O duito e Korintionenge 12

1Adi maphod an eyak mumpahhiya te maid di hilbina, mu dakayuy gumapu, ot ad uwani ya kalyok ke dakayuy impatibon Apu takun ha-on. 2Wada on ohan tagun mangun-unud ke Kristo an tinibok an timmalakdang hi nakatang hi langit. Himpulut opat moy toon di nala-u handih naatan tuwe, mu uggek inila hin hay adol nay timmalakdang weno hay linnawana ya abu. Hi Apu Dios ya abuy nanginilan diye. 3Ipidwak an kalyon, wadan hay linnawana ya abuy timmalakdang weno takon di hay adol na, mu uggek inila te ammunah Apu Dios an nanginilan diye. 4Handih kawada nah dih langit ya waday dingngol nah kali an maid di pakaikalih kibalinana ya adi iabulut Apu Dios an kalkalyon hi kumpulnan tagu. 5Gulat na ya lebbeng nan ipahhiyak hidiyen tagu, mu adi te abuna nan kinakudang hi kabaelak di ipadayaw ku. 6Mu takon nin di mumpadayawak ya nanongnan adiyak umat hi tagun makudang di nomnom na te takon di mumpadayawak ya abunay makulug an kanalkalyok. Mu adiyak mumpadayaw te adik pinhod an hidiyey gumapuh nahalman di pundayaw di tagun ha-on, mu hay pinhod kuh pundayawan di tagun ha-oy ya mipuun hi tinibo dan inat ku ya dingngol dan intuttuduk. 7Ot gapu te adi pinhod Apu Dios an mumpahhiyaak te hay nanib-ak ke dadiyen impainila nan ha-oy ya in-abulut nah Satanas an mangipaligligat ke ha-on ta maid di innuk an mangipadayaw hi adol ku. 8Numpitluy nundasalak ke Apu taku ta kaanonah tuwen ligat ku, 9mu kananay "Hay mahapul mu ya hay baddang kun he-a ta damanan anusam di ligat mu. Te deket waday pungkudangan di kabaelan di tagu ya hidiyey lummuh pundinolanan ha-on ta baddangak ya hidiyey kalkal-otan hi punggibokanah baddang ku." Hidiyey kanan Jesus, kinali mun-am-amlongak mo an mangipadayaw hi kinakudang kun mangan-anus hi ligat ku te deket adiyak pakaanus on magibok kuy baddang Jesu Kriston ha-on. 10Ta hidiye nan maan-anlaak an mangabulut hi pungkudangak ya ligat ku, umat hi pumpanadngolan dan ha-oy ya hay pumpaholholtapan dan ha-on gapuh pangun-unudak ke Kristo. Te deket waday pungkudangak ya maligatanak ya maudman di kabaelak an idat Jesu Kristo. 11Kayak ugge nanomnoman an mangalkalih mipanggep hi pangi-ek, mu mapilitak te dakayu. Gulat na ot ta adi kayu midmidngolan ya dakayu ot di manumang hanadah mamihupihul ke ha-on. Te takon di maid di bilang kun tagu ya adiyak nababbaba mu nadan kanan yun nungkatag-en apostoles. 12Handih kawadak hina ya tinibo yun am-in di inainat kun kitib-an di kinaapostoles ku umat hi nangan-anusak hi ligat ku ya hay nangatak hi dakol an milagro. 13Adiyu kanan di hinnatkon di pangibilang kun dakayu mu hay pangibilang kuh udum an mangulug, te hay ya abu hinnatkon ya uggeyak numbagah baddang ke dakayu. Ya deket kanan yuy ad-adih diyen inat ku ya kudukdulnay pakawananak. 14Nundadaanak bon umalih na. Hituwe moy pitlunah aliyak, mu nanongnan adiyak mumbagah baddang ke dakayu te hay kiphodan yuy gamgamak bokon hay pihhu yu. Umat hi u-unga an bokon diday mananud hi aammod da, mu hay aammod day mananud ke dida. 15Athidin ha-on an maan-anlaak takon di umahok am-in di nganneh diyen wadan ha-oy ya munligatak gapun dakayu mu ta baddangan dakayu nah pangulug yu. Hin athituy kaongal di pamhod kun dakayu ya kon adiyak pohdon damdama? 16Dakayu ya inila yun maid di ek numbagaan hi baddang ke dakayu, mu wadan kulugon yu nadan mamihupihul ke ha-on an kanan day "Man-ut bokon hi Pabloy umalin mangalah pihhu, mu natalam te intud-ak nay udum an tatagun mangala ta ahida idat ke hiya." Mu kon waday indat yuh pihhu hi indat dan ha-on? 18Intud-ak kuh Titus ya nan ibbana, mu kon edakayu hinaul ta waday inala dan dakayu? Maid, te inilayu an dakamin duwa ya nun-ingngoy nomnom mi ya hay pangi-emi. 19Wadan pangali yu on intudok mi datuwen dakayu ta panani mi nah ipabahul dan dakami, mu adi te hay kihamadan di pangulug yun Kristoy gapunah nuntudokan min dakayun iibba. Ya inilan Apu Dios an makulug hituwe. 20Te uma-agolak an kal-inat hantuh aliyak hina ya balawonak hi pamoh-olak ke dakayu hin inilaok an waday adi maphod hi at-atton yu an wadaday munhahannu, munhin-a-amo, mumbibinnoh-ol, waday oha on ammunay adol nay nonomnomona, mumpadngol, muntumbuk, mumpahhiya ya waday oha on ipilit nay pinhod na. 21Makulug an uma-agolak an kal-inat hantuh aliyak hina ya makabba-inanak ke Apu Dios ya u-umyunganak hin wadaday ugge nangiwalong nah punliwatan an umat hi makibabai, ihuyop di bokon inayan ya aton di kumpulnan kababain.

will be added

X\