ka damdaman Satanas. Pinhod mun iadiy mahapul an maat ke ha-on. Hay punnomnom mu ya ugge nalpun Apu Dios, mu nalpuh nomnom di tagu!" 24Ot kanana nadah disipulosnay "Hay tagun pinhod nan mangun-unud ke ha-on ya mahapul an adina ikakaguy nitaguwana tuh luta ya ippol nay punholholtapana gapuh pangun-unudanan ha-on takon di hidiyey lummuh katayana. 25Te hay tagun hay nitaguwana tuh luta ya abuy nonomnomona ya adi midatan hi biyag an maid di poppog na. Mu hay tagun paka-un-unudonak takon di humlun hi katayana ya hiyay midatan hi biyag an maid di poppog na. 26Takon di alan di tagu am-in tun wadah luta ya maid di hilbina hin adi midatan hi biyag an maid poppog na ta mihi-an ke Apu Dios ta inggana. Te hay tagun mihi-an ke Apu Dios ya maid di maat na. 27Ha-on an Panguluwan di tagu ya ahi kami umalin nadah anghel ta matiboy dayaw mi an umat hi dayaw Aman hi Apu Dios. Kediyen aliyak ya humalyaok am-in di tagu ta nadan gaga-ihoy inainat da ya makastigu da ya hanada ken maphod di inainat da ya midatan dah gun-udon da. 28Nomnomon yu tun kalyok an wadadah tun dakayuy adi mate inggana tibonak bo an Panguluwan di tagu ya nan pun-ap-apuwak."

will be added

X\