O duito e Korintionenge 8

1Kaibaiba, pinhod min inilaon yuy ine-en di namaddangan Apu Dios hanadah mangulug ad Macedonia. 2Te takon di dakol di numpalpaligatan da ya nanongnan mun-am-amlong da ya takon di nakawwotwot da ya dakol di indat dah baddang hanadah makahhapul nay baddang. 3Ya inilak an ong-ongal di indat dah baddang mu nan kabaelan da. Ya dida pey kon nomnom kediye 4te dida tuwaliy nangalin dakami an ongal di naminhod dan mid-um an bumaddang hanadah tatagun Apu Dios ad Jerusalem. 5Ongal di amlong mi gapun dida te inun-unud day pinhod Apu Dios hi namaddangan dan dakami an hidiye tuwaliy namnamaon min aton da. Bokon ya abuh diye, mu mapmaphod di inat da te ipaanhan day pangipaamlongan dan Apu Dios am-in nah aton da. 6Hituwen inat nadan tatagud Macedonia ya maphod, kinali nomnomnomon mi an maphod ot kuma damdama hin itultuluy yu nan ammung yun idat yu hanadah nungkawotwot. Kinali iganag-a mih Titus an nangilugih ammung yu ta mibangngad hinah kad-an yu ta bumaddang an mangamung hi ibaddang yu. 7Inilak an maphod di pangi-eyu te nahamad di pangulug yun Jesus, ongal boy kabaelan yun muntuttudu hi mipanggep ke hiya ya pakaawwatan yuy mipanggep ke Apu Dios. Ya athidi bon ongal di naminhod yun mangat nah impangununa ya ongal boy naminhod yun dakami. Am-in datuwe ya maphod, mu mapmaphod ot hin ongal di naminhod yun bumaddang hi ibbayu. 8Adik e kalyon hituwe ta mapilit kayun umidat hi baddang yu, mu ipainilak ke dakayuy paminhod nadan udum an bumaddang hanadah nungkawotwot ta deket un-unudon yuh diyen maphod an pangi-e ya hidiyey kitib-anan makulug damdamay paminhod yu. 9Te inila takuy inat Apu takun hi Jesu Kristo hi nangipatib-anah hayudut nan ditaku te takon di wadan am-in di maphod ke hiyah langit ya numbalin hi nawotwot handih immali tuh luta ot ikate nay liwat taku ta milak-am takun am-in nah maphod an wadan hiya. 10Hay nomnomnomok ya kudukdulnay gibbuwon yuh naen ammung yun inlappu yu dih toon. Bokon ya abu dakayuy namangulun immidat, mu dakayuy namangulun naminhod an umidat. 11Maphod di punnanongon yuy naminhod yun umidat hi baddang, umat handih lappuna ta ingganay magibbu. Ya idat yu nan kumpulnan gol-an yun idat. 12Te hay pinhod Apu Dios ya hay naminhod takun umidat. Te deket pinhod takun umidat ya abulutonay kumpulmin gol-an takun idat, ittay weno ongal. 13Adik bo kanan di ihanakul yun idat di wadan dakayu hi pamaddang yuh ibbayu ta dakayuy maligatan. Mu hay pinhod ku ya deket dakayun wadwada-an ad uwani ya maphod di baddangan yu hanadan ma-ma-idan ta deket udum hi algo ta dakayu damdamay munhapul hi baddang ya diday wadwada-an ya baddangan dakayu damdaman dida ta mun-iingngo taku an maid di maligatan. 15Umat hi impitudok Apu Dios mipanggep handidah aammod takun nangamuamung hi manna handih kawada dan nah adi maboblayan an kananay "Nan tagun dakol di inamung na ya maid di ena hawwalon, mu umidat hanadah ittay di inamung da ta maid di makudangan." 16Ongal di pumpasalamatan min Apu Dios te binaddanganah Titus ot gaga-id an bumaddang ke dakayu, umat damdaman dakami an gaga-id kamin bumaddang ke dakayu. 17Gapu te gaga-id an umalih na ya maan-anlan mangabulut hi nangibagaan mi ke hiyan umalin bumaddang ke dakayu te nundadaan pe tuwalin umalih na. 18Paki-aliyon min hiya tun ohan ibba takun pakatbalon am-in di mangulug hi kabobboble te hay pangitanuttuduwana mipanggep ke Apu Dios. 19Hiya boy pinilin nadan mangulug an mikuyug ke dakamin mangie nah mibaddang hanadah mangulug an nungkawotwot. Hituwen ngunu an aton mi ya kidayawan Apu Dios ya hituwe boy kitib-anah naminhodan min bumaddang hanadah ibba takun mangulug. 20Pakaippaptok miy pangikap-ongan mi tuh ongal an pihhun naamung ta maid di katumtumbukan mih ad-adi. 21Pinhod min aton di maphod bokon ya abu hi hinangngab Apu Dios, mu takon hi tatagu. 22Paki-aliyon mi ke da Titus tun ohan ibba taku an impakainnila min mahlun mangat hi ipangunun Apu Dios ya pakappinhod nan bumaddang ke dakayu, namam-a te ongal moy dinol nan dakayu. 23Hi ke Titus ya hiyay ib-ibbak an mungngunuh pamaddangan min dakayu. Ya hantudan duwan pun-ibbana ya diday itud-ak nadan mangulug ya gapuh pangi-eda ya mipadayaw hi Kristo. 24Ta hidiye nan ipatibo yuy pamhod yun dida ta pangitib-an nadan mangulug hi kabobboblen makulug di pamhod yu ya inilaon da an makulug di init-oit-ok min kaphod yu.

will be added

X\