Galatas 2

1Nala-uy himpulut opat an toon ot mibangngadak ad Jerusalem an ingkuyug ku da Barnabas ke Titus. 2Immeyak hidi te impainilan Apu Dios an mahapul an umeyak. Dimmatong kamih di ot ayagak nadan mangipangpanguluh mumpangulug ot ab-abbu kamin nunhuhummangan ot kalkalyok ke diday ek intuttudu hanadah bokon Judyu mipanggep hi ine-en di pangibaliwan Jesu Kristo ke ditaku. Man-uke ya mahapul an abuluton ya takdogan nadan mangipangpanguluy ituttuduk, te deket adida ya kalyon nadan kumahing ke ha-on di adi makulug di ituttuduk. Mu maphod ta inabulut da, 3kinali uggeda impapilit an mumpakugit nan ibbak an hi Titus an bokon Judyu takon di hidiyey pangi-e min Judyu. 4Mu wadada hanadan udum an Judyun kahinkulkuluggon dan Jesu Kristo an nid-um dan dakami an pinhod dan makugit hi Titus, mu uggemi inabulut. Nakiamu-amung dan dakami te pinhod dan dadagon nan nalibliyan mi nah pangi-en di Judyu te hay nangulugan min Jesu Kristo. Man-uke ya pinhod dan ipilit an un-unudon miy pangi-en di Judyu ta diday maunud. 5Mu nginhe mi dida te adimi pinhod an makamkamhan hi nihallan tuttudu nan mituttudun dakayu an mipanggep ke Jesus. 6Hanadan nungkatag-en mangipangpanguluh mangulug hidi ya maid di eda hinannotan ya maid di eda inid-um nah intuttuduk. Takon di kanak di nungkatag-e dadiyen mangipangpangulu, mu hi punnomnom ku ya nun-iingngo takuh hinangngab Apu Dios. 7Datuwen mangipangpangulu ya abuluton dan ha-oy di nangidinolan Apu Dios an mangipainila mipanggep ke Jesu Kristo hanadah bokon Judyu. Athidi damdaman Pedro an hiyay nangidinolan Apu Dios an mangipainilah mipanggep ke Jesu Kristo hanadah ibbamin Judyu. 8Hi Apu Dios ya nun-ingngoy baddang na ke dakamin duwa ke Pedro hanah indinol nan ngunumi. Hi Pedroy mun-apostoles hanadah Judyu ya ha-oy damdama hanadah bokon Judyu. 9Hanadan matbal an mangipangpanguluh mangulug an da James, hi Pedro, ya hi Juan ya inabulut da an hi Apu Dios di nangidat tuh ngunuk. Ta hidiye nan nakialamanu dan dakamin duwa ke Barnabas hi pangipatib-an dan abuluton dan ibba dakamin muntuttudu. Ot inhuhummangan min am-in an dakamin Barnabas di nangamung an e muntuttudu hanadah bokon Judyu ya dida damdamay e muntuttudu hanadah ibbamin Judyu. 10Hay imbaga dan dakami ya adimi anhan kal-iwan an baddangan nadan nungkawotwot ad Jerusalem. Mu hidiye ke ya takon nin di adida kalyon ot hidiye pe tuwaliy pinhod kun aton. 11Nagibbuh diyen nunhuhummanganan mi ot ume kamid Antioch. Mada-dai ya inhawwang Pedroh di. Kediyen kawada nah di ya waday inat nan adi maphod ot boh-olak hi hinangngab di dakol an tatagu. 12Te handih ugge ni-an dimmatong nadan Judyun ibban James ya makikakikan hi Pedro hanadah bokon Judyu an mangulug ke Jesus, mu handih dimmatong da ya pinninghan an makikan ot loktat ya intikod na te umagol hi pamihulan nadan ibbamin Judyu an mangalin pani-oy midmid-um hanadah bokon Judyu an ugge nakugit. 13Ta hidiye nan takon hanadan udum an Judyuh di an mangulug ya in-un-unud dan Pedro. Ta am-in da, takon hi Barnabas ya intikod da mon makikan hanadah bokon Judyu, takon di iniladan adi panioh diye. 14Ot handih ininnilak hidiyen at-atton dan adi miunnud nah mituttudu mipanggep ke Jesu Kristo ya binoh-olak hi Pedro, yaden dakol day iibbamin mangulug an mangmangngol. Kanak di "Deyan he-a ya tonok kan Judyu, mu inwalong mu nan pangi-e takun Judyu te nipainilan he-a an adi mo mahapul te maid di hilbina, ya tipe bot ad uwani ya intikod mun midmid-um hanadah bokon Judyu? Kenaen at-attom ya pilitom nadan bokon Judyu an mangun-unud hi pangi-e takun Judyu. Nihallah tuwen inat mu!" 15Ot ahik kanan ke didan am-in di "Makulug an ditakun Judyu ya adi taku umat hanadah bokon Judyu an nakaliwwat an uggeda inila nan Tugun Apu Dios. 16Mu takon di athidi ya inila taku mo an hay pambalan Apu Dios hi ohan tagu ya gapuh pangulug nan Jesu Kristo, bokon hay pangun-unudanah Tugun takun Judyu. Ta hidiye nan takon di ditakun Judyu ya nangulug takun Jesu Kristo ta mibilang takun maphod ke Apu Dios, te maid di tagun e matbal ke hiya gapuh pangun-unudana nah Tugun takun Judyu. 17Kinali ditakun Judyu ya naliwat taku damdama te gulat nat ugge taku ya adi mahapul an idinol takun Kristoy pambalan Apu Dios ke ditaku ta mapakomaan taku hi ugge taku nangun-unudan nah Tugun. Ta hidiye nan adi taku mo idinol nah Tugun hi pambalan Apu Dios ke ditaku. Mu takon di athidi ya adi taku kanan di iabulut Kristo an munliwat taku te adi mabalin di athidi. 18Makahhapul an maawatan taku an nihalla taku hin nomnomon takun tobalon ditaku ke Apu Dios gapu te hay pangun-unudan taku nah Tugun di Judyu. Adi taku mo idinol kediyen Tugun te maid moy hilbina, kinali munliwat taku hin etaku bo ituttudu an mahapul an un-unudon hidiyen Tugun. 19Man-uke ya adinadaman etaku pakaun-unud nah Tugun, kinali bokon moh diyen pangidinolan taku hi kibaliwan taku. Idinol taku ot ya abuh hayudut Apu Dios an hidiye nan nangikatayan Jesus hi liwat taku ta hi Apu Dios di un-unudon taku. 20Umat ke ha-on an bokon mo nan Tugun di pangidinolak, mu hi Kristo te kay hanan nakikateyak ke hiya handih natayanah krus. Hay ine-en di nitaguwak ad uwani ya adi umat handi te wada moh Jesu Kristo ke ha-on. Hituwen balun nitaguwak ya gapuh pangulugak nah Imbabalen Apu Dios an hi Kristo an ongal di pamhod nan ha-on ot mate ta kiphodak. 21Deket nan Tugun di Judyuy pangidinolan takuh pambalan Apu Dios ke ditaku ya maid moy dinol takuh hayudut na an hidiyey gapunah nangitud-akana ke Jesus ot ikatenay liwat taku. Te kon gulat nat athidi ya maid moy hilbinan ditaku hanan e natayan Jesus hi krus."

will be added

X\