O duito Timoteo 2

1He-an imbabalek Timothy, idinol mun Jesu Kristo te hiya ya mahayudut. 2Nan dingngol mun intuttuduk ke dakayun am-in nadah dakol an tataguy ituttudum damdama hanadah damanan pundinolam, ta ituttudu da damdamah udum an tatagu. 3Ippol muy pakiholholtapam ke dakami gapu nah ngunum te kay ka tindalun Jesu Kristo. 4Hay tindalu ya hay nuntindaluwanay nomnomona, adi makibibiyang hi at-atton di bokon tindalu ta ipaamlong nay ap-apuna. 5Athidi nah makiapput hi ay-ayam an deket adina un-unudon nan maunud an pun-ay-ayam ya adi mangapput. 6Athidi bo nah mahlun mumpayo an deket impaka-ippaptok nay inliyak na ya hiyay dakdakol di aniyona. 7Nomnomom datuwen kinalik ot baddangan dakan Apu taku ta maawatam. 8Adim kal-iwan nan ek itanuttudun mipanggep ke Jesu Kriston holag David an namahuwan. 9Hay ek pangituttuduwan ketuwey gapunan munholholtapak an deyan nabangkilinganak tuh kalabutan an kayak pimmate. Mu takon di nabangkilinganak ya adinadaman mipatikod di kalin Apu Dios an kay nabangkilingan te nanongna damdaman mihinap. 10Kinali ip-ippolak di ligat ku ta mibaliw hanadan pinilin Apu Dios an mangulug ke Jesu Kristo ta milak-am dah kidayawan Jesu Kristo an maid di poppog na te hiyay mangibaliw ke ditaku. 11Makulug hituwen kali an kananay "Deket nilaggat taku nah natayan Kristo ya makitagu takun hiya. 12An-anusan taku key ligat takuh pangun-unudan takun hiya ya ahi taku makiap-apun hiya. Ya deket ibain taku ya ibain ditaku damdaman hiya an kananay bokon ditaku tagu. 13Ditaku ya takon nin di adi taku un-unudon hi Apu Dios, mu hiya ya nunna-ud an paannungonay kinalina te adi munlangkak." 14Ipanomnom mu datuwen kinalik hanadah mangulug hina. Ya kalyom ke didan adi pinhod Apu Dios an punhahannuwan da nadan maid di maphod hi ibaddang na te dumadag ot ya abuh pangulug nadan mangmangngol. 15Atom am-in di kabaelam an mangat nah mangipaamlong ke Apu Dios ta matbal kan hiya. Ya hay niptok di panuddum hi kalina ta adika maba-inan. 16Adim hangudon nadan mituttudun bokon kidayawan Apu Dios te maid di hilbin dadiye, mu humlun ot ya abuh kapa-iyan di pangulug di udum. 17Te danaen ituttudu da ya umat nah gulid an ittay ni-an, mu loktat ya nihinap hi adol. Hanadan duwan tagun tumanuttuduh athina ya da Haymenaus ke Piletus. 18Adi miunnud nah makulug an mituttuduy itanuttudu da te kanan day nagibbu moy kamahuwan di nate. Ta deyan wadada mo hanadan maid di kapotok nay kulugon da. 19Mu takon di athinan wadaday mangituttuduh nibahho ya adinadaman mahannotan nan makulug an tuttudun Apu Dios, te umat nah ongal an batun adi matigan. Athidi bo hanadah makulug an nahamad di pangulug dan hiya, te nitudok an kananay "Hi Apu Dios ya inilana nadan tataguna." Ya kanana boy "Hanadan tatagun kalyon day tagun Apu Dios dida ya mahapul an iwalong day gaga-iho." 20Hanah balen di kadangyan ya deya dahdiy nunhihinnatkon an ngunut. Wadaday nabalol an dadiye nan nakapyah balituk, nadan udum ya nakapyah nabalol an gumok ya wadada boy nalaka an dadiye nan nakapyah kaiw weno pula, mu hanan kadangyan ya nan nabalol di pakaikkaguna an miusal hin waday bisitana. 21Athidi bo nah tagu an deket pinhod nan ibilang Apu Dios ta waday punhilbiyana ya iwalong nan am-in di gaga-ihon at-attona ta midadaan hi kumpulnan pinhod Apu Dios an ipangunun hiya. 22Nomnomom ta adim aton nadan gaga-ihon pun-amlongan di adol an at-atton di mangat-agu, mu hay nomnomom an aton ya hay pangatam hi maphod, ihamad muy pangulug mu ya pamhod mu ya maphod di pakitulangam hanadah nahamad di pundinol dah baddang Apu taku. 23Adim hangudon di nalnalgom an punhuhummanganan te dadiye ya humlun ya abuh punhahannuwan. 24Hay pungngunuwon Apu Dios ya adi makihannu, mu maulen am-in hi tagu, nalaing ya naanus an muntuttudu. 25Mahapul an paulayanan kalyan hanadan kumahing ke hiya ta kay ahan ya baddangan Apu Dios dida ta muntutuyu dah liwat da ta loktat ya inilaon da nan makulug an tuttudu. 26Ta kay ahan kaya, ya pumhod di nomnom da ta makaan dah konan Satanas an nunhaul ke didan mangat hi pinhod na.

will be added

X\