O duito Tesalonicenses 1

1Hituwen tudok ya nalpun dakami an hi Pablo, hi Silas, ya hi Timothy. Hituwe ya tudok mi ke dakayun iTesalonika an mangulug ke Apu Dios an hi Ama taku ya ke Apu Jesu Kristo. 2Hana ot ta hayudutan dakayu ya palinggopon dakayun Ama takun hi Apu Dios ya hi Apu Jesu Kristo. 3Maphod di mumpasalamat kamin Apu Dios ta nangamung gapun dakayu te mungkihamad di pangulug yu ya umong-ongal di punhimpopohhodan yu. 4Kinali am-in nah pangayaayan mih emi puntuttuduwan hanadah maamu-amung an mangulug ke Apu Dios hi udum an boble ya dakayuy it-ok mi. Kinalikali min didan mun-am-amlong kami te itultuluy yun mangidinol ke Apu Dios takon di hidiyey gapunah pangipaligligatan di udum an tatagu ke dakayu. 5Mu gapu ketuwen pumpalpaligatan yu ya waday lebbeng yun migappat hi pun-ap-apuwan Apu Dios. Hituwey kitib-anan hiya ya maandong di punhumalyanah tatagu, 6kinali ahina kastiguwon nadan mangipaligligat ke dakayu. 7Ahina poppogon di punligligatan taku hantuh kibangngadan Apu takun hi Jesu Kristo an ibbana nadan makandaman anghel an malpuh langit. Mibangngad ke ya waday mundadalang an apuy hi nunlinikkod ke hiya. 8Umalit kastiguwona nadan ugge nanginilan Apu Dios ya nadan adi mangun-unud hi nituttuduh mipanggep ke Apu Jesus. 9Hay kastiguda ya munholholtap da ta inggana. Ya mihi-an dan Apu taku ta adida tibon nan ongal an kandamanan maid di pangiingngohan. 10Kediyen Algon aliyana ya namahig di pangidayaw am-in nadan tataguna ke hiya. Ahida mamodwong am-in di mangulug te hay kakinaphod na. Ya takon di dakayu ya ahiyu dayawon te kinulug yuy intanuttudu min mipanggep ke hiya. 11Ta hidiye nan idasadasal mi ta mipaphod di pangi-eyu ta miunnud nah pinhod Apu Dios an pumbalinan yuh namiliyanan dakayun tataguna. Ya idasal mi bo an gapuh kandamana ya baddangan dakayun hiya ta waday aton yun mangat hanadah maphod an pinhod yun aton an kitib-an di pangulug yu. 12Hidiyey dasal mi ta gapu nah pangi-eyu ya midayaw hi Apu takun hi Jesus ya ipadayaw dakayu damdaman hiya te ongal di hayudut Apu Dios ya hi Apu Jesu Kristo ke ditaku.

will be added

X\