O duito e Korintionenge 2

1Ta hidiye nan ninomnom ku an kudukdul nay adiyak mo umalih na hin mahapul bon boh-olan dakayu ta u-umyungan kayu bo. 2Te deket pahakitok di nomnom yu ya dahdi moy mangipaamlong ke ha-on hin bokon dakayu ya abu? 3Kinali abunay tudok an impaalik ke dakayu te adik pinhod an deket umaliyak hina ya dakayu bon nomnomnomok an mangipaamlong ke ha-on di mangipahakit hi nomnom ku hi panib-ak nah ad-adin at-atton yu. Mu inilak an deket mun-am-amlongak hi aliyak ya athidi bon dakayu damdama. 4Handih nuntudokak ke dakayu ya makahakkit di nomnom ku ya kumakkaguwak ke dakayu ya munluluwaak hi nangitudokak kediye. Hay gapunah nuntudokak ya bokon hay pangipahakitak hi nomnom yu, mu man-uke ya pinhod kun inilaon yun ongal di impaminhod kun dakayu. 5Hinaen ibbayun gaga-ihoy in-innat na ya bokon ha-oy ya abuy bina-inana, te takon di dakayu. Mu adik pinhod an halmak di kali kediyen inat na 6te ongal moh diyen nungkastigun di dakol ke dakayun hiya. 7Kal-iwan yuh diyen liwat na ya kalyan yu ot ya abu. Te deket adi yu iathidi ya mahakit di punnomnomana ya makaddismaya. 8Kinali dawatok ke dakayu an ipatibo yun makulug di pamhod yun hiya. 9Man-uket nuntudokak ke dakayu ya pinhod kun inilaon hin un-unudon yun am-in di ituttuduk ya inat yu nan kinalik an aton yu. 10Madinolak an niptok di aton yu, kinali deket pakomaan yuh diyen tagu ya pakomaak damdama. Te deket mahapul an waday pakomaak ya atok gapun Kristo ta kiphodan yu, 11ta adi mabalin an e ditaku haulon ke Satanas te inila takuy pangi-en di punhaul na. 12Handih dimmatongak ad Troas hi ek pangituttuduwan mipanggep ke Kristo ya tinibok an indadaan Apu taku hanadan tatagun mangngol kediyen ituttuduk. 13Mu madanaganak te maid hi Titus an mangipainilan ha-on hi mipanggep ke dakayuh na. Ot kanak mo hanadah mangulug hidiy "Aga, nangamung kayu tedeyan umeyak." Tinaynak dida ot umeyak ad Macedonia ta ek tibon hidi. 14Ongal di pumpasalamatak ke Apu Dios te gapuh nigappatan takun Kristo ya banaddangan ditakun mangapput ta nangamung. Ta hidiye nan, dakamiy binaal Apu Dios an mangipainilah mipanggep ke Jesu Kristo an takon di daanay pangayan mi ya mialig an waday nabanglun hamuy. 15Te ditakun mangulug ya mialig taku nah nabanglun hamuy di insenso an umipaamlong ke Apu Dios te ditakuy panginilaan di tatagu hi pangi-en Jesu Kristo. Ta am-in nadan tatagun tuttuduwan taku, mibaliw weno adi, ya kay ditaku hamuyon. 16Hidiyen intanuttudu taku ya mialig nah maphod an hamuy an umidat hi kitaguwan nadan mangulug, mu hanada keh adi mangulug ya maka-agub an pumate. Hituwen ngunu ya naligat te maid di makabael, 17mu damanan aton mi te hi Apu Dios di mangidat hi kabaelan min mangat ketuwe, mu adi kami umat hi udum an abunay boklaon day gapunah eda puntuttuduwan te hay punnomnom dah kalin Apu Dios ya kay migattang. Mu adi kami athidi ya adi kami munlangkak te binaal dakamin Apu Dios an e mangituttuduh mipanggep ke Jesu Kristo. Hi Apu Dios ya tibtibbonay at-atton mi.

will be added

X\