Lukaseki 23

1Ot tumaddog dan am-in nan munhumalya ot iedah Jesus hi kad-an Pilatu an gobernador ot kanan day 2"Hituwen tagu ya itanuttuduna hanadah ibbamin Judyuy pangahingan dah linteg di gubilnu. Iadi nay pumbayadan hi buwis nah gubilnun di Roma. Ya kanana boy hiyay Kristo an pinilin Apu Dios an mumpatul." 3Ot kanan Pilatu ke Jesus di "Kon he-ay patul di Judyu?" Hinumang na an kananay "Deya ot bon hinaey kanam." 4Kanan Pilatu hanadah ap-apun di padi ya hanadah udum an naamung di "Maid di mahamak kuh bahul tuwen tagu." 5Mu ipapilit dan kanan day "Huhhumlun hanan ena intanuttudu hi pun-aawwitan am-in di tatagud Galilee ta deyan dimmatong hitud Judea." 6Handih dingngol Pilatuh tuwe ya minahmahana hin nalpuh Jesus ad Galilee. 7Handi ininnilan Pilatu an iGalileeh Jesus ya impaenah kad-an Herod an ap-apud Galilee ta hiyay munhumalyan Jesus te kediye ya nipaddin wadah Herod ad Jerusalem. 8Immamlong hi Herod hi nanib-anan Jesus te nabayag an pinhod nan tibon. Dakol di dingngol nan inainat nah milagro ta pinhod na ot an tibon di udum an milagron atona, mu maid. 9Dakol di minahmahan Herod ke hiya, mu adi humumang. 10Ot hanadan ap-apun di padi ya nadan muntuttuduh Tugun Moses an muntattaddog hidi ya namahig an pun-itkuk da nan kanan dan bahul na. 11Hi Herod damdama ya nadan tindaluna ya tinaltalanggaan da ya nunpadngolan da. Ot ipabulwati dan hiya nan bulwatin di patul ot pabangngadon dah kad-an Pilatu. 12Nipalpun diye ya nunggayyum uppe da Herod ke Pilatu yaden mumbuhul da handi. 13Impaayag Pilatu nadan ap-apun di padi, ya nadan ap-apun di Judyu ya nadan udum an tatagu ot 14kananan diday "Kanan yuy ituttudun tuwen taguy pangahingan yuh linteg, mu dingngol kuy kalinah nunhumalyaak ke hiya ya maid di ena numbahulan ke danaen eyu ipabahul ke hiya. 15Takon hi Herod an nunhumalyan hiya ya kananay maid peman di bahul tuwen tagu ot pabangngadonah tu. Ta nganne moy gapunah e pamatayan ke hiya? 16Hay ke ot pe kanak ya ipahoplat ku ya ahik impae." 17[Katootoon on mahapul an waday ohan ipaen Pilatuh balud hin nadatngan nan kanan dan Piyestan di Nala-uwan di Anghel Apu Dios.] 18Mu am-in da nan tatagu ya muntukuk da an kanan day "Patayon yuh naen tagu ta hi Barabbas di ipae yu." 19Hi Barabbas an nibalud ya hiyay oha hanadah nakigulu ad Jerusalem ya pimmate. 20Impatnan bon Pilatu an kumali hanadah tatagu ta hi Jesus ot di mipae, 21mu tagan day tukuk an kanan day "Ipatak hi krus! Ipatak hi krus!" 22Impitlun Pilatu an kimmali hanadah tatagu an kananay "Tipe-? Kon nganney bahul tuwen tagu? Maid di gapunah e pamatayan ke hiya. Kinali abunay ipahoplat ku ta ahik ipae." 23Mu namam-a ot ya abun pun-itkuk dan mipatak hi krus. Nahalman nadan tatagu 24ot iunnud mon Pilatu nah pinhod dan maat. 25Hi Barabbas moy impaena yaden nabahulan te nakigulu ya pimmate ot hi Jesus moy ipipate na te hidiyey pinhod nadan tatagu. 26Pun-ie dah Jesus nah eda pangipatakan ke hiya ya dinamu dah Simon an iCyrene an manganamut. Impapilit nadan tindalun ipipah-on ke hiya nan krus an pinah-on Jesus ot pah-onona ot mituntun-ud ke hiya. 27Kediyen pun-ie dah Jesus ya dakkodakkol day tatagun miun-unnud ke hiya ya wadada nadan binabain kumogakoga te nan eda pamatayan ke hiya. 28Inliggun Jesus ke dida ot kananay "Dakayun binabain iJerusalem ya bokon ha-oy di kog-an yu, mu hay adol yu ya nadan imbabaleyu 29te ahi madatngan nan algon nahalman di ahiyu punholholtapan, ta hidiye nan wadaday tatagun ahida kanan di `Kudukdul hanadah binabain maid di imbabaledan painuman da.' 30Ya ahida bo kanan hanadah bilid di `Magde kayu ta matab-unan kami.' 31Te kediyen tiempo ya nahalman di holholtapon di tatagu. Tibon yun ha-oy an maid di bahul ku yaden athituy aton dan ha-on an punholholtaponak, ot namam-a moy ahida aton hanadah tatagun waday bahul da." 32Wadada damdamay duwan balud an in-eda ta eda pakipate. 33Dimmatong da nah nangadanan hi gunit di ulu ot ipatak dah Jesus nah krus. Takon nadan duwan balud ya impatak da damdama dida. Hanan oha ya wadah winawwan Jesus ya na bon oha ya wadah iniggid na. 34Kanan Jesus di "Ama, pakomaam di liwat nadan mangipipaten ha-on te uggeda inilay at-atton da." Hanadan tindalu ya imbubunut da ten nganney alan di hin-oh-an dida nah bulwatin Jesus. 35Hanadan tatagu ya dehdi dan mun-ang-ang-ang yaden hanada ken ap-apuda ya taltalanggaan da an kanan day "Binaddanganay udum ot tumagu da ya agat tibon taku hin baddanganay adol na ta kitib-anan hiyay pinilin Apu Dios an Kristo an mangipaptok hi tagu." 36Takon nadan tindalu ya taltalanggaan da damdama ot idatan dah pimmakin baya 37ot kanan dan hiyay "Deket he-ay patul di Judyu ya baddangam di adol mu ta adika mate." 38Kanan dah di te nan nitudok hi tap-on di uluna ya kananay "Hituwey Patul di Judyu." 39Takon damdama nan ohan nipatak ya taltalanggaanah Jesus an kananay "Kon bokon he-a nan pinilin Apu Dios an mangipaptok hi tagu? Daan bot baddangam di adol mu ya dakami?" 40Mu kanan nan ohan nipatak di "Antipet iathinam di kalim ke hiya? Kon adika tumakut ke Apu Dios yaden inilam an mate ka? 41Dita ke ya mate ta te hidiyey kastigu tah numbahulan ta, mu hiya ke ya maid gapunay pamatayan dan hiya te maid di bahul na." 42Ot kananan Jesus di "Apu Jesus, ahiyak ahan nomnomon hantuh ahim pumpatulan." 43Ya kanan Jesus ke hiyay "O, takon ad uwani ya maki-e kan ha-on nah kawad-an di linggop ya an-anla." 44Indanit maal-algo ya himmilong am-in di boble hi tulun olas 45an nama-id di potang. Hanan kultina nah templo ya nahathat ot magodwa. 46Indani ya tinumkuk hi Jesus an kananay "Ama, nangamung ka hi linnawak. Kinali nah tuwe ot mate. 47Hanan ap-apun di tindalu ya tinibonan am-in nan na-na-at ot dayawonah Apu Dios an kananay "Makulug peman tuwalin maid di bahul tuwen tagu." 48Hanada ke damdaman tatagun nanibon diyen naat ya u-umyungan da nuppen mumpanganamut. 49Am-in da nan nun-ib-ibban Jesus takon nadan binabain niunuunud ke hiya an nalpudad Galilee ya nibata-an dan mun-ang-ang-ang nah ma-ma- at. 50Indai ya wada on ohan Judyu an hi Jose di ngadana an iArimatea. Hiya ya madayaw te maphod di pangi-ena, kinali takon di hiyay oha hanadah ap-apun di Judyu ya ad-adiyonah diyen eda inat ke Jesus. Hiyay oha hanadah munho-ho-od hi datngan di pun-ap-apuwan Apu Dios. 52Handih nateh Jesus ya immeh kad-an Pilatu ot ena ibagay adol Jesus. 53In-abulut Pilatu ot ena lokahon ot libbutanah luput ot ena ilubuk nah gungat hi batu an maid ni-an di nilubuk hidi. 54Ginalaanan e inlubuk te kediyey kilappuwan di ngilinon dan algo. 55Hanadan binabain niunud ke Jesus an iGalilee ya naki-e dan Jose ot tibon da nan lubuk ya hay inat nan nangilubuk. 56Handih immanamut da ya indadaan day lana ya nadan udum an mihaad hi adol di nate. Mu kabigatanan diye ya Sabadun tungo ot mun-iyatu da an miunnud nah Tugun Moses.

will be added

X\