O duito e Korintionenge 5

1Adi kami manghop te inila taku an hantun adol taku an mialig an bale taku tuh luta ya mapa-i, mu hannotan Apu Dios hi adi mapa-in adol hi langit an munnananong ta nangamung. 2Ditaku ya ongal di punligligatan taku ad uwani, kinali uma-aptu takun mahannotan tun adol taku nah adi mapa-i an adol hi langit. 3Man-uke ya deket mate taku, bokon hay linnawa taku ya abuy wadah langit, mu takon di hay adol taku ya wada damdama. 4Tun adol taku tuh luta ya munholholtap ya mapa-i, kinali aptuwan takuy kahannotan di adol taku nah adi mapa-i. Adi taku e kanan di aptuwan takuy katayan taku, mu hay aptuwan taku ya hay kahannotan tun adol an mate nah adol an munnananong ta nangamung hi langit. 5Indadaan ditakun Apu Dios an athidiy maat ya hay pangipatib-ana an maat hidiye ya impaalina nan Espiritunan ditaku. 6Kinali nanongnan madinol takun Apu Dios ya inila taku an adi taku makiha-ad ke hiya hi kad-ana hin nanongnan matagu taku an wada tun adol takun mapa-i. 7Mu hidiyen pundinol taku an makiha-ad takun hiya ya nipuun hi pangulug takun Jesus. Adi mahapul an tibon taku on ahi taku kinulug. 8Kinali madinol takun Apu Dios takon di taynan taku tun adol taku ta hi Apu takuh langit di etaku pakiha-adan. 9Ta hidiye nan hay umanhan an nomnomon taku ya hay pangipaamlongan takun Apu taku takon di wada taku tuh luta weno hi langit. 10Te hi udum hi algo ya ume takun am-in hi hinangngab Kristo ta humalyaon ditakun hiya. Waday oha on dawatonay ginun-ud na mipuun hi in-innat na tuh luta. Ta hanada ken maphod di in-innat na ya maphod di gun-udon na ya hanada ken gaga-iho ya ad-adiy midat ke dida. 11Gapu te inila min katatakut di punhumalyan Apu taku ya aton min am-in di kabaelan min mangawis hi tatagu ta mangulug dan hiya ta adi da makastigu. Hi Apu Dios ya inilana an maid di udum hi wadah nomnom mi ketuwen aton mi mu hay ya abu pangipaamlongan mi ke hiya. Hana ot ta takon di dakayu ya inila yu damdaman athidiy wadah nomnom mi. 12Adiyu bo kanan di pitpitbal kamin dakayu hi pangalyak ketuwe, mu man-uket pinhod kun pakaawwatan yuy pangi-emi ya, ta waday dinol yun dakami ya inilaon yuy panumang yu hanadah tatagun pakadayyawon day katatagun di tagu an bokon hay kaphod di pangi-e. 13Deket kalyon di udum di nahalman kamin kay kami mun-angon muntuttuduh mipanggep ke Apu Dios ya takombo ot kidayawana. Mu madinol kami an inila yun adi kami mun-ango te dadiyen at-atton mi ya kiphodan yu. 14Man-uket makakkahlu kamin mangitanuttuduh mipanggep ke Kristo ya gapuh impaminhod nan ditaku. Ingkate nay liwat takun am-in an tatagu, kinali takon di hiya ya abuy nate ya kay taku mo nakikaten hiya. 15Ingkatenay kiphodan am-in di tatagu ta am-in takun matagu ya bokon hay adol takuy nonomnomon taku, mu nan nangikaten ditaku an namahuwan di ipaamlong taku. 16Tedeyan ditakun mangulug ya wada moy nigappatan takun Kristo ya adi taku mo ibilang di kinatagun di tagu umat hi pangat nadan adi mangulug. Takon di handi ya athidiy nangibilang mi ke Kristo, mu ad uwani ya bokon mo athidiy pangibilang min hiya. 17Nan tagun nigappat ke Kristo ya numbalin hi balun tagu te nan pangi-ena handi ya nahannotan hi balu. 18Inat Apu Dios am-in datuwe hi nangitud-akana nah Imbabalenan hi Kristo ot ikatenay liwat taku ta waday aton takun mibangngad ke Apu Dios. Ya ditakun mangulug di nangidinolan Apu Dios an mangituttuduh mipanggep ke hiya hi tatagu ta mibangngad da damdama ke hiya. 19Hay pinhod kun kalyon ya kinaan Apu Dios di nakibuhulan di tagu ke hiya hi nangitud-akana ke Kristo ot mateh krus ta adina mo ibilang di liwat di tagu. Hituwey indinol nan dakamin emi ituttudu. 20Kinali intud-ak dakamin Apu Dios ke dakayu ta ituttudu miy mipanggep ke Kristo. Te hay ahan pinhod mi ya abuluton yuy inat Kristo ta makaan di pakibuhulan yun Apu Dios ta mihamad di pakihayyupan yun hiya. 21Hi Jesus ya maid di liwat na, mu gapuh kiphodan taku ya hiyay intud-ak Apu Dios an mangikateh liwat taku ta deket mangulug takun hiya ya milak-am taku nah kaphod Apu Dios.

will be added

X\