O purvo Pedro 4

1Hi Kristo ya inippol nay nunholholtapana ya inan-anusanay ligat handih kawadana tuh luta, kinali athidi ot damdamay aton taku. Te deket maanusan di ligat ya kabaelan an mangiwalong hi liwat. 2Ta hidiye nan mipalpud uwani ya hanan pinhod Apu Dios di aton taku, bokon hay gaga-ihon pinpinhod di adol di un-unudon taku. 3Impalana-u yu mo nadan gaga-ihon atoaton di adi mangulug, umat nah malalaon aton yu, hay gaga-ihon omnawan di adol ya hay nahalman an pun-inum ta mabutong kayu. Ya hay ahan adi pinhod Apu Dios ya hay nundayawan yu hanadah adi makulug an dios. 4Ad uwani ya masdaaw nadan adi mangulug an ibbayu handi hi nahannotan di pangi-eyu ta deyan pihupihulon dakayu nah adiyu mo pakidkid-uman ke didan mangat hi gaga-iho. 5Mu hi udum hi algo ya ahi humalyaon Apu Dios dida nah gaga-ihon inat da. Te nundadaan an munhumalyah katagutagu, takon nadan nungkakate. 6Kinali takon hanadan nate ya nipainilan dida nan tuttudun Jesu Kristo. Takon di natey adol da, te hidiye tuwaliy maat am-in hi tagu ya mabalin damdaman makitagu dan Apu Dios hi udum hi algo. 7Mungkadatngan moy kapoppogan di luta, kinali mahapul an manomnoman taku ya konoknongon takuy aton taku ta hay mundasal di ipaptok taku. 8Ya hay ahan mamangulun nomnomon taku ya hay nahamad an punhimpopohhodan taku ta takon di nganneh diyen numbahulan di ibba takun ditaku ya pakawanan taku dida. 9Ya wadada key himmawwang hi baleyu ya adi kayu mungngudu, mu hay maphod ya maapnga kayun dida. 10Hin-oh-an ditaku ya waday kabaelan takun indat Apu Dios, ta maphod di iusal taku dadiyen nunhihinnatkon an kabaelan hi kiphodan di ibba takun mangulug. 11Ta hanadan nidatan hi kabaelan an muntuttudu ya mahapul an nan kalin Apu Dios di ituttudu da. Ya hanada ke bon nidatan hi kabaelan dan bumaddang hi udum ya mahapul an hidiyey ihamad dan aton. Ta am-in nan aton taku gapuh baddang Jesu Kriston ditaku ya kidayawan Apu Dios. Hiya ya abuy madayaw ta inggana te hiya ya adi matpong di kandamana. Amen. 12Kaibaiba dida, adi kayu mamodwong nah punholholtapan yu te athina tuwaliy maat ke ditakun mangulug an hidiyey pamatnan Apu Dios hi pangulug taku. 13Mu abuluton yuy punholholtapan yu gapuh nangulugan yu ta kay kayu nilaggat handih nunholholtapan Kristo ta hantuh pumbangngadana ya umamlong kayu hi kipatib-an di dayaw na. 14Takon di pihupihulon dakayu hanadah adi mangulug gapuh nangulugan yun Kristo ya umamlong kayu te hay nangulugan yuy kitib-anan wada nan madayaw an Espiritun Apu Dios ke dakayu an bumaddang. 15Hin kananat munholholtap taku ya tibon taku ta bokon gapuh pangatan takuh gaga-iho umat hi pumate, mangako, nadan udum an pumbahulan ya hay makibibiyang hi udum an tatagu. 16Mu deket hay pangulugan takun Jesu Kristoy gapunah punholholtapan taku ya adi taku bumain. Ya maphod ot di ipadayaw takuh Apu Dios kediyen punholholtapan taku gapuh pangitakdogan takun Jesu Kristo. 17Hituwen punholholtapan takuy kitib-anan nalappuwan moy punhumalyaan Apu Dios hi tagu an hay pamanguluwonan humalyaon ya ditakun tataguna. Deket athidin takon di ditakun tataguna ya humalyaona ya namam-a hanadah adi mangulug nah tuttudun Apu Dios te makastigu da. 18Makulug an nahalman di pangastigun Apu Dios hanadah adi mangulug te impitudok na an kananay "Takon di nan maphod an tagu ya naligat di ena kibaliwan. Deket athina ya nganne moy maat hanadah gaga-ihon tatagun mungngohe ke Apu Dios?" 19Ta hidiye nan hi Apu Dios di mahapul an pundinolan taku hi pangatan takuh maphod, takon di munholholtap taku hin hidiyey pinhod na, te hiyay nunlutun ditaku ya adi ditaku iwalong.

will be added

X\