1 Ta hidiye nan gapu te hi Jesus an Apu takuy katagtag-ayan ya mahapul an ihamad takun mangun-unud nah tugunan dingngol taku te indani ya makal-iwan. 2 Nan Tugun Apu Dios an impainilan nadan anghel na ke Moses ya nipainilay kahamad na. Te hanadan ugge nangun-unud kediye ya nakastigu da mipuun hi uggeda nangun-unudan. 3 Ditaku ke ya namammam-ay kastigu taku hin nguddanon takun adi hangudon di kibaliwan taku. Hi Apu takuy namangulun nangipainila ketuwen kibaliwan taku ya hanadan nangngol ke hiya ya diday nangipainila ke ditaku an makulug hituwe. 4 Takon hi Apu Dios ya impatibona an makulug hituwe, te indatana didah kandama da ot atoaton day dakol an milagro ya indat na bo hanadah mangulug di nunhihinnatkon an kabaelan dan malpuh Espirituna an miunnud nah pinhod na. 5 Hantuh panannotan Apu Dios hantudah wadad uwani hi balu an hidiye nan emi ipainiinilad uwani ya bokon nadan anghel di tinuddu nan mun-ap-apu, mu ditakun tatagu. 6 Matiboh tuwe nah nitudok an kinalin din patul an hi David an kananay "Apu Dios, hay tagu ya nababa, yaden tipet pakannomnomom ya pakaippaptok mu dida? 7 Lintum dida an nababbaba mu hanadan anghel ya abu. Ya ongal di nangipadayawam ke dida, 8 te diday tinuddum an pun-ap-apun di am-in." Hidiyen nitudok an kananay tinuddun Apu Dios an hay taguy mun-ap-apun am-in hi nganneh diye ya ugge ni-an naat, kinali maid ni-an di pangitib-an taku. 9 Mu inila taku an umannung hituwe te hay naat ke Jesus. Te gapuh hayudut Apu Dios hi tagu ya impababana ni-an di saad Jesus mu hanadan anghel ot mumbalin hi tagu ot ikatenay liwat takun tatagu. Mu ugge numbayag hidiyen nipababaana te handih nagibbuy nunholholtapana ya impatag-en bon Apu Dios. Ta hiya moy nakattag-e ya madayaw an Ap-apu te hay nangikatayanah liwat taku. 10 Hi Apu Dios an nunlutun am-in hi nganneh diyen wadad uwani ta kidayawana ya maphod hidiyen nangiabulutana hi nunholholtapan Jesus. Te gapuh nangatanah di ya dakol day tatagun nibilang an imbabalena ta mabalin an milak-am dah kidayawan Jesus hi langit. Ya hidiyen nunholholtapanay nangipahamad hi pun-ap-apuwana ta maid di pungkudanganan mangibaliw ke ditaku. 11 Hi Jesus ya ingkate nay liwat taku ta mapakomaan taku ta wadan miunnud di pangi-e taku nah pinhod Apu Dios. Bokon ya abuh diye te am-in takun da Jesus ya ohay Ama taku an hi Apu Dios. Ta hidiye nan adi bumain hi Jesus an mangali an tulang ditakun hiya. 12 Hituwe ya miunnud nah nitudok an kananay "Apu Dios, ipainilak hanadah tutulang kuy mipanggep ke he-a. Ya mid-umak ke didan makikankantah pundayaw dan he-a." 13 Kanana boy "Hi Apu Dios di pangidinolak." Ya kanana boy "Dehtuwak an midmid-um hanadah imbabalen Apu Dios an indinol nan ha-on." 14 Tedeyan ditakun imbabalen Apu Dios an kanan Jesus di tulang na ya tagu taku ya abu ya waday katayan taku, kinali numbalin hi Jesus hi tagu ot mate ot ahi mamahuwan, an hidiyey nangapputanan Satanas an kalpuwan di kate. 15 Kinali adi taku mo tumakut hi kate. Handi ya hay takut takuh katayan takuy kay nangdon ke ditaku, mu ad uwani ya nalibli taku mon diye. 16 Kinali makattibo mon hay baddangan Jesus ya ditakun tinanud Abraham an bokon hanadan anghel. 17 Ta hidiye nan numbalin hi tagun umat ke ditaku ta hiktamanay innun di punligatan di tagu ta hummok ke ditaku ya pundinolan taku an natag-en padin mangitakdog ke ditakuh hinangngab Apu Dios ta mabalin an mapakomaan di liwat taku. 18 Kinali hiyay bumaddang ke ditaku nah panaulan Satanas ke ditaku te takon di hiya ya impatnan Satanas an haulon ya hiniktamana damdamay ine-en di ligat.
