O duito Timoteo 3

1Hituwey nomnomom an hantuh dandanin madatngan di aliyan Jesus ya waday nahalman an ligat 2te hay tatagu kediye ya abunay adol day nonomnomon da ya hay pihhuy gagamgaman da. Waday oha on mumpahhiya, panadngolan day ibbada, pakangohayyon day aammod da, adida mumpasalamat hi nibaddang ke dida ya adida nomnomon an un-unudon hi Apu Dios. 3Maid di pamhod da, adida kal-iwan di hingit dah ibbada, makattumbuk da, maid di koloklada, makabbungot da ya hihingngitan dan am-in di nganneh diyen maphod. 4Adinadaman pundinlan dida te takon di ibbada ya ihdul da. Ya adi da nomnomon on inat day aton da, mumpatag-eda ya hay pun-amlongan di adol day nomnomon da an bokon hi Apu Dios. 5Ya it-ok dan mangulug da ya un-unudon dah Apu Dios, mu matiboh pangat da an kahinkulkuluggon da te adida abuluton di baddang Apu Dios an mangipaphod hi pangi-eda. Halipat-am ta adika malalit ke datuwen tatagu. 6Hay udum ke datuwen tatagu ya ume dah kabalebalen e makiap-apnga ya muntuttuduh hinnatkon ta haulon da nadan nalakan maawis an binabain gaga-ihoy atoaton da ta takon di inila dan gaga-iho ya kapyanan aton da. 7Datuwen binabai ya pinhod dan donglon am-in di kumpulmin mituttudun dida, mu adida pakaawat nah makulug an tuttudu. 8Ya dadiyen tatagun e muntuttuduh hinnatkon ya kahingon day makulug an mituttudu, umat ke da Hanes ke Hambres handih done an kinahing dah Moses. Dadiyen muntuttuduh hinnatkon ya gaga-ihoy nomnom da ya adi makulug nan kalyon dan mangulug da. 9Mu adi mangmangnge tuwen at-atton da te ahi inilaon di tatagun langkak dadiyen ituttudu da ta adida mo kulugon dida an umat nimpe ke da Hanes ya hi Hambres. 10Mu he-a Timothy ya inilam an adiyak umat hidi te ha-oy di nangiun-unudam hi puntuttudu, hay pangi-e, hay punnomnom hi pangipaamlongan ke Apu Dios, hay pangulug, hay anus, hay paminhod hi ibba ya hay pangitultuluyan an mangun-unud ke Jesus takon di nganney naat. 11Ya inilam boy nangip-ippolak hi namahig an nangipaholholtapan dan ha-oy dih nangayak ad Antioch, ad Ikonium ya ad Listera, mu maphod ta impaptokak ke Apu taku. 12Mu bokon ha-oy ya abuy mipaholholtap te am-in nadan naminhod an mangun-unud ke Apu Dios gapuh pangulug dan Jesu Kristo ya mipaholholtap da damdama. 13Hanada ken tatagun muntuttuduh hinnatkon an humaul hi ibba dah tagu ya haulon damdaman Satanas dida ta mungkilodlod di kinagaga-ihoda. 14Mu he-a Timothy ya itultuluy mun un-unudon nan nituttudun he-a an hidiye nan inhamad mun kinulug te inilam an dakamin nangituttudun he-a ya damanan pundinolam. 15Ya inilam an nipalpu handih kaungam ya nitanuttudun he-a nan nitudok an kalin Apu Dios an mamat-al hi nomnom di tagu. Hituwen kalinay panginilaan hi ine-en di pangibaliwan Jesu Kristoh tagu gapuh pangulug ke hiya. 16Te am-in nan impitudok Apu Dios an kalina ya bumaddang ke ditaku an mangituttudu hi niptok ya manugun hanadah mangat hi gaga-iho ya nibahho ya bumaddang hi panginilaan an mangat hi maphod 17ta hanadan mangulug ke Apu Dios ya midadaan dan mangat am-in nadah pinhod nan aton da.

will be added

X\