So cherde e Apostole 1

1Tulang ku Teofilo, Handin namangulun tudok kun he-a ya intudok kun am-in di mipanggep hi inat ya intuttudun Jesus nipalpu handih nangilappuwanan nuntuttudu 2ot inggana handih timmalakdanganah langit. Mu handih ugge ni-an timmalakdang hi langit ya waday intugunan nalpuh Espiritun Apu Dios hanadah pinili nan Apostolesna. 3Nipalpu handih namahuwana ingganah tinalakdanganah langit ya nap-at di algon oggan mumpatibo hantudah Apostoles na ya dakol di inainat nan nangipainilan dida an makulug an namahuwan ya intuttudu nan diday mipanggep hi pun-ap-apuwan Apu Dios. 4Naminghan an mangmangngan dan am-in ya kananan diday "Adiyu ni-an taynan hitud Jerusalem ta had-on yu nan kinalin Ama an ipaali nay Espirituna an hidiye din kinalik ke dakayu. 5Hi Juan ke ya danum di numbonyag na hanadah tatagu, mu dakayu ke ya adi mala-uy kaatnan algo ya mabonyagan kayuh Espiritun Apu Dios." 6Wada boy numpatib-an Jesus ke dida ot kanan dan hiyay "Apu, kon ad uwaniy pangibangngadam hi gubilnu takun Judyu an tanud Israel?" 7Ya kanan Jesus ke diday "Hinae ke ya nangamung hi Ama te hiyay Apun di am-in, kinali adi mahapul an inilaon yu. 8Mu ahiyu dawaton nan Espiritun Apu Dios ta waday kabaelan yun mangituttuduh mipanggep ke ha-on hitud Jerusalem, nadah udum an bobleh tud Judea, ad Samaria, ya am-in hi kabobboble tuh luta." 9Kinalina datuwe ya tinibo dan manalakdang hi langit ot loktat ya hinaniyan di kulabut ta adi mo matibo. 10Handih itatangad dah kabunyan ya kal-inadi ya waday duwan tagun numbulwatih mumbobola an nipaldang ke dida. 11Ya kanan dadiyen duwan taguy "Dakayun iGalilee, tipet itatangad yuh kabunyan? Hidiyen hi Jesus an tinibo yun immeh langit ya ahi bo umali. Hay inat nan timmalakdang ya athidi boh ahina kibangngadan." 12Nagibbuh diye ot tayanan nadan apostoles nan bilid an Oliba ot mibangngad dad Jerusalem an ohan kilometroy kadinawwina. 13Dimmatong dad Jerusalem ot humgop da nah kuwaltun kiha-adan da nah mikadwan gladun nan bale. Dadiyen hinumgop ya da Pedro, hi Juan, hi James, hi Andres, hi Felipe, hi Tomas, hi Bartolome, hi Mateo, hi James an imbabalen Alfeo, hi Simon an oha hanadah Zealot ya nan hi Judas an imbabalen James. 14Am-in da ya nadandani on naamung dan mundasal. Takon nadan tutulang Jesus ya hi inanan hi Maria ya hanadan udum an binabai ya nakiamu-amung dan makidasal ke dida. 15Ohan algo ya naamung nadan mangulug an umeh hinggatut ta duway puluy ngam-ut da ya timmaddog hi Pedro ot kananay 16"Iibba, immannung tut-uwa nan kinalin din hi David an impainilan nan Espiritun Apu Dios ke hiya. Hay kinalina ya mipanggep din hi Judas an nangipangulu hanadah tatagu an nampap ke Jesus. 17Hi Judas di ohan dakamin himpulut duwan apostoles te hiya damdamay ohan napilin nah ngunumi." 18(Hanan pihhun tangdanah nangihdulanan Jesus ya nigatang hi luta. Ot hidiy nuntayunana ot mag-a ot mabughiy putuna. 19Am-in nadan tatagud Jerusalem ya dingngol dah diye ot ingadanan dah diyen luta hi Akeldama an hay kibalinanah kalida ya lutan nadalaan.) 20Ot ituluy bon Pedro an kananay "Hay impitudok Apu Dios hi maat ke Judas te hay inat na ya wada nah liblun Psalms an kananay `Ahi malgangan ta nangamung nan balena te maid di e miha-ad hidi.' Nitudok bo an kananay `Waday ahi mihannot ke hiya nah ngunu na.' 21Ta hidiye nan mahapul an piliyon takuy ohan mihannot ke Judas ta mid-um ke dakami an e mangipainilah mipanggep nah namahuwan Apu takun hi Jesus, mu mahapul an hidiyen piliyon taku ya naki-eki-en dakamin da Jesus hi nangayaayan mi nipalpu dih namonyagan Juan ke hiya ingganan dih immeh langit." 23Ot ituddun nadan naamung di duwan pumpiliyan da an da Jose Barsabas an hi Justus di ohan ngadana ya hi Matias. 24Ot mundasal da an kanan day "Apu Dios, inilam am-in di nomnom di tagu, kinali ituddum ad uwani hin dahdi ke datuwen duway pinhod mun 25mihannot ke Judas an nangiwalong hi kinaapostolesna ot ume nah niappitana pe tuwali." 26Nagibbun nundasal da ot mumbubunut da ya hi Matias di napilin mihannot ke Judas ot hiya moy mid-um hanadah himpulut ohan apostoles Jesus.

will be added

X\