O duito Timoteo 1

1Nalpuh tuwen tudok ke ha-on an hi Pablo an pinilin Apu Dios an pun-apostoles Jesu Kristo ta ipainilak hi tataguy kalin Apu Dios an hanadan migappat ke Jesu Kristo ya waday biyag dan maid di poppogna. 2Muntudokak ke he-a Timothy an ibilang kun napateg an imbabalek. Hana ot ta nanongnan hayudutan daka, homkon daka ya palinggopon dakan da Ama takun hi Apu Dios ya hi Apu takun hi Jesu Kristo. 3Hanah pundasalak hi kabigabigat ya kahilohilong ke Apu Dios an maphod di nomnom kun mangun-unud ke hiyan umat handidah aammod ku ya mumpasalamatak ta nangamung ke hiya gapuh pangulug mu. 4Deke on ninomnom ku din limmuwaam handih nunhi-anan ta, kinali pinhod kun abun tibon daka ta wadan umamlongak. 5Inilak an nan pangulug mun Apu Dios ya umat hi pangulug apum an hi Lois ya hi inam an hi Eunice. 6Kinali ipanomnom kun he-a ta ihamhamad mun mangusal nah kabaelam an indat Apu Dios ke he-a handih nangihakmoak hi taklek hi ulum. 7Te nan Espiritun impaalin Apu Dios ke ditaku ya bokon hiyay kalpuwan di bain, mu hiyay kalpuwan di kabaelan takun munhanggah kumpulna ya ituttudu nan ditakuy pamhod hi ibba ya hay pungkonoknong hi adol. 8Kinali adika bumain an mangituttuduh mipanggep ke Apu takun hi Jesus. Ya adim ibain tun ek nikalabutan gapuh pangun-unudak ke hiya, mu makiholholtap kan ha-on gapuh pangituttuduwam mipanggep ke Jesu Kristo ot pal-oton dakan Apu Dios ta damanan ippol muh diyen punholholtapam. 9Hi Apu Dios ya imbaliw ditaku ot ngadanon ditakun tataguna. Mu bokon gapuh maphod an inat taku, mu gapuh hayudut nan ditaku gapu ke Jesu Kristo te hidiyey ninomnom na tuwali handih uggena ni-an lintu hantudan wadad uwani. 10Ya ad uwani, nipatiboh diyen hayudut na te handih immaliyan Jesu Kristo an mangibaliw ke ditaku ya inapput nay kate hi namahuwana ot impainila nan ditaku an midatan takuh biyag an maid di poppog na gapuh pangulugan taku nah mituttudu mipanggep ke hiya. 11Piniliyak ke Apu Dios an mun-apostoles ta ek ipainilay mipanggep ke Jesu Kristo ya ek ituttuduy ine-en di kibaliwan taku gapu ke hiya. 12Hituwey gapunah punholholtapak, mu adiyak bumain te inilak nan kulugok an hi Apu Dios ya madinolak bon kabaelanan ipaptokak inggana tuh Algon punhumalyaanah tagu. 13Hay itugun kun he-a ya punnanongom an un-unudon nan niptok an tuttudun dingngol mun ha-oy ya punnanongom boy pangulug mu ya pamhod mu gapuh nigappatan takun Jesu Kristo. 14Ya hanan Espiritun Apu Dios an wada ke ditakun mangulug di pangidinolam an bumaddang ke he-an mangituttudu nah indinol Apu Dios ke he-a. 15Inilam, am-in nadan ibba takun mangulug an iAsia ya tinayananak, takon da Pigelus ke Helmogenes. 16Mu maphod ni-mo ta wadah Onesiporus an ugge nangibain ke ha-on hi nibaludak ta oggan umalin mangidung-on ha-on ta umamlongak. Hana ot ta baddangan Apu Dios didan hin-am-a. 17Handi peman dimmatonganah tud Roma ya eyak hinamahamak ingganay hinamakak tuh kalabutan. 18Ya inilam bo an ongal di imbanaddang na handih wada takuh nad Ephesus. Hana ot ta homkon Apu Dios hantuh pumbangngadan Apu takun hi Jesus an munhumalyah tagu.

will be added

X\