Mateo 14

1Kediyen tiempo ya hi Herod di ap-apu nah probinsia an Galilee. Dingngol nay mipanggep ke Jesus 2ot kanana nadah ibba nay "Hiya din hi Juan an mumbonyag an namahuwan, kinali waday kandamanan mangat hi milagro." 3Handi ya impadpap Herod hi Juan ot pikalabut na te nadutih Juan an kanalyonan Herod di "Gaga-iho ka te pinlom di ahawan tulang mu." Kinalinah tuwe te makulug an pinlon Herod hi Herodias an ahawan tulang nan hi Felipe. 5Mu gapun diyen kinalin Juan ya pinhod Herod an pipate, mu tumakut hanadah Judyu te ibilang dan profetas hi Juan. 6Nadatngan di algon panginomnoman dah nitungawan Herod ya nanayo nan babain imbabalen Herodias hi hinangngab nadan tatagun naamung ta maka-an-anlah Herod 7ot isapatana an kananay idat nay nganneh diyen ibagan nan babai. 8Tinuttuduwan inana ot hay ibaganan Herod ya kananay "Pinhod kun idat mun ha-on ad uwaniy ulun Juan an mumbonyag an mihaad hi duyu." 9Makattutuyuh Herod, mu nil-un hinamad nay kalina ya dingngol nadan tatagu ot ena mo ipaputul di ulun Juan nah kalabut. 11In-ali dan niha-ad hi duyu ot idat da nah babai ot idat nan inana. 12Immali da nan disipulos Juan ot alan day adol na ot eda ilubuk ot ahida umen nangidatdatong ke Jesus. 13Handih dingngol da Jesus hituwe ya tinaynan dah diyen boble an numbangka da ta ume da nah boblen maid di tagu ta ab-abbu dah di. Dingngol nadan tataguh kabobboble an immeh Jesus ya niunud da an indaldallan da inggana dimmatong da nah pangayana. 14Handih manatong da Jesus nah pingngit di baybay ya tinibo nan deya dah diy dakol an tatagu ya himmok na dida ot paphodona nadan mundogo. 15Mungkahilong ya imme nadan disipulos hi kad-ana ot kanan day "Deyan mungkahilong yaden maid di pangal-an hi kanon hitu. Itud-ak mu ot kattog hantudan tatagu ta eda gumatang hi kanon da hanadah nihnih-up an boble." 16Mu kanan Jesus di "Adi mahapul an eda ume. Idatan yu didah kanon da." 17Kanan dan hiyay "Mu limlimman tinapay ya dudduwwan dolog ya abuy dehtu." 18Kananan diday "Takon, iali yuh tu." 19Ot kalyona nadah tatagu an umbun da nah maholok. Inalana nan liman tinapay ya duwan dolog ot itangad nan numpasalamat ke Apu Dios. Pinani-ang na nan tinapay ot idat na hanadah disipulosna ot pun-ikap-ong da nadah tatagu. 20Nangan dan am-in ot mabhug da ya dakol di natdaan. Inamung nadan disipulos ya napnuy himpulut duwan kaba. 21Hay uyap nadan nangan ya limay libu ya ugge nakibilang di binabai ya u-unga. 22Indani ya impumbangkan Jesus nadan disipulosna ot pamanguluwona dida nah dommang nan boble ot ahina itud-ak nadan tatagu. 23Imme nadan tatagu ot ahi ume nah bilid an e mundasal. Ot handih mungkahilong ya oh-ohha nah di. 24Hanada ken disipulosna ya wadada nah gawwan nan baybay yaden nahalman di dalluyun ya midamuy nal-ot an dibdib ke dida. 25Indanit mungkabigat ya mangalih Jesus hi kad-an da an mundaldallan nah tap-on di danum 26ta handih tinibon nadan disipulosna ya timmattakut da an kanan day "Deya on banig!" Namahig di takut da, 27mu kimmalih Jesus an kananay "Adi kayu tumakut, mundinol kayu te ha-on." 28Kanan Pedroy "Apu, deket makulug an he-a ya ipadalanak damdama tuh tap-on di danum ta umaliyak hi kad-am." 29Ya kanan Jesus di "Makah." Gimmawah Pedro ot mundallan nah tap-on di danum an mangeh kad-ana. 30Mu ginibok na nan nal-ot an puwok ya timmakut ot mungkalimu ot kananay "Apu, baddanganak!" 31Pinghanadi ya immeh Jesus ot ognanay taklen Pedro ot kananan hiyay "Makudang di pangulug mu. Tipet nunhalinduwa ka?" 32Imme da Jesus ke Pedro nah bangka ya natikod nan puwok. 33Hanadan wada nah bangka ya daydayawon dah Jesus an kanan day "Makulug an Imbabale dakan Apu Dios." 34Numbangka da Jesus ot umagwat da nah bobled Genesaret 35ya inimatunan nadan tataguh di ot eda pun-ipaayag nadan mumpundogo nah nungkih-up an boble ot ieda didah kad-ana. 36Pihpihmok dan hiya ta iabulut nan dapaon da ni-moy udun di bulwatina. Ya am-in da nan nanapa ya nakaan di dogoda.

will be added

X\