Markoki 8

1Wada boy naminghan an naamung day dakol an tataguh kad-an Jesus. Nap-uhan dah kanon da ot ayagan Jesus nadan disipulosna ot kananan diday 2"Mahmok da tun tatagu te tulun algon nakihkihtu dan ha-on ya deyan maid moy kanon da. 3Deket paanamutok dida an uggeda nangan ya kal-ina ya mahalangob dah dalan te nidawwiy nalpuwan di udum." 4Kanan nadan disipulos di "Kon daanay pangal-an hi kanon hantudan tatagu an maid di bobleh tu?" 5Kanan Jesus ke diday "Kaatnan tinapay di wada?" Kanan day "Pitu ya abu." 6Ot pab-unon Jesus nadan tatagu. Inalana nan pitun tinapay ot mumpasalamat ke Apu Dios. Pinani-ang na ot idat na hanadah disipulosna ta eda ikap-ong hanadah tatagu. 7Wada boy o-ohan dolog ot alana ot mumpasalamat ke Apu Dios. Ot idat na hanadah disipulosna ta ikap-ong da. 8Nangan am-in nadan tatagu ot mabhug da. Ya takon di immeh opat an libuy tatagun nangan ya dakol di natdaan. Ot amungon nadan disipulos ya napnuy pitun kaba. Hi Jesus ya impaanamut na nadan tatagu 10ot ahida mumbangkan nadah disipulosna ot ume dad Dalmatia. 11Wadaday Pharisee an immen e nakihannu ke Jesus te pinhod dan patnaan. Ot imbaga dan hiyay pangitib-an da hin makulug an hiya ya intud-ak Apu Dios. 12Mu kimmalih Jesus an kananay "Toan kayun tatagud uwani! Tipet kah-in di waday pangimatunan yu? Kalyok ke dakayu an adik aton nan ibaga yun milagro an pangimatunan yu." 13Kinali nah diye ot tumayan da an numbangka da ot umagwat dah dommang na. 14Kinal-iwan nadan disipulosna an numbalun ot hay ya abu wada nah bangka ya nan ohan tinapay an natdaan. 15Kanan Jesus ke diday "Halipat-an yu ot nan yeast di Pharisee ya nadan tatagun Herod." 16Munhuhummangan da nadan disipulos an kanan day "Man-uket kinali nah diye ya kinal-iwan takun numbalun hi tinapay." 17Inilan Jesus di kalkalyon da ot kananay "Tipet hay kamaid di tinapay di ihuhummangan yu? Kon adi kayu pakanomnom ya pakaawat hi pangi-ek? 18Tipet kay maid di ingayu ya matayu? 19Kon kinal-iwan yu handin nami-angak hi liman tinapay ot kanon di limay libun tatagu? Kon kaatnay kabah inamung yuh natdaan?" Kanan day "Himpulut duwa." 20Kanana bon diday "Ya kon kinal-iwan yu bo din pitun tinapay an pinani-ang ku ot kanon di opat an libun tatagu? Kaatnan kabay inamung yun natdaan?" Ya kanan da boy "Pitu." 21Kanan Jesus ke diday "Deya ot an inila yu, mu tipet nanongnan adiyu maawatan nan kinalik mipanggep hi yeast nadan Pharisee ya nadan tatagun Herod?" 22Imme da Jesus ad Betsaida ya wadaday tatagun nangialih nakulap ke Jesus ot pihpihmok dan hiya ta dapaona ta makaan di kulap na. 23Inawit Jesus nan nakulap ot ume da nah e-elen nan boble. Ot tuppaanay matan nan tagu ot dapaona ot ibaganan hiyay "Kon waday matibom?" 24In-ang-ang nan tagu ot kananay "Om, pakatibowak hi tatagu, mu kay da kakaiw an mundallanan." 25Dinapan bon Jesus di matana ot iang-ang bon nan tagu ya maphod moy panibona. 26Ot ipaanamut Jesus an kananan hiyay "Adim ot mo idalan nah boble." 27Imme da Jesus ya nadan disipulosna hanadah kabobbobled Cesarea Philippi. Wadadah dalan ya kanan Jesus ke diday "Dahdiyak pe nin hi pangalin di tatagu?" 28Ya kanan day "Hay udum ya kanan day he-a din hi Juan an mumbonyag. Ya hay udum ya kanan day he-a din hi Elijah. Wadada boy udum an kanan day he-ay oha handidah udum an profetas Apu Dios." 29Ya kanan Jesus ke diday "Dakayu ya-, dahdiyak pe tuwali?" Ya kanan Pedroy "He-ah Kristo an tinuddun Apu Dios an mangipaptok hi tagu." 30Ya intugun Jesus an kananay "Adiyu e kalkalyon hi udum an tatagu." 31Inlappun Jesus an kalyon ke diday mipanggep hi ahi maat ke hiya. Ot kananay "Ha-oy an Panguluwan di tagu ya munholholtapak ya adiyak abuluton an Kristo hanadah mangipangpangulun Judyu, nadan ap-apun di padi ya nadan muntuttuduh Tugun Moses. Ahiyak pipate, mu hi mikatlun algo ya mamahuwanak." 32Hituwey kinalin Jesus ke dida ot ayagan Pedro nah e-elena ot kalyana te adina pinhod an maat di athidin hiya, 33mu nunligguh Jesus ot iang-ang na hanadah disipulosna ot kananan Pedroy "Mange-ele ka! Umat ka damdaman Satanas. Hay punnomnom mu ya ugge nalpun Apu Dios, mu nalpuh nomnom di tagu." 34Inayagan Jesus nadan tatagun naamung ya nadan disipulosna ot kananan diday "Hay tagun pinhod nan mangun-unud ke ha-on ya mahapul an adina ikakaguy nitaguwana tuh luta ya ippol nay punholholtapana gapuh pangun-unudanan ha-on, takon di hidiyey lummuh katayana. 35Te hay tagun hay nitaguwana tuh luta ya abuy nonomnomona ya adi midatan hi biyag an maid poppog na. Mu nan tagun paka-un-unudonak ya ipainilanay pangi-ek takon di humlun hi katayana ya hiyay midatan hi biyag an maid poppog na. 36Takon di alan di tagu am-in tun wadah luta ya maid di hilbina hin adi midatan hi biyag an maid di poppog na ta mihi-an ke Apu Dios ta inggana. 37Te hay tagun mihi-an ke Apu Dios ya maid di maat na. 38Dakol dad uwaniy gaga-ihon tatagun nangiwalong ke Apu Dios. Ta hidiye nan hay tagun mangibain ke ha-oy ya nan ituttuduk ya ha-oy an Panguluwan di tagu ya adik ibilang an taguk hantuh kibangngadak an ibbak nadan anghel hi ahik pangipatib-an hi dayaw min Ama."

will be added

X\