Hebreos 7

1Hi Melkisidek ya hiyay patul ni-an ad Salem handih done ya padi bon Apu Dios an katagtag-ayan. Waday naminghan an mungkibangngad hi Abraham hi eda nakigubatan an inapput da nadan patul an buhul da ya e dinamun Melkisidek ot idasalanah Abraham ta idatan Apu Dios hi kiphodana. 2Ot idatan damdaman Abraham hi mikapuluh pinlo dah eda nakigubatan. Hay kibalinan nan ngadan an Melkisidek ya "makakkaphod an patul". Ya hay kibalinan di Salem an ngadan diyen boblen numpatulana ya "kalinggopan", kinali nginadanan da bo hi "patul di linggop". 3Ugge nainilay mipanggep hi nitaguwan Melkisidek te maid di nitudok mipanggep ke hiya, hay nahlagana, hay aammod na, hay nitungowana ya hay natayana. Hay ya abu inila taku ya hiya ya padit inggainggana an umat nah Imbabalen Apu Dios. 4Kinali tibon yuy kinatag-en Melkisidek, takon hi Abraham an madayaw an ammod am-in di Judyu ya indat nan hiyay mikapuluh pinlo dah eda nakigubatan. 5Ya inila taku an wadaday udum an pangidatan hi mikapuluh limmu. Dadiye nadan tanud Libay an natuddun padin di Judyu. Diday lebbeng nan pangidatan nadan ibbadan tanud Abraham hi mikapuluh limmuda te hituwey kanana nah Tugun Moses. 6Mu hi ke Melkisidek ya maid di nanuddun hiya te hiya ya nana-ud tuwalin padi. Kinali takon di bokon tanud Libay ya indat damdaman Abraham ke hiyay mikapuluh pinlo dah eda nakigubatan. Hituwey kitib-ana an takon di natag-eh Abraham te hiyay nangalyan Apu Dios an midatan hi kiphodan, ya natagtag-e pay hi Melkisidek. Oha bo ya indasalanah Abraham an binendicionana. 7Ya inila taku an hay mangidasal hi ohan tagu ya natatag-e mu hanan idasalana. 8Ya hay oha bon mipanggep ke Melkisidek an nangidatan Abraham hi mikapuluh pinlo dah eda nakigubatan ya impitudok Apu Dios an munnananong di numpadiyana. Yaden hanaken tanud Libay ya ugge numbayag di numpadiyan da te nate da. Makulug an hanadan padin tanud Libay ya dawaton day mikapuluh limmun nadan tatagu, mu kay da damdama immidat ke Melkisidek te hiyay nangidatan nan nahlagan da an hi Abraham hi mikapuluh pinlona. 10Te takon di ugge ni-an nitungoh Libay handih e nanamuwan Melkisidek ke Abraham ya kay wada ke Abraham te hiya ya tanud na. 11Hanadan padin tanud Libay an hi Aaron di namangulu ya diday natuddun mangiappit hanadah idat di tatagun miappit ke Apu Dios te hay kinapadi day nipuunan nan Tugun Apu Dios an impainilanan Moses. Mu gulat na ot ta mabalin an mibaliw takuh pangidinolan takun datuwen papadi ya nadan ituttudu da ya adi ot mahapul an intud-ak Apu Dios hi Kriston niingngon Melkisidek di kinapadina an mumpadin ditaku. Mu makudang di kinapadida, kinali nihannot hi Jesu Kristo ke dida. 12Ot gapu teden nahannotan datuwen padi ya mahapul damdaman mahannotan nan Tugun. 13Oha bo ya hi Apu takun hi Jesu Kristo an nihannot an padi ya bokon tanud Libay, mu tanud Judah an takon di maid di impainilan Moses an mumpadiy tanud Judah. 15Mu ad uwani ya nakainnila mon hi Jesu Kristoy natag-en padi an umat ke Melkisidek. 16Numbalin hi padi an ugge nipuun nah tugun an kananay abunay tanud Libay di mumpadi, mu gapuh kandaman di biyag nan maid di poppog na. 17Makulug hituwe te nan nitudok an kalin Apu Dios ya kananay "Tinuddu dakan ha-on an mumpadi ta nangamung umat hi kinapadin Melkisidek." 18Ta ad uwani ya napoppog hidiyen tugun Moses mipanggep hi pumpadiyan te waday kudang na. 19Te maid di ohan tagun makaphod hi hinangngab na gapuh pangun-unudana nah Tugun an intudok Moses. Mu maphod ta wada nan nihannot an pangidinolan taku an hi Jesu Kristo. Hiyay pangidinolan takun mangihayyup ke ditakun Apu Dios. 20Ya nahamad di kinapadin Jesu Kristo an adi umat hanadah padin di Judyun tanud Libay te insapatan Apu Dios an kananay "Ha-oy an hi Apu Dios ya isapatak an he-a ya mumpadi kat inggana. Ya hinaen ninomnom ku ya adi mabalin an mahannotan." 22Kinali hi Jesus di kipuunan di umannungan nan kudkudukdul an planun Apu Dios mipanggep hi kibaliwan taku. 23Hanada ken papadin tanud Libay ya dakol da te nate key oha on waday nihannot, kinali maid ke diday munnananong an padi. 24Mu adi umat hidin Jesus te hiyay mumpadita inggana te matagut inggana. 25Kinali hiyay ongal di kandamanan mangibaliw hanadah mundinol ke hiya ta mihayyup dan Apu Dios te hiya ya wadat nangamung an mangitakdog ke ditaku. 26Ta hidiye nan hi Jesus tuwalin natag-en padiy mahapul taku. Te hiya ya makakkaphod an abu an maid di liwat na, adi umat ke ditakun tatagu. Hiya ya impatag-en Apu Dios ta hiyay katagtag-ayan am-in, takon di nadan wadah langit. 27Hi Jesus ya adi umat hanadah natag-en padin mangitakdog hi tatagu ke Apu Dios, te hay pangat da ya mahapul an kabigabigat on immiappit dan Apu Dios an iappitan da ni-an di liwat da ne ahida nuppe in-appitan di liwat nadan tatagu. Mu hi Jesus ke ya adi athidi, te numpinghan di nangiappitanah adol na handih nangikatayanah liwat taku ta adi mahapul an ena ipanidwan umiappit. 28Handida ken natag-en papadi ya nipuun nah Tugun Moses di napiliyan da ya tagu da ya abu an naliwat da. Mu indani ya tinuddun Apu Dios nan Imbabalena an insapata nay pumpadiyana te hiya ya maid di pungkudangana ta inggana te impaka-un-unud nan am-in di pinhod Amana.

will be added

X\