Hebreos 9

1Handin namangulun planun Apu Dios ya intugunay aton nadan tatagunan mundayaw ke hiya. Ya wada boy nakapyah pundayawan da an niabbung an tulda an kanan dan Tabernacle. 2Hidiyen Tabernacle ya waday duwan kuwaltuna an waday mikadwan kultinan nangodwa ke datuwen kuwaltu. Nah namangulun kuwaltun hogpan ya hidiye nan kanan dan Nasantun Kuwaltu. Hidiy kad-an nan dilag ya nan lamesaan an niha-adan di tinapay an miappit ke Apu Dios. 3Nan mikadwan kuwaltu ya hidiye nan kanan dan Nakassantun Kuwaltun kad-an Apu Dios. 4Hidiy kad-an nan altar an balituk an punggohoban dah nabanglun insenso an miappit bon Apu Dios. Ya wadah di bo nan kahon an naamoh balituk an hidiye nan kanan dan kahon an planun Apu Dios hanadah Judyu te wadah di nan duwan batun nitudkan nan himpulun Tugun Apu Dios an dinawat Moses. Ya wada boh di nan balituk an buhin nihuduwan nan manna an ibban din makan an nungkag-an nalpuh langit an kinakinan handidan aammod takun Judyu. Hanah kahon ya wadah di damdama nan patanong Aaron an himmaping. 5Nah tap-on diyen kahon ya wadaday duwan tinattaggun anghel an kitib-anan wadah Apu Dios hidi. Pinayyad day payak dat hinophopan da nan hukap diyen kahon an kapakomaan di liwat te hidiy pangiwakgiyan da nah dalan di iappit dan Apu Dios. Kalyok datuwe, mu adik e ohhaohhaon an kalyon datuwed uwani. 6Athinay ine-en nan Tabernacle. Hay pangi-eda handi ya kabigabigat on ume nadan padi nah namangulun kuwaltu ta eda aton nan ipangunun Apu Dios ke dida. 7Mu hana keh mikadwan kuwaltu ya abuna nan natag-en padiy humgop, maminghan ya abuh hintoon. Deket humgop hidi ya mahapul an umal-alah dalan nan iniknong dan aggayam ta ena iwakgi nah hukap nan kahon ta waday aton Apu Dios an mumpakomah liwat na ya hay liwat di tatagu. 8Hituwey ine-en di ngunun handidan papadi nah Tabernacle ya hidiyey nangipatib-an di Espiritun Apu Dios an maid di kalebbengan takun mihayyup ke Apu Dios hin wadah diyen Tabernacle tuh luta an pundayawan di tagu ke hiya. 9Hituwey panginilaan takud uwani ta maawatan taku. Te man-ut handi ya ianappitan nadan tataguh Apu Dios hi iknong da weno idat da, mu kapyanan adi luminggop di nomnom da te inila dan nanongnan waday liwat da. 10Te handi ya inanun-unud da nan Tugun Moses hi aton dan mundayaw ke Apu Dios, umat hi pumpaniawan hi udum an makan weno mainum ya hay aton dan munlini. Datuwey mahapul an un-unudon da ingganan dih nangipainilaan Apu Dios nah makulug an maunud handih nangaliyan Jesu Kristo. 11Immalih Kristo ot hiyay numbalin an natag-en padi ta dawaton taku nan kiphodan an indadaan Apu Dios. Ad uwani ya dehdin ingunngunuwan ditaku nah mapmaphod an Tabernacle an wadah langit an bokon taguy nangapya ya bokon tuh lutay nabohwatana. 12Naminghan ya abuy nangayana nah Tabernacle hi langit an kad-an Apu Dios. Ya maid di inal-alanah dalan di gulding weno bakan ena iappit ke hiya. Ot hay in-appit nan Apu Dios ya nan dalana handih natayana ta mibaliw takun mangulug ta waday biyag takun maid di poppog na. 13Hay intuttudun nan Tugun Moses an aton hin waday nibahhowan nadan tatagu ya mahapul an e mumpalini nah padi. Ya hay aton nan padin munlini ya wakgihanah diyen taguh dalan di niappit an gulding weno baka. Bokon ke ya nan gubun di ginhob dan impan di baka. Deket nagibbu ya mabalin mon mid-um hanadah ibbanan mundayaw ke Apu Dios. 14Athidi key ine-ena ya immam-ana moy kiatan nan dalan Kristo ke ditaku. Te gapu kediyen nangihuluganah biyag na ya adi mo mahapul an etaku kumakkagun mangun-unud nah pangi-en handidan aammod taku dih done an maid di hilbina ta hay mo ipaanhan taku ya hay pangun-unudan taku nah makulug an Dios. Handih inhulug Jesus di biyag na ya hidiyey maid di kudang nan niappit ke Apu Dios ta mapakomaan di liwat taku. Ta gapuh baddang nan Espiritun Apu Dios an maid di lappu na ya poppog na ya inhulug Jesus di biyag na. 15Ta hidiye nan nah balun planun Apu Dios ya hi Kristoy mangitakdog ke ditakuh hingngab na ta am-in takun numbalin hi tataguna ya dawaton taku nan kinalinan boltanon takun maid di poppog na. Man-uket mabalin mon maat hinae ya gapu te ingkaten Jesus di liwat taku ta mabalin an pakomaan Apu Dios takon nadan tatagun ugge nangun-unud hi Tugun Moses. 16Hay aton Apu Dios an mangipaboltan hanadah kinalinan idat ke ditaku ya umat nah pangat di Judyun kah-in di mate nan tagu ta ahi mabalin an mikap-ong nan odona hanadah pinhod nan pangipaboltanan. Te matagu ke ni-an nan tagu ya adi mabalin an ena ikap-ong nan odona. 18Ya athidi bo dih namangulun planun Apu Dios an kah-in di waday maunnan maklong ni-an ta miappit di dalana ke Apu Dios ta ahi mabalin an dawaton di taguy kiphodana. 19Hituwey kitib-anan handih nagibbun impainilan Moses am-in nadan Tugun Apu Dios hanadah tatagu ya immidadaan hi dalan di impan di baka ot udmanah danum ot itam-ol na nan holok an nabtok hi maingit an tinulid ot wakgiyana nan liblun nitudokan nan Tugun ya nadan tatagun wadah di. 20Ya handih pun-iat nah tuwe ya kananay "Hituwen dalay mangipainilan mahapul an un-unudon taku nan Tugun Apu Dios." 21Impakiwakgin damdaman Moses nan Tabernacle ya nadan udum an mausal nah pundayawan da ke Apu Dios. 22Te hay intuttudun Moses an Tugun Apu Dios ya mahapul an waday miappit hi dalan di aggayam ta ahi abuluton Apu Dios di nganneh diye an miusal nah pundayawan dan hiya. Ya athidi bo nah liwat da an mahapul an waday maklong an aggayam ta miappit ke Apu Dios di dalana ta ahi mabalin an pakomaanay liwat da. 23Am-in nan usalon dah pundayawan da nah Tabernacle ya ing-ingo ya abu nah nahamad an pundayawan an wadah langit. Dadiyen usalon da ya mahapul an mawakgiyan hi dalan nan niappit an aggayam ta ahi abuluton Apu Dios. Mu hay miappit hi langit ya nabalbalol mu nadan iappit di papadi tuh luta 24te hay dalan Jesu Kristoy niappit ke Apu Dios handih nangikatayanah liwat taku. Ya hay ena nangiappitan ya bokon nah kinapyan di tagu tuh luta an ing-ingo ya abu, mu hidi nah wada tuwalih langit. Ta dehdi moh langit ad uwani an mangitakdog ke ditakuh hinangngab Apu Dios. 25Ya adi mahapul an e ipanidpidwan Jesu Kristo an mangiappit hi dalana ke Apu Dios te damana nan naminghan an nangikataynah liwat taku. Adi umat nah natag-en padi tuh lutan kah-in di katootoon on immieh dalan ena iappit nah Nakassantun Kuwaltu. 26Te gulat nat athidi ya kadaidai mo on nunligat hi Jesus nipalpu dih nunlutuwan Apu Dios tuh luta ingganad uwani. Mu damana nan naminghan an ena nangikatayan hi liwat taku ad uwanin deyan mungkadatngan di poppog di luta. 27Am-in di tagu ya mahapul an mate, ne ahi nuppe hinumalyan Apu Dios. 28Athidin Jesu Kristo an naminghan ya abuy nangikatayanah kapakomaan di liwat taku. Ya ahi bo mibangngad, mu bokon mo gapuh liwat taku, mu umalit ibaliw na nadan mangulug an munho-ho-od hi kibangngadana.

will be added

X\