O duito Timoteo 4

1Hi Apu Dios ya takon hi Jesu Kristo an ahi munhumalyan am-in hi tatagu, nate ya matagu hantuh pumbangngadanan mun-ap-apu ya inila dah tuwen itugun kun he-a. 2Atom am-in di kabaelam an mangipainilah kalin Apu Dios takon di ngannen tiempo ya takon di tobalon da weno pihulon da. Ihamhamad mun muntuttudu ta mangulug day mangngol. Tugunom nadan mangamangat hi gaga-iho ta itikod da. Ya tugunom damdama nadan mangulug ta ihapot dan mangat hi maphod. An-anusam an muntuttuduh kalin Apu Dios hanadah tatagu takon di mabayag ta ahida maawatan. 3Te wadan tuy algon na-ala ya adi donglon di tataguy makulug an mituttudu an waday oha on e maniboh muntuttudun dida takon di nibahhoy ituttudu dan dida, mu ta miunnud nah pinhod dan donglon. 4Iwalong day makulug an mituttudu ta hay nihalla an nalpuh nomnom di taguy un-unudon da. 5Mu he-a ke ya mahapul an takon di nganne ya papohdanam di atom, anusam di nganneh diyen punligatam gapuh pangun-unudam ke Apu taku, itultuluy mun mangituttuduh mipanggep ke Jesu Kristo hanadah tatagu ya atom am-in nan ipangunun Apu Dios ke he-a. 6Kalyok ke he-an am-in datuwe te gagala mon madatngan di tiempon panayanak tuh luta te nundadaanak an mate gapuh pangun-unudak ke Apu Dios. 7Inat kun am-in di kabaelak ot atok di indinol Apu Dios ke ha-on, ot ad uwani ya nagibbu mo. Umatak nah maki-apput an nangapput te inun-unud kun am-in di tugunan ha-oy ya impunnanong kuy pangulug ku. 8Ot ad uwani ya madinolak an wada nan mihmih-od ke ha-on an hidiye nan makakkaphod an ahik gun-udon an idat nan limpiyun Apu taku hantuh ahina punhumalyaan. Mu bokon ya abu ha-oy di pangidatanah athidin gun-udon te takon nadan udum an munho-ho-od hi kibangngadana. 9Daan mot deket mabalin ya nangin-a-ali kah tu 10te deyan nunhintatayyananak, hi Demas ya hay nitaguwana tuh lutay nonomnomona ot umed Tesalonika. Da ke damdama Cresente ke Titus ya maid dah tu. Immeh Cresente ad Galatia ya imme damdamah Titus ad Dalmatia. 11Takon hi Taykikus ya maid hitu te intud-ak kud Ephesus ta abuna moh Lucas an dehtu. Hantuh aliyam ya ikuyug muh Marcos te mahapul kun bumaddang ke ha-on hi ngunuk. 13Adim kal-iwan ta ahim dag-uwon nan mahdol an bulwatik an imbatik hi balen da Korpus ad Troas. Ya pakial-alam nadan libluk, immam-ana ahan nan naluddun an papel an natudkan. 14Hi Alexander an ohan mumpanday ya himpappangey inat nan ha-on, mu nangamung hi Apu Dios an mangibalo. 15Kinali halipat-am ot di atonan he-a te namahig di ngohena nah intanuttudu taku. 16Handih namangulun nahumalyaak ya maid ahan di nangitakdog ke ha-on te waday oha on timmayan. Mu hana ot ta adi kastiguwon Apu Dios dida. 17Mu takon di nunhintatayyananak hanadah iibbak ya uggeyak tinaynan ke Apu Dios ot baddanganak ke hiya, ta hidiye nan natulidak an mangitultuluy an mangipainilan am-in nah tuttudun Jesu Kristo hanadah bokon Judyu. Gapu boh baddang na ya nihwangak hanadah tatagun nunnomnom an mamaten ha-on. 18Ya athidi bon ahiyak ihwang ke Apu Dios am-in hi ad-adin ma-ma-at ke ha-on ta migappatak nah pun-ap-apuwanah langit. Hiyay midayaw ta inggainggana. Amen. 19Ahim ahan kalyon nah himbalen da Prisila ke Aquila ya nah hin-am-an da Onesiporus an nomnomnomok dida. 20Maid hituh Erastus te tinaynak ad Corinth, ya hi ke damdama Tropimus ya tinaynak ad Miletus te mundogo. 21Tibom ot ta dumatong kah tu ta ahi madatngan di ahi kotolan. Hanadan ibba takun mangulug an da Ebulus, hi Puden, hi Linus, hi Kelaudia ya hanadan udum an mangulug ya kanan day nonomnomon dakayun dida. 22Hana ot ta hi Apu takuy nanongnan wadan ditaku ya hayudutan ditakun Apu Dios.

will be added

X\