Lukaseki 4

1Hi Jesus ya waday Espiritun Apu Dios ke hiya handih nalpu nah wangwang an Jordan. Impangulun nan Espiritu hi Jesus nah adi maboblayan ot mihmihdih nap-at an algo. Hidiy nangipatnaan Satanas an munhaul ke hiya ta munliwat. Kediye ya nakaaggangan hi Jesus te ug-ugge nangan. 3Kanan Satanas ke hiyay "Deket Imbabale dakan Apu Dios ya pumbalinom tun batu hi makan." 4Hinumang Jesus an kananay "Mu hay nitudok hi kalin Apu Dios ya kananay `Bokon hay makan ya abuy kitaguwan di tagu.'" 5In-en Satanas hi Jesus nah natag-en bilid ot pinghanadi ya impatibonan am-in ke hiya nadan pun-ap-apuwan tuh luta 6ot kananan hiyay "Damanan he-ay mun-ap-apu ke datuwen am-in ta madayaw ka te nidat ke ha-on datuwe ta nangamungak an mangidat nah pinhod kun mun-ap-apu. 7Kinali deket ha-oy di dayawom ya idat kun am-in ke he-a." 8Mu hinumang Jesus an kananay "Hay nitudok an kalin Apu Dios ya kananay `Hi Apu Dios ya abuy dayawon yu ya unudon yu.'" 9In-en bon Satanas hi Jesus ad Jerusalem nah katagtag-ayan an bubung nan templo ot kananan hiyay "Deket Imbabale dakan Apu Dios ya dumop-a ka 10ot deyan impitudok Apu Dios an kananay `Baalona nadan anghel ta ipaptok daka ta takon di mag-a ka ya tippaon daka ta adika maliputan.'" 12Hinumang Jesus an kananay "Mu wada boy nitudok hi kalin Apu Dios an kananay `Adiyu patnaan hi Apu Dios.'" 13Impatnan Satanas am-in di kabaelanan munhaul ke Jesus, mu adi pakahaul ot taynana ta nangamung boy ahina panaulan ke hiya. 14Nibangngad hi Jesus ad Galilee an waday kandamanan nalpuh Espiritun Apu Dios ta nundingngol hi kabobbobleh di te nadan intuttudu na ya inainat na. 15Nuntanuttudu hanadah simbaan hidi ya tobalon am-in nadan tatagu. 16Indani ya immeh Jesus hi bobledad Nasaret an naongalana. Sabadun tungo kediye ya immen nah simbaan te hituwe tuwaliy oggana aton ot tumaddog ta mumbidbid hi kalin Apu Dios. 17Ya indat dan hiya nan papel an naluddun an nitudokan nan kinalin din profetas an hi Isaiah. Binokyag na ot potkonan bidbidon nan kananay 18"Hay Espiritun Apu Dios ya wadan ha-on te ha-oy di pinili nan mangipainila hanadah nungkawotwot nah maphod an ahi maat. Intud-akak bon mangipainila an mibukaan nadan nibalud ya makaan di kulap nadan adi pakatibo ya mamaddang hanadah maligatan. 19Ya intud-akak bon mangipainilah datngan di tiempon pangibaliwan Apu Dios hi tagu." 20Binidbid Jesus hituwe ot luddunona ot ibangngad na nah tagun bumadbaddang nah bohongnan di simbaan ot umbun an muntuttudu. Am-in nadan tatagu nah simbaan ya totokkolon da 21ot kananan diday "Hinaen kalin Apu Dios an dingngol yun binidbid ku ya immannung ad uwani." 22Am-in nadan nangngol ke hiya ya tobalon da ya nakammodwong da nah makaphod an puntuttudu na. Ot kanan day "Kon bokon hiya nan imbabalen Joseph?" 23Kanan Jesus ke diday "Makulug man ahan an ahiyu kalyon ke ha-oy nan ab-abig an kananay `He-an mun-aga, agaham di adol mu. Atom hantuh numboblayam di umat nah dingngol min inat mud Kapernaum.'" 24Kanan bon Jesus di "Hituwey kalyok ke dakayu, makulug an hanan profetas ya adi kulugon nadan kaboblayana. 25Umat ke Elijah an profetas Apu Dios handih kawadana tuh luta an waday bitil hi kabobbobled Israel te ug-ugge immudan hi tulun toon ta kagodwa. Ta dakol day kaboblayanan binabain nungkabalu an munhapul hi baddang, mu bokon diday binaddangana te nan nabalun babain bokon Judyud Salepta ad Sidon di nangitud-akan Apu Dios ke hiya an e baddangan. 27Athidi bo dih tiempon Elisha an ohan profetas Apu Dios an dakol day ibbanan Judyu an mundogon mungkangpuy adol da, mu bokon diday nangitud-akan Apu Dios ke hiya te nan bokon Judyu an hi Naaman ad Syria an athidiy dogonay nangitud-akan Apu Dios ke hiya ot kaanonah diyen dogona." 28Handih dingngol nadan tatagu nah simbaan dadiyen kinalin Jesus ya nahalman di boh-ol dan hiya 29ot lapditon da ot ieda nah tap-on diyen bilid an numboblayan da ta eda ogahon nah dopla. 30Mu na-ala ya mangeh Jesus an indalanah gawwan nadan naamung an tatagu. 31Immeh Jesus ad Kapernaum ad Galilee ot kediyen Sabadu ya nuntuttudu nah simbaan. 32Ya namodwong nadan tataguh panuttudu na te waday kalebbengana. 33Hidi nah simbaan ya wada on nahikpan an muntukuk. Kananay 34"Jesus an iNasaret, nganney pinhod mun aton ke dakami? Kon immali kan manadag ke dakami? Inilak hin dahdi ka. He-a nan maid di liwat na an intud-ak Apu Dios!" 35Mu kinalyan Jesus nan nihkop an kananay "Opya ka ya makaan ka nah tagu!" Impalin nan nihkop nan tagu hi hinangngab nadan naamung an tatagu ot ahi makaan, mu maid udot di naliputan nah tagu. 36Namodwong nadan tatagu ot munhimbabaggaan dan kanan day "Nganneh tuwen ma-ma-at? Hinnatkon an abu! Antipeh naen ongal di kabaelan di kalina? Deya peman an takon di dimonyon nihkop ya kaanona!" 37Ot mundingngol di mipanggep ke Jesus am-in nadah nunlinikkod an bobled Kapernaum. 38Limmah-un hi Jesus nah simbaan ot umeh balen da Simon. Hinumgop ya kinali dan hiya an mundogo hanan inan nan inayan Simon an nahalman di atung na ot ibaga dan hiya an paphodona. 39Immeh Jesus hi kad-ana ot kalyonan makaan nan atung na ya nakaan. Ot umina ot ena idadaan di kanon da Jesus. 40Mungkalimuy algo kediye ya nun-ialin di tataguy mumpundogoh kad-ana ot dapaona dida ot makaan di dogoda. 41Takon nadan nahikpan ya kinaanay nihkop ke dida ya deket e makaan nadan nihkop on tinumkuk da an kanan day "He-a nan Imbabalen Apu Dios!" Mu adi iabulut Jesus an kumali da te adina pinhod an diday mangipainila an hiyah Kristo. 42Mungkabigat kediye ot umeh Jesus nah e-elen di boble an maid di tagu ot e maoh-ohhah di. Indani ya punhamak nadan tatagu ot handih hinamak da ya iadi dan tayanana dida. 43Mu kananan diday "Mahapul an umeyak hi udum an boble ta eyak mun-tuttudu damdamah di hi mipanggep hi pun-ap-apuwan Apu Dios te hituwey nangitud-akanan ha-on." 44Ot umed Judea an e muntuttudu hanadah simbaan di Judyu.

will be added

X\