Hebreos 8

1Hay ipaanhan kun ipainilan dakayu ya hi Jesus an natag-en padi an mangitakdog ke ditakuh hinangngab Apu Dios an katagtag-ayan an Ap-apuh langit. Hiya ya inumbun hi winawwan Apu Dios. 2Hidiy pumpadiyana nah kiha-adan Apu Dios an bokon nah Tabernacle an kinapyan di tagu. 3Hay ngunun di natag-en padi ya hiyay mangiappit hi iappit di tatagu ke Apu Dios. Kinali hi Jesus ya mahapul damdaman waday iappit nan Apu Dios, ot hay adol nay in-appit na. 4Gulat nat nanongnan wadah Jesus tuh luta ya bokon padi te wadada tuwaliy udum an padi tuh lutan oggan mangiappit hi iappit di tatagun kalyon nan Tugun Moses an iappit dan Apu Dios. 5Ya nan Tabernacle an oggan pun-appitan nadan padi ya nun-ingngoy ang-angna nah wadah langit an nangiingngohan Moses. Te handih e pangapyaan Moses nah Tabernacle ya kanan Apu Dios ke hiyay "Pakatibbom ot ta paka-un-unudom nan umat hi nipatibon he-a nah bilid." 6Ya ad uwani ya mapmaphod di kinapadin Jesu Kristo mu hay kinapadin handidan padin di Judyu, te nan ngununan mangitakdog ke ditaku ya nipuun nah maphod an planun Apu Dios mu nan namangulun planuna, te kinali na an pakomaanay liwat di tagu hin idinol dan hiya. 7Gulat nat maid di kudang din planun impainilan Moses ya ugge ot nahannotan hi balu. 8Mu nahannotan te tinibon Apu Dios an hay kinakudang ya wadah tatagu te adida pakaun-unud kediyen planu ot kananay "Ha-oy an hi Apu Dios ya ipainilak ke dakayun tataguk an Judyu ad Israel ya Judah an udum hi algo ya waday balun planuk ke dakayu. 9Hituwen planu ya hinnatkon dih namangulun impainilak handidah aammod yu handih nangipanguluwak ke dida ot kumaan dad Egypt. Ya gapu te uggeda inun-unud hidiyen planuk ya inwalong ku mo dida. 10Mu ahi madatngan nan algon kinalik ke dakayu an ipainilak hituwen balun planuk nah tataguk an iIsrael. Iha-ad kuy tugun ku hi nomnom da ta hidiyey un-unudon da. Ta ha-oy moy Dios an un-unudon da ya diday tataguk an ipaptok ku. 11Adi mahapul an waday ahi muntuttudun didat inilaonak an hi Apu Dios. Te inilaonak tuwali ke didan am-in, takon di nganney nitaguwan di hin-oh-an dida, natag-e ya nababa. 12Pakomaak di liwat da ya adik mo nonomnomon di nunliwatan dan ha-on." 13Gapu te kinalin Apu Dios an waday balun planuna an un-unudon taku ya nainilan pinoppog na mo nan namangulun planuna.

will be added

X\