O duito Pedro 1

1Ha-oy an hi Simon Pedro an apostoles ya muttatyun Jesu Kristo ya muntudokak bon dakayun mangulug. Ditaku ya nangulug taku gapuh baddang Jesu Kristo an Dios an mangibaliw ke ditakun am-in te hiya ya maphod di atona an maid di nangituppuganah baddang na. 2Hana ot ta midatan kayuh munnananong ya ongal an hayudut ya linggop hi panginilaan yu ke Apu Dios ya hi Apu takun hi Jesus. 3Hi Apu Dios an ongal di kandamana ya indat nan am-in di mahapul taku hi kihamadan di pangulug taku ta mabalin an paka-un-unudon takuy pinhod na gapuh nanginilaan taku ke Jesu Kristo an namili ke ditakun milak-am nah kaphodna ya dayaw na. 4Ya gapu ketuwen ongal an kandamana ya indat nan ditaku nadan makakkaphod an kinalinan idat na ta gapun datuwe ya mabalin an dukugon taku nadan gaga-ihon impainghan di tagu tuh luta ta milak-am takuh kaphod na. 5Gapu ketuwe ya aton takun am-in di kabaelan takun mangat hi maphod ta miunnud hi pangulug taku. Ya mahapul bon manomnoman taku 6ya inilaon takun mangonoknong hi adol taku ya anusan takun am-in di punligligatan taku ya paka-un-unudon takuh Apu Dios. 7Ya mahapul bon ipatibo takuy maphod an punhintutulangan ya punhimpopohhodan taku. 8Datuwen am-in di mahapul an aton taku ta deket ihamhamad takun aton datuwe ya umong-ongal di punhilbiyan di nanginilaan takun Apu Jesu Kristo. 9Hay tagun mangulug ke Jesus, mu adina aton datuwe ya hidiyey kitib-anan adi pakaawat hi pangi-en Apu Dios ya kinal-iwanay napakomaan di liwat na. 10Kinali dakayun kaibaiba, mahapul an aton yun am-in di kabaelan yun mangipatiboh kakulug nah namiliyan Apu Dios ke dakayun tataguna te deket iathidi yu ya makulug an maid di e mangihi-an ke dakayun hiya. 11Ta hi udum hi algo ya ongal di amlong Apu Dios an mangabulut ke ditakun migappat nah maid di poppognan pun-ap-apuwan nan nangibaliw ke ditaku an hi Apu Jesu Kristo. 12Kinali ipanomnom ku bon dakayu datuwe, takon di inila yu ya inun-unud yu tuwali datuwe gapuh nihamadan di pangulug yu. 13Inilak an maid uhup ya mateyak te hidiyey impainilan Apu takun hi Jesu Kristo ke ha-on. Mu ad uwanin wadaak ni-an tuh luta ya maphod di ipanomnom ku datuwen dakayu. 15Ta hidiye nan atok am-in di kabaelak an mangipanomnom ke datuwen dakayu hi tudok ku ta takon hantuh maidak ya nanongnan adiyu kal-iwan. 16Hanan impainila min dakayun mipanggep hi kidayawan Apu takun hi Jesu Kristo hantuh pumbangngadana ya bokon ab-abig an kinapkapya mi, te makulug hituwe te inang-ang miy kinatag-ena. 17Te wada kami nah bilid handih nangipatib-an Ama takun hi Apu Dios hi dayaw Jesus. Ya dingngol mi nan nalpuh langit an kalin Apu Dios an makakkaphod an kananay "Hituwey Imbabalek an impakappinhod ku ya mangipaamlong ke ha-on." 19Hidiyen naat di immannungan nadan inabiabig handidan profetas dih done mipanggep hi kidayawan Jesus. Kinali hay maphod ya ihamad yun inilaon datuwen intudok da te hi Jesus ya umat nah dilag an pat-alanay tapol an punnomnom ingganay pakainillaon hi Jesus an hiya nan kay talo. 20Mu hay ahan ihaad yuh nomnom yu ya adi mabalin an waday tagun hiya pe ya naawatanay kibalinan nan nitudok an kalin Apu Dios te mahapul an nan Espiritun Apu Dios di bumaddang ke hiya ta ahina maawatan di kibalinan diye. 21Te nan kalin Apu Dios ya ugge nalpuh nomnom handidan profetas, mu nan Espiritun Apu Dios di nangipainilan dida on ahida ipainilah tatagu.

will be added

X\