O duito e Korintionenge 3

1Kal-ina ya pangali yuy pitpitbal kami te kinalik hidiye. Bokon ke ya pangali yuy umat kami hanadah udum an mahapul an waday ipatibo mih tudok ke dakayu ta ahiyu abuluton di ituttudu mi ya mahapul an mumpakapya kamih tudok ke dakayu ta ahi dakami abuluton hanadah pangayan mi. 2Mu dakami ya adimi mahapul di umat ke danaen tudok te dakayuy kay tudok an mangipatiboh udum an tatagu te nun-innilah katagutagu an nahannotan hi maphod di pangi-eyu gapuh intuttudu mi, kinali kay kayu tudok an mabidbid. 3Makulug an kay kayu tudok Kristo te kinulug yuy intuttudu mi mipanggep ke hiya. Hay Espiritun Apu Dios an makandamay nuntudok, bokon hay tinta ya bokon hi batuy nitudkana, mu hi nomnom yu. 4Man-uket kalyon mih nae ya madinol kamin abuluton Apu Dios di ngunumi gapuh baddang Kristo. 5Adimi e kanan di kabaelan mih tuwen ngunu te gulat nat kanan miy dakami on inat mi ya makulug an adimi kabaelan. Te hi Apu Dios ya abuy kalpuwan di kabaelan min mangat ketuwen ngunu. 6Hiyay nangidat hi kabaelan min mangipainila nah balu an planuna mipanggep hi kibaliwan taku. Hituwen planuna an ipainilan nan Espiritun Apu Dios ya adi umat nah Tugun Moses. Te hituwen Tugun an nitudok ya katayan di tagu te nan adi mangun-unud ketuwe ya mihi-an ke Apu Dios ta inggana. Mu nan ipainilan nan Espiritun Apu Dios ya hidiyey kalpuwan di pakitaguwan ke hiya ta inggana. 7Handih nundawatan Moses kediyen Tugun Apu Dios an nitudok hi batu ya namahig an humihhiliy dayaw Apu Dios hi angan Moses ta takon handih mungkauma ya adinadaman itokkol nadan ibbanan tanud Israel ke hiya. Hin athidin dayaw di nipatibo handih nidatan diyen Tugun an takon di katayan di pumbalinana, 8ot namam-a moy dayaw Apu Dios an mipatibo nah balun planuna an ipainilan nan Espirituna. 9Te man-ut madayaw hidiyen Tugun an lummuh kakastiguwan nadan adi mangun-unud kediye, mu ongal di dayaw nan balun planu mipanggep hi kapakomaan di liwat taku ta ibilang ditakun Apu Dios an maphod. 10Maid moy dayaw nan Tugun handi hin ipaddung taku nah ongal an dayaw nan balun planun Apu Dios. 11Deket madayaw hidiyen Tugun an napoppog ot ugge nunnanong ya immam-ana mon ong-ongal di dayaw nan balun planun Apu Dios an maid di poppogna. 12Ta hidiye nan gapuh dinol mi ketuwe ya natulid kamin mangituttudu. 13Adi kami umat ke Moses handi an hukyunganay angana ta adi ang-angon nadan ibbana hanan humilin dayaw Apu Dios an mungkaumah angana. 14Hay nomnom nadan Judyu handih done ya kay nahophopan, kinali ingganad uwani ya adida pakaawat hi ine-en nan impitudok Apu Dios hin bidbidon da. Abuna hanadan mangulug ke Kristoy damanan pakaawat hi pangi-en Apu Dios. 15Takon di ad uwani ya binidbid ken nadan Judyu nan Tugun Moses ya adida pakaawat te nanong nan kay nahophopan di nomnom da. 16Mu deket muntutuyuy taguh liwat na ta kulugonah Apu taku ya makaan nan kay nihophop hi nomnom na. 17Hidiyen kanak an hi Apu taku ya hidiye nan Espiritun Apu Dios. Ya deket hiyay mawada ke ditaku ya adi mo mahapul an etaku idinol nah Tugun Moses. 18Ta hidiye nan am-in takun mangulug ya maid moh diyen kay nihophop hi nomnom taku ta ditakuy kitib-an nan dayaw Apu takun hi Jesu Kristo ya itultuluy nan hannotan di pangi-e taku ta miingngo takun hiya. Hidiyen Apu takun manannot hi pangi-e taku ya hidiye nan Espiritun Apu Dios.

will be added

X\