Mateo 1

1Hituwey nitudok hi aammod Jesu Kristo an tanud David an tanud bon Abraham. 2Nuntanud hi Abraham ot wadah Isaac. Nuntanud hi Isaac ot wadah Jacob. Nuntanud hi Jacob ot wadah Judah ya nadan udum an tutulang na. 3Nuntanud hi Judah ot wada da Peres ke Serah an hi Tamar di inada. Nuntanud hi Peres ot wadah Hesron. Nuntanud hi Hesron ot wadah Ram. 4Nuntanud hi Ram ot wadah Amminadab. Nuntanud hi Amminadab ot wadah Nashon. Nuntanud hi Nashon ot wadah Salmon. 5Nuntanud hi Salmon an inayanah Rahab ot wadah Boaz. Nuntanud hi Boaz an inayanah Ruth ot wadah Obed. Nuntanud hi Obed ot wadah Jesse. 6Nuntanud hi Jesse ot wadah David an patul. Nuntanud hi David an inayanah Bathsheba an inayan ni-an Uriah ot wadah Solomon. 7Nuntanud hi Solomon ot wadah Rehoboam. Nuntanud hi Rehoboam ot wadah Abihah. Nuntanud hi Abihah ot wadah Asa. 8Nuntanud hi Asa ot wadah Jehoshaphat. Nuntanud hi Jehoshaphat ot wadah Joram. Nuntanud hi Joram ot wadah Osias. 9Nuntanud hi Osias ot wadah Jotham. Nuntanud hi Jotham ot wadah Ahaz. Nuntanud hi Ahaz ot wadah Hezekiah. 10Nuntanud hi Hezekiah ot wadah Manaseh. Nuntanud hi Manaseh ot wadah Amon an aman Josiah. 11Nuntanud hi Josiah ot wadah Jeconiah ya nadan udum an tutulang na. Kediyen katagun Jeconiah di nangapputan nadan iBabilon hanadah iIsrael ot ieda didad Babilon. 12Ta hidid Babilon ya nuntanud hi Jeconiah ot wadah Shealtiel. Nuntanud hi Shealtiel ot wadah Sorubabel. 13Nuntanud hi Sorubabel ot wadah Abiud an aman Eliakim. Nuntanud hi Eliakim ot wadah Azor. 14Nuntanud hi Azor ot wadah Sadok. Nuntanud hi Sadok ot wadah Akim. Nuntanud hi Akim ot wadah Eliud. 15Nuntanud hi Eliud ot wadah Eleazar. Nuntanud hi Eleazar ot wadah Mathan an aman Jacob. 16Nuntanud hi Jacob ot wadah Joseph an inayan Maria an inan Jesus an hi Kristo. 17Ta hay nuntanud mipalpun Abraham ta ingganan David ya himpulut opat. Ya hay nuntanud mipalpun David ta inggana handih nangiayan dan dida ad Babilon ya himpulut opat damdama. Ya hay nuntanud mipalpu handih kawada dad Babilon ta inggana handi nitungawan Kristo ya himpulut opat bo. 18Athituy nitungawan Jesu Kristo. Hi Maria ya nitbin Joseph, mu uggeda ni-an nun-ine yaden nawadaan hi Maria te hay kandaman di Espiritun Apu Dios. 19Hi Joseph ya pangalina on inlaglag-an Maria nan wadah putuna. Hiya ya paka-un-unudonay Tugun dan Judyu kinali ninomnom nan adina ituluy an iine. Mu gapu te hiya ya maphod di pangi-ena ya ninomnom nan adina ipainilay adida puntuluyan ta adi maba-inan hi Maria. 20Handih nomnomnomon Joseph hituwe ya inin-inop na on anghel an kananan hiyay "Joseph an tanud David, adika bumain an mangiinen Maria te nawadaan gapuh kandaman di Espiritun Apu Dios. 21Lalakih diyen itungona ya ahiyu ngadanan hi Jesus te hiyay mangibaliw hi taguh liwat da." 22Hituwey immannungan nan kalin Apu Dios an kinalin din profetas an kananay 23"Ahi maimbabaleyan nan babain maid di inayana ta mun-imbabaleh lalaki ya ahida ngadanan hi Emmanuel an hay kibalinana ya wadah Apu Dios ke ditaku." 24Inun-unud Joseph hidiyen kinalin nan anghel Apu Dios ot iine nah Maria. 25Mu uggeda nunhuyop inggana nuntungoh Maria. Intungo na nan lalaki ot ngadanan Joseph hi Jesus.

will be added

X\