So cherde e Apostole 26

1Ot kanan Agripa ke Pabloy "Kumali kat donglon miy ihumang mu hanah ipabahul nadan Judyu ke he-a." Timmaddog hi Pablo ot kananay 2"Apu Agripa, mun-am-amlongak an wada kad uwani ta donglom di ihumang ku hanadah ipabahul nadan Judyu ke ha-on. 3Te he-a ya impakainnilam di pangi-en di Judyu ya nadan gumapuh punhahallaan. Kinali donglom ahan tun kalyok. 4Hanadan Judyu ya inila day pangi-ek nipalpuh kaungak ingganad uwani te bimmoble kami ya takon handih kawadak ad Jerusalem ya inila day pangi-ek. 5Inila da kaya, muden adida kalyon di makulug an ha-oy ya Phariseeyak an paka-un-unudok di pangat di Judyu. 6Hay kakuluganan tipet deyak hitud uwanin mahumalya ya hay pangulugak an ahi umannung din kalin Apu Dios handidah aammod mi an ahi mamahuwan di nate. Hay nipuunan tun pangulug ku ya hay nunmahuwan Apu Dios ke Jesu Kristo dih natayana. 7Ya takon nadan ibbak an Judyu ya kulugon dan ahi mamahuwan di nate, ta hidiye nan nahalman di pundayaw da ke Apu Dios hi kabigabigat ya kahilohilong yaden eda kanan di hidiyey gapunah numbahulak, Apu Agripa." 8Ot kanana hanadah naamung hidiy "Antipe ahan ta dakayu ke ya ligaton yun kulugon an hi Apu Dios ya mahuwanay nate? 9Man-u te ha-oy ke damdama handi ya kahingak nah mituttudu mipanggep ke Jesus an iNasaret ot atok am-in di kabaelak an mangipaholholtap hanadah mangulug ke hiya. 10Athidiy inainat kud Jerusalem. Dimmawatak hi kalebbengak hanadah ap-apun di padi ot pun-ipakalabut ku nadan mangulug ke Jesus. Ya deket waday kanan dah pipate da on timbal ku. 11Immeyak hanadah simbaan di Judyu ot paholholtapok nadan mangulug ta kanak ot ta itikod dan mangulug ke Jesus. Namahig di boh-ol kun dida ta takon di binumtik dah nidawwin boble on inunud ku dida ta ek paholholtapon dida." 12"Hituwey gapunah nangidatan nadan ap-apun di padi ke ha-on hi kalebbengak an e mampap hanadah mangulug ad Damascus. 13Maal-algo kediye, Apu Agripa, an manatong kami ad Damascus ya maid maptok ya waday inang-ang kuh dilag an nalpuh kabunyan an makappat-al mu hay algo ot madilagan di nunlinikkod ke ha-oy ya nadan ibbak 14ya natu-i kamin am-in. Indani ya waday dingngol kun kimmali an ingkalina nah kalin di Judyu an kananay `Saul! Saul! Antipet eyak punholholtapon ke he-a? Itikod muh naen at-attom te maid damdamay hilbina ke dida ya he-a ot ya abuy mahmok.' 15Ot kanak di `Apu, dahdi ka?' Ya kananay `Ha-oy hi Jesus an punholholtapom. 16Tumaddog ka. Numpatibowak ke he-a te he-ay pinilik an mangipainilah tatagu mipanggep ke ha-on an tinibom ad uwani ya nan udum an ahik ipainilan he-ah udum hi algo. 17Itud-ak dakah kad-an nadan Judyu ya bokon Judyu an e mangipainilan ha-on. Ipaptok dakan ha-on ta maid di ad-adih aton dan he-a. 18Ipainilam di mipanggep ke ha-on ta mapat-alan di nomnom da an iwalong da nadan gaga-ihon at-atton da ya hi Apu Dios moy un-unudon da an bokon hi Satanas. Ya mangulug dan ha-on ta mapakomaan di liwat da ya mibilang dan tatagun Apu Dios.' 19Kinali Apu Agripa, hidiyen kinalin Jesus ke ha-on handih numpatib-ana ya hidiyey un-unudok. 20Hay namanguluh nangayak ya ad Damascus ot ahid Jerusalem ya hanadah kabobboled Judea ot ahi nuppe nadah kad-an di bokon Judyu. Intuttuduk hanadah tataguh di ta muntutuyu dah liwat da ta hi Apu Dios moy un-unudon da ya ipatibo da nadah at-atton da an nuntutuyu da. 21Hituwey gapunah nampapan nadan Judyu ke ha-on handih wadaak nah templo ta eyak ot patayon. 22Mu nipalpun dih nuntuttuduwak mipanggep ke Jesus ta ingganad uwani ya binanaddanganak ke Apu Dios ot maid di naat ke ha-on ta deyan ad uwani ya hiyay ipainilak am-in hi tatagu, nababa weno natag-e. Hituwen kalkalyok ya hidiye din inabig Moses ya handidan profetas an ahi maat hi udum an algo 23an kanan day `Nan Kristo an tinuddun Apu Dios an mangipaptok hi tagu ya ahi munholholtap ta mate. Mu hiyay mamangulun mamahuwan ta ipainilana hanadah Judyu ya bokon Judyuy mipanggep hi kibaliwan da.'" 24Handih pungkalin Pabloh diye ya tinumkuk hi Festus an kananay "Mun-ango ka, Pablo! Impun-ango daka nah inadal mu." 25Himmumang hi Pablo ot kananay "Apu gobernador Festus, adiyak mun-ango te tun kalkalyok ya makulug ya bokon athidiy kalyon di mun-ango. 26Adiyak umagol an mangalkali ke datuweh hinangngab Apu patul Agripa te inila nay mipanggep ke datuwe. Inilak ot inilana dadiyen naat te nundingngol hi kabobboble. 27Apu patul Agripa, kon adim kulugon nan intuttudun handidan profetas? Inilak ot kulugom!" 28Mu kanan Agripa ke Pabloy "Kon pangalim on na-ala ya kulugok di kinalim ta mumbalinak an Kristiano?" 29Ot kanan Pabloy "Takon di bokon ad uwaniy pangulugam, mu ta hi udum hi algo ot anhan ya mangulug ka. Idasal kun Apu Dios ta am-in kayun mangmangngol tuh kalkalyok ad uwani ya ahi kayu mangulug ke Jesus ta umat kayun ha-on hi pangulug, mu bokon hantun nabangkilingak." 30Nagibbun kinalin Pabloh diye ya timmaddog nan patul an hi Agripa, nan gobernador an hi Festus, hi Bernice ya hanadan udum an nakiamung ke dida 31ot lumah-un da ya waday ohan dida on kananay "Maid peman di bahul tun tagu an humlun hi ena katayan weno ena kikalabutan." 32Kanan Agripa ke Festus di "Gulat na ot ta uggena imbaga an hay ap-apu takud Romay munhumalyan hiya ya damanan mipa-e ot ad uwani."

will be added

X\