So cherde e Apostole 23

1Intokkol Pablo hanadah munhumalyan hiya ot kananay "Iibba dida, maid di bahul kuh hinangngab Apu Dios te am-in nadan inat ku ingganad uwani ya hiyay pinhod kun paamlongon." 2Gapu kediyen kinalin Pablo ya impaapap nan natag-en padin hi Ananayas di tokon Pablo hanadah nihag-on ke hiya. 3Ot kanan Pablo ke Ananayas di "Kay ka maphod hin wada kah hinangngab di tatagu, mu gaga-ihoy wadah nomnom mu. Hi Apu Dios di mangibalo tuh inat mun ha-on te punhumalyaak mipuun hi Tugun Apu Dios, yaden uggem inun-unud hidiyen Tugun tedeyan impaapap muy tokok. Kon hidiyey kanana nah Tugun Apu Dios?" 4Ya kanan nadan tatagun nihag-on ke Pablo di "Antipe udot ta athinay pangalim nah natag-en padin Apu Dios?" 5Ot kanan Pabloy "Iibba, uggek inila an hiya nan natag-en padi te gulat nat inilak ya uggek ot in-athidi te waday impitudok Apu Dios an kananay `Adi kalyon di adi maphod hi ap-apu.'" 6Handih tinibon Pablo an wadaday Saducee ya Pharisee ya inlot nay kalina an kananay "Ha-oy ya Phariseeyak ya Pharisee da damdamay aammod ku. Deyak hitun mahumalya te kulugok di kamahuwan di nate." 7Dingngol nadan Saducee ya Pharisee hidiye ya munhahannu da, kinali adi mun-uunnud di panumalya da 8te hanadan Saducee ya adida kulugon an mamahuwan di nate ya adida kulugon an waday anghel ya waday linnawan di tagu, mu hanadan Pharisee ya kulugon da datuwen tulu. 9Indai ya muntututut da mo ahan ya hanada ken udum an Pharisee an mangituttuduh Tugun Moses ya timmaddog da ot kanan day "Nganne peman di bahul tun tagu? An wada ke peman di kimmalin anghel weno espiritu ke hiya ya nganney ad-adin diye?" 10Ya namam-an kay da mo ahan mumpapatte ta timmakut nan ap-apun di tindaluh maat ke Pablo an dehdin nah gawwada, kinali immitud-ak hi tindaluna ta ibangngad dah Pablo nah pungkampuwan da. 11Kediyen hilong ya numpatiboh Apu takun hi Jesus ke Pablo an kananay "Adika tumakut. He-ay ahi mangipainila mipanggep ke ha-on ad Roma umat nah nangipainilam ke ha-on hitud Jerusalem." 12Kabigatanan diye ya nunhuhummangan nadan udum an Judyu mipanggep hi pamatayan dan Pablo. Inhuhummangan da an adida mangan ya adida uminum ingganay patayon da. 13Nahuluk hi nap-at an Judyuy nangihummangan kediye. 14Imme dah kad-an nadan ap-apun di padi ya nadan mangipangpangulun Judyu ot kanan dan diday "Hinamad min inhuhummangan an adi kami mangan ya adi kami uminum ta ingganay patayon mih Pablo. 15Dakayun ap-apuy munhaul nah ap-apun di tindalun iRoma ta kanan yuy `Paaliyom hi Pablo te pinhod min pakahummalyaon.' Ya deman ot an ahimi botakon nah dalan ta patayon mi." 16Mu dingngol nan lalakin imbabalen nan babain tulang Pablo hidiyen eda inhuhummangan ot ena idatdatong ke Pablo nah kampu. 17Inayagan Pablo nan ohan ap-apun di tindalu ot kananan hiyay "Iem tun unga nah kad-an nan natag-en ap-apun di tindalu te waday pinhod nan kalyon." 18Ot ipangulun diyen ap-apun di tindalu nan unga nah kad-an nan natag-en ap-apu da ot kananan hiyay "Nan nibalud an hi Pablo ya kalyonay ialik tun ungah kad-am te wada kanuy pinhod nan kalyon ke he-a." 19Inawit nan natag-en ap-apu nan unga ot dih duwa da ya abu ya kananay "Nganney pinhod mun kalyon ke ha-on?" 20Kanan nan ungay "Nunhuhummangan nadan Judyu an hi bigat ya ibaga dan he-a ta ipaem hi Pabloh kad-an da ta pakahummalyaon da kanu. 21Mu adim kaya iabulut te wadaday nahuluk hi nap-at an tatagun mumbotak nah dalan an mamaten hiya. Hinamad dan inhuhummangan an adida mangan ya adida uminum ingganay patayon da. Dehdi dan nundadaan da an hadhad-on day pangiabulutam ke Pablo an umeh di." 22Ot kanan nan ap-apun di tindalu ke hiyay "Adim kalkalyon hi udum an tatagu an indatdatong muh tuwen ha-on." Ot itud-ak na. 23Impaayag nan natag-en ap-apun di tindaluy duwan ap-apun di tindalu ot kananan diday "Hi hilong ya mundadaan kayuh duway gatut an tindalu, napitun tindalun mungkabayu ya duwan gatut bon tindalun numpinahul ta ie yuh Pablo ad Cesarea. 24Mahapul an waday kabayun puntakkayan Pablo ya tibon yu ta maid di maat ke hiya inggana idatong yuh kad-an gobernador Felix." 25Ot muntudok nan natag-en ap-apun di tindalu ke gobernador Felix an kananay 26"Madayaw an apu gobernador Felix. 27Tun tagun ipaalik hi kad-am ya dimpap nadan Judyu ya eda ot patayon, mu imme kami hanadah tindaluk ot emi awiton te ininnilak an hiya ya tagun di Roma. 28Pinhod kun inilaon di kanan dan bahulna ot iek hi kad-an nadan ap-apun di Judyu. 29Hay ininnilak ya numbahul te kahingona ya adina un-unudon di pangat di Judyu. Maid di udum hi inilak an bahul nan gumapuh pamatayan weno pangikalabutan ke hiya. 30Ya handih dingngol kun wadaday Judyun nunhuhummangan an mamaten hiya ya ninomnom kun ipaalih kad-am. Kinalik hanadah mangidiklamun hiya an umali dah kad-am ta he-ay pundiklamuwan da. Abunah tuwen kalyok ke he-a. Ha-oy an hi Klaudius Laysias." 31Inun-unud nadan tindalu nan kinalin nan ap-apu da ot hilong kediye ya in-e dah Pablo ingganad Antipatris. 32Nabigat kediye ot mibangngad nadan nundallan an tindalu hi kampu da ot abuna mo nadan nungkabayun tindaluy nangien Pablo. 33Dimmatong dad Cesarea ot idat da nan tudok nah gobernador ya impaboltan dah Pablo ke hiya. 34Binidbid nan gobernador nan tudok ot mahmahanay boblen Pablo. Handih ininnila na an iCilicia ya 35kananay "Ahik donglon di kalyom hantuh aliyan nadan mangidiklamun he-a." Ot ahina ipipaeh Pablon nah balen din patul an hi Herod.

will be added

X\