O purvo Tesalonicenses 4

1Inadal yu nan intugun min dakayun kaibaiba mipanggep hi pangi-en di pumbiyag an mangipaamlong ke Apu Dios ot deyan un-unudon yu. Ya gapu ke Jesus an Apu taku ya kalyon min dakayu an ihamad yun mangun-unud ketuwen tugun 2te inilayu an am-in hanadan intugun min dakayu ya nalpun Apu Jesus. 3Hay pinhod Apu Dios ya maphod di pangi-e ya hay punnomnom. Pinhod na bon iwalong yun am-in di malalao, umat hi makibabai ya makilalaki. 4Mahapul an maphod di pangahawaan yu ta miunnud nah pinhod Apu Dios an aton di himbale ta maphod di punbalinan di nun-ahawaan yu, 5ta adi umat hi pangat nadan tatagun ugge nanginilan Apu Dios an malalaoy aton da. 6Adiyu haulon di ibbayu ta eyu pun-ay-ayaman di inayan da te kinali min dakayu an adi pinhod Apu takuy athidi ya namahig di pangastiguna nah mangat hi athidi. 7Te bokon hay pun-gaga-ihawan di namiliyan Apu Dios ke ditakun tataguna, mu pinili ditakun mangat hi maphod. 8Ta hidiye nan hay tagun mungngohen tuwen tugun ya bokon hay taguy ngohayona, mu hi Apu Dios an mangidat hi Espiritunan ditaku. 9Adi mahapul an tugunon dakayu mipanggep hi punhimpopohhodan takun mangulug te impainilan tuwalin Apu Dios ke dakayuh tuwe. 10Ya hiyah tuwey impatibo yu hanadah ibba takun mangulug ad Macedonia. Hay pinhod mi ya punnanongon yuh tuwen pangi-e. 11Intugun min dakayu handi an hay nomnomon yu ya hay linggopan di biyag yu, adiyu pakibibiyangan di udum an tatagu ya waday oha on nangamung nan mamoklah mahapul na ta adi kayu pitpittanud. Aton yu datuwe ta pangitib-an nadan adi mangulug hi kaphod yu ta lispituhon dakayu. 13Kaibaiba, pinhod min ipainilan dakayu nan ahi maat hanadah ibba takun mangulug an nungkakate handi ta adi kayu u-umyungan an umat hanadah adi mangulug an maid di namnama dan migappat hi pun-ap-apuwan Apu Dios. 14Ditaku ya kulugon takun nateh Jesus, mu minahuwan Apu Dios, kinali athidi bon ahina mahuwan am-in nadan mangulug ke Jesus ya ahina pakialiyon dida hantuh pumbangngadan Jesus. 15Hituwey kinalin Apu taku mipanggep ke ditakun mangulug: Ditaku ken matagu kediyen pumbangngadana ya bokon ditakuy mamangulu, mu makidihhan taku hanadah nungkakaten mangulug an e manamun hiya. 16Hantuh aliyan Apu takun malpuh langit ya ahi waday donglon takuh nal-ot an kalin mun-ayag ke ditaku ya muntukuk bo nan ap-apun di anghel ya midihhan an gumango nan tangguyub Apu Dios. Ya hay mamangulun maat ya mamahuwan nadan nungkakaten mangulug ke Kristo, 17ta ditaku ken matagu kediyen tiempo ya maki-e takun didan e manamu ke Apu taku nah kulabut, ta makiha-ad takun hiya ta inggana. 18Kinali maphod ot an hituwey pangal-alubyag taku hanadah ibba taku.

will be added

X\